وکالت

خالدحسین تھتھال

جدوں اپنیاں سوچاں آپو وچ ای
جھُوجن جھیڑن کھہڑن کھہمبڑن
فیر بندے نوں اپنا آپ نتھارن لئی
اپنی آپ ای پرہیا جوڑ کے
آپ ای ثالثی کرنی پیندی
اپنا آپ نیاں وی کرنا
اپنی آپ عدالت لا کے
آپ کٹہرے وچ کھلو کے
اپنی آپ وکالت کرنی
آپ گواہیاں تارنیاں
اپنی آپ ضمانت بھرنی
اپنی ذات دی ذیل دے اندر
صلح صفائی کرنی
اپنا آپ ای منصف بن کے
اپنے آپ نوں سزا وی دینی
بھرت وی بھرنی
نہ کسے دی مِنّت کرنی
نہ کسے دا ترلا کرنا
آپ ای ڈُبنا ترنا