غزل

اتفاق بٹ

حق کسے دا مارے اوہدا سردا نئیں
ہمت جے نہ ہارے بندہ مردا نئیں
جنہے کرنا ہووے اوہ کم کر جاندا
جھوٹے سچے لارے اگے دھردا نئیں
اجکل بندے بندیاں کولوں ڈردے نیں
اجکل تے کوئی رب سوہنے توں ڈردا نئیں
اودوں تیکر سجن نیڑے نئیں لاندا
جد تیکر میں اوہدا پانی بھردا نئیں
جت کے ہارن والے نوں اے دس چھڑیو
ہار کے جتن والا تیتھوں ہردا نئیں
لگدا توں بٹ دا حالے جانوں نئیں
ڈک لیندا اے ہنجو، ہوکے بھردا نئیں