غزل
امین خیال
ایتھے سب دا خالی چھابا کاہدے جشن منائیے
توں ای دس خاں سوہنیا بابا کاہدے جشن منائیے
چٹی چمڑی والے صاحب ہیٹھاں جوئی رکھیا
کالے صاحب دا ہن وی دابا کاہدے جشن منائیے
اک تے لہو پسینہ کر کے رو دھو ڈنگ ٹپاندے
اک ویہلڑ پے کھاندے کھابا کاہدے جشن منائیے
ٹٹے نہر تے پیچن سارے رقبے وڈے وڈے
چھوٹے بھردے رہن خرابا کاہدے جشن منائیے
بھرے کنالے چھانے پھر وی ساون ماہ نہ ٹریا
ہن دھر دھر دے ہتھ رکابا کاہدے جشن منائیے
روون لہو چنھاں تے راوی واسیاں نوں کیہ بنیاں
رڑھیا پیار چناب دوآبا کاہدے جشن منائیے
یار خیال انعام تے تغمے اگل ہتھ لے جاون
ساڈے لئی بس سکی شابا کاہدے جشن منائیے
Load/Hide Comments