غزل

نائلہ ریاض بٹ

جدوں چڑھدا بدل سون دااے
اگاں دل وچ میرے لاوندا اے
جیویں دھپاں جیٹھ ہاڑ دیاں
پیراں دیاں تلیاں ساڑھ دیاں
کجھ یاداں سینہ ٹھار دیاں
جیویں ٹھنڈیاں کنیاں پیار دیاں
آسمانی بگلے یاداں دے
بن ڈاراں دل دیاں کندھاں تے
آ بیٹھ بنیرے مل دے نے
کجھ پیارے دیس بیگانے توں
ان کہے سندیسے کل دے نے
اکھاں وچ کجل راتاں دا
کجھ سپنے پیلیاں رتاں دے
بن دیوے جگمگ بلدے نے
اوہ ککر کالے ویہڑیاں دے
پل سمے دے گنڈھ دے نے
یاداں دے کنڈے وڈھ دے نے
فیر سون دے بدل اڈ جاندے
سمے وانگ پانیاں رڑھ جاندے
بنریوں بگلے مڑ جاندے
اکھاں دے پانی سُک جاندے
گجھے روگ دلاں دے مُک جاندے
فیر مال ساہواں دی ٹُٹ جاندی
چلدے چرخے وی رک جاندے