پیار والی محفل

ارشاد کھوکھر

اج کل یاراں وچ نری بے وفائی اے
پیار والی محفل دِلا کاہنوں توں سجائی اے
دکھاں دے ساتھی کوئی نہ‘ سُکھاں دے سارے نیں
سوہنیاں دے وعدے دلا نرے جھوٹھے لارے نیں
بچ کے غریبو ایہہ امیراں دی خدائی اے
پیار والی محفل دِلا کاہنوں توں سجائی اے
من دے نیں سب کجھ مطلب ہوندیاں
بعد وچوں اکھاں متھے چھڈ جاندے روندیاں
اج کل پیار وچ دکھ تے دکھپائی اے
پیار والی محفل دِلا کاہنوں توں سجائی اے
اپنی اوقات دا لبھ کوئی ہان دا
نیوے نال خوشیاں تے اُچا دکھ جان دا
مر گئے ارشاد جہناں اُچے سنگ لائی اے
پیار والی محفل دِلا کاہنوں توں سجائی اے