غزل
طارق گوجر
کلم کلاّ ساقی اے
رات وی ساری باقی اے
پیندے پیندے عمر گزاری
پیاس اجے وی باقی اے
مئے خانے دے باہر فرشتے
اندر بندہ خاکی اے
خورے کس دن پرت پوے اوہ
کھول رکھی میں طاقی اے
نال دیاں راہیاں نوں پچھاں
پندھ کناں کو باقی اے
کل تک پینوں روکن والا
اج کل ساڈا ساقی اے
دھوندے دھوندے عمر بتائی
جیون میری ٹاکی اے
دل تے میل نہ ہووے طارق
پھر پاکی ہی پاکی اے
Users Today : 302
Users Yesterday : 626
Total Users : 735210
Views Today : 1404
Total views : 11636006
Who's Online : 3
