غزل

امین خیال

اوہدے حکم بناں لے کوئی ساہ نہیں سکدا
اوہ چاہوے تے ہل کوئی وی کاہ نہیں سکدا
جہڑی منن والی ہووے من لینا واں
ڈھیٹھاں وانگوں ایویں سر میں ڈاہ نہیں سکدا
میں ہاں کمیں اج دا میتھوں سارے ڈردے
میریاں بھریاں جٹ کوئی وی گاہ نہیں سکدا
ڈاڈھیاں ریجھاں دے نال سودھ کے رکھے نیں میں
کوئی شریک وی میرے مرلے واہ نہیں سکدا
جنہوں سدھے رستے آپ اوہ ہادی ٹورے
کِتے وی اوہنوں کوئی کر گمراہ نہیں سکدا
سے عمراں توں ودھ خیال میں چاہیا اوہنوں
ہور کوئی میتھوں ودھ کے اوہنوں چاہ نہیں سکدا
جس دا بیڑا آپ خیالؔ اوہ ڈوبنا چاہوے
اوہدی بیڑی تار کوئی وی شاہ نہیں سکدا