غزل

اقتدار جاوید

خالی تھانواں ولدے وڈے گھمن گھیر چ توں
رات دی کالی جوہ وچ توں تے دناں دے پھیر چ توں
اکھ دی جھیت چوں تھوڑی بوہتی لشک جیہی ہک پئی
اس توں اگے انھ انھیر سی انھ انھیر چ توں
جھاتی وچ تریل دے ماری باغ بغیچے پھول
آخر مینوں نظری آیا اگ دے ڈھیر چ توں
ازل دو پاسے کِلیاں وانگر ٹھکے ہوئے
تنبو وانگر تنیا ہویا چار چفیر چ توں
وڈی سرگ نوں تارے وانگوں کنبی ساڈی جان
ساڈے پچھوں ہس ہس وسیوں سکھ سویر چ توں
کوئی اوکھت ایہوا جیہی سی سرتاں ماردی ہوئی
تھوڑی دیر ہک کنبنی لے گی تھوڑی دیر چ توں
پھل چنن دا کہڑا ویلا فجر چناں یاں کفتیں
لال چنگیر ہے پھلاں والی لال چنگیر چ توں
جھلے تینوں لبھن کارن جھلے ہو ہو جان
رات دہاڑے ڈب ڈب جاویں میری مسیر چ توں
ہر نے اپنا تھاں ٹکاناں واہ واہ لبھیا ہویا
جنگل دے وچ شیر ہکلا کلے شیر چ توں