صغریٰ نوں خط

سلطان کھاروی

صغریٰ بھُل ہوئی تینوں بھُل گئے آں ساڈے وانگ نہ سانوں بھُلا دیویں
بوہے کھولدی رہیں جھاڑُو دیوندی رہیں کِتے گھریں نہ جندرے لا دیویں
ویکھیں صبر نماز نوں بھُلنا نہیں کدے کر نہ ایویں قضا دیویں
سُنیا اے بالاں دی جلد قبول ہُندی ساڈے حق چ نیک دعا دیویں
کِتے راہواں چ نہ اُڈیک رکھیں ساڈے آئون دی آس مُکا دیویں
دِین رکھیا دِین دے راکھیاں نے نانے پاک نوں آکھ سنا دیویں
تینوں اصغر دا بوہت خیال رہنا کدی کدی پنگھوڑا ہلا دیویں
اکبر ہووندا تے تینوں لین آئوندا کر معاف توں اوہدی خطا دیویں
نانی سلمیٰ دا نِت خیال رکھیں نالے میری سلام دعا دیویں
کہویں غازی عباس وفا کیتی گل صاف دی صاف سنا دیویں
دیوے بالدی رہیں جا کے روضیاں تے کسے رات ہنھیر نہ پا دیویں
ہویا جو وی کیتا یزیدیاں نے ایہنوں رب دے ناویں نہ لا دیویں
میلے ہون گے حشر دے پتناں تے اوتھے آن توں سانوں صدا دیویں
اسرافیل دے ہتھ چ ونجھلی اے اینا وقت سُلطان ٹپا دیویں