غزل
طاہر وزیر آبادی
ٹٹی تند ترکلے نالوں ہتھ وچ رہ گئی پونی
چن دی مائی ہوش گوائی سوچ پئی فیر دونی
مالھ چرخ دی چر چر کردی آن پئی وچ گلمے
ٹٹ گئے مان تے مڑ کی دسنا’ مٹی کھاری لونی
باجھ بھراواں پر نہیں ہوندے’ بے پرنے کیہ اڈنا
انگ انگ اینویں لوس دا رہندا’ جوں ہانڈی وچ چھونی
برہا ناگ برا ہے لوکو’ ساڑ دیوے ہڈ گوڈے
لا کے بہہ جاندے فر چوکھے یار ہجر دی دھونی
لعل کھڑیچا لبھ جاندا’ نہیں لبھدے یار گواچے
اینویں کر نہ طاہر جگ تے توں پیا ٹونا ٹونی
Users Today : 254
Users Yesterday : 626
Total Users : 735162
Views Today : 1158
Total views : 11635760
Who's Online : 3
