غزل

اکرم شیخ

ہر اک اکھ خدا اے تیرے شہر اندر
کیڈی گرم ہوا اے تیرے شہر اندر
رتاں دے دروازے پتھر ہو گئے نیں
کالی بھور فضا اے تیرے شہر اندر
کمرے اندر گھپ انھیرے ڈردے نیں
بوہے کھڑی قضا اے تیرے شہر اندر
کوئی وی پرچھاواں کدھرے بولدا نہیں
دھپاں ہتھ صدا اے تیرے شہر اندر
ہر اک چہرے دا شیشا ٹُٹا اے
اکھ توں عکس جدا اے تیرے شہر اندر
ریت دیاں کندھاں تے کوٹھے واء دے نیں
رستا خاک جیہا اے تیرے شہر اندر