غزل

بیراجی

سمجھدے نیں ایہہ لوکی ظاہر واسطے
پونجی ونڈ دتی اے آخر واسطے
مرہم آپے منگ مدینے والے توں
پھٹ جے کھاہدے جثے لاغر واسطے
پہلے ای دن کڈھ سکولوں جاتک نوں
ایہہ سزا اے غیر حاضر واسطے
کوئی دوا وی مینوں چنگی لگدی نہیں
پا کے پینے دے لئی ساغر واسطے
کرو دعا دل وچ پئے رحم غریباں لئی
پاک دیس دے حاکم جابر واسطے
ساہ ادھارے لے کے کیہ ہن کرنے نیں
نبضاں دے بیراجیؔ ماہر واسطے
نت دعا بیراجیؔ کردا رہنا واں
جثے دے اندر تے باہر واسطے