نظم

طارق گوجر

پنجے ندیاں روون
اک دوجے دے گل لگ کے
واہ اوئے ربا سائیاں
اسیں اکو ماں دیاں جائیاں
ساڈے لیکھاں وچ وچھوڑے
ایہہ ویلے دے پردھاناں
ساڈے ازلاں دے سنگ توڑے
جنم جنم دے ویریاں
رل بہہ کے سودے کیتے
ساڈے ونڈ ونڈ پانی پیتے
ساڈی ہک تے لیکاں پائیاں
واہ اوئے ربا سائیاں
اسیں کس پاسے نوں وگیے
اسیں جس پاسے وی وگیاں
ایہناں دھرم کہی ہتھ پھڑ کے
ساڈے اگے روکاں لائیاں
ہن توں دس ربا سائیاں
ایس وگنے دی کیہ چس ہے
ساڈے قطرے قطرے دے وچ
دیس پنجاب دی تس ہے