غزل

منور احمد کنڈے

سودا کھوٹ ملا کے رکھے
ہٹی نوں چمکا کے رکھے
کاروبار سیاست دا اے
گلیں باتیں لا کے رکھے
حق دا نعرہ جے کر لائیے
سولی تے لٹکا کے رکھے
جھوٹ دی نگھی بُکل مارے
سچی گل چھپا کے رکھے
آس امیداں دی پھلواری
سدھراں نوں مہکا کے رکھے
ڈاکو ویکھو مُلاں وانگر
داڑھی مچھ ودھا کے رکھے
دھرتی ماں دی ممتا ویکھو
مچھی نوں تڑفا کے رکھے
گھر دی کندھ تے کھنڈی لٹکی
یاداں نوں گرما کے رکھے
جد وی کاگ بنیرے بولے
سوٹ منور پا کے رکھے