غزل

زاہد صدیقی

کد تک ایویں چاتر بن بن چارن گے
مینوں تے نہیں لگدا یار سہارن گے
آخری حربہ اے بس جھوٹھے لوکاں کول
مینوں کافر کافر کہہ کے مارن گے
عشقا اج کل تیرے چالے دسدے نیں
ایہ ہن مینوں میرے سِر توں وارن گے
قسمت ہردی ہردی ہار ای جانا ایں
تیرے جذبے جے کر ہمت ہارن گے
سوچ رہیا واں اوہنے درشن نہیں دتا
سُفنے کِسراں میرا بُتا سارن گے
سُفنے اکھاں وچ ای رڑکی جاندے نیں
خورے کس دن میرا سینہ ٹھارن گے
بے سمجھی وچ متھا رگڑی جانا ایں
زاہد تیری بھُل اے سجدے تارن گے