عمران احمد قریشی ،اک بہترین قلم کار،دانشور تے عظیم انسان!

عمران ا حمد قریشی دی علمی و ادبی خدمات نوں خراج تحسین پیش کرن لئی خصوصی تحریر

اختر سردار چودھری

معاشرے، قومی یا ملک دی ترقی، افراد معاشرہ دے اندر تو ں انقلاب برپا ہونا ایہہ سب علم دی وجہ نال اے تے خوش قسمت نیں اوہ جیہڑے ترغیب علم نوں اپنی زندگی دا مشن بناندے نیں، ایہناں وچوں اک عمران احمد قریشی صاحب سن جیہڑے ہن ساڈے وچ نہیں رہے۔ تاریخ گواہ اے کہ معاشرے وچ مثبت تبدیلی ای دیرپا ہوندی اے جیہڑی عوام دے اندر رونما ہوئے۔ عوام دے اندر ایہہ تبدیلی یا انقلاب معاشرے دا سدھار بذریعہ علم ای ممکن ہویا اے۔ مثبت اقدار تے روایات علم نافع نوں دلچسپ انداز بیاں وچ بیان کرنا تے دوجیاں تیکر اپڑانا دور حاضر وچ رسائل و اخبارات دا کم اے تے ایس نال جڑے ہوئے بندے ایس دے ذمہ دار نیں۔
عمران احمد مدیر نویں افق اپنا اداریہ ہمیشہ حدیث نبوی ﷺ توں شروع کردے۔ ایہناں دا لکھیا ہویا آخری اداریہ تے سابقہ چار اداریے میرے ساہمنے پئے نیں۔ میں ایہناں دا تجزیہ کیتا اے ایہناں وچ اوہ نوجوان قلم کاراں دے اندر اک انقلاب برپا کرن نو کنہے بے چین سن۔ ایس دا اندازہ ہوندا اے ایہناں دے درجناں فقرات آب زر نال لکھن دے قابل نیں۔ اوہناں نے کئی اک وار دہرایا کہ ’’وڈا بندا بنن لئی وڈا قلم کار بنن لئی بڑی محنت دی لوڑ ہوندی اے۔‘‘ایس وچ کوئی شک نہیں کہ دنیا وچ کل تے اج وی کتاباں دی حکومت رہی اے۔ دنیا دا سدھار تے وگاڑ بوہت حد تیکر کتاباں دے مرہون منت رہیا اے۔ ایہہ ای وجہ اے کہ علم دے حصول اُتے اینا زور دتا جاندا اے۔ علم دا مطلب جاننا اے۔

اک حدیث ﷺ دا مفہوم اے کہ ’’تہاڈے وچوں بہترین مومن اوہ اے جیہڑا زمانے دی بصیرت رکھدا ہوئے‘‘ یعنی زمانے دی بصیرت جان دا ہوئے۔ زمانے دی بصیرت رکھن والا فرد ای افراد معاشرہ وچ زمانے دی بصیرت منتقل کر سکدا اے۔ عمران احمد قریشی زمانے دی آپ وی بصیرت رکھدے سن تے ایہناں دے اندر ایہہ تڑپ وی موجود سی کہ ایس بصیرت نوں نوجوان قلم کاراں دے اندر منتقل کر دتا جائے۔ ایس لئی اوہ نویں افق تے اجالا دے پلیٹ فارم توں جدوجہد جاری رکھے ہوئے سن۔ اپنے مطالعہ، مشاہدہ، خیالات و نظریات تے حاصل تجربات نوں دوجیاں تیکر اپڑان لئی درست لفظاں تے فقریاں دا استعمال، درست املا تے دل چسپ انداز بیاں دا ہونا ضروری اے۔ ایس لئی عمران احمد دی خدمات نوں نظر انداز نہیں کیتا جا سکدا۔
اسیں موجودہ ترقی یافتہ دور وچ جی رہے آں۔ ایس وچ سوشل میڈیا نے انساناں دی ایس دنیا نوں یکسر بدل کے رکھ دتا اے تے انسان باہم رابطے دے ذریعے مختلف ثقافتاں نوں گڈ مڈ ہوندا ویکھ رہے نیں۔ ایس وچ اپنی زبان تے اپنے ماحول و رسم رواجاں نوں زندہ رکھن دی جدوجہد وچ عمران احمد نیدن رات اک کر دتا۔ آپ نویں افق دے فروری کشمیر کہانی نمبر نوں ای ویکھ لوئو جیہڑا ایہناں دی زندگی دا آخری ترتیب دتا ہویا رسالہ اے۔ کشمیر بارے معلومات نوں کہانی دی صورت وچ جس نال پڑھن والا غیر محسوس انداز وچ حقائق جان لیندا اے۔ ساڈے ساہمنے ایس نمبر دے مطالعے دے بعد کشمیر دی جیہڑی صورت حال آندی اے ایہنوں درجناں کتاباں نال پورا ہیں کیتا جا سکدا۔

عمران احمد قریشی اک خدا ترس، عظیم انسان تے سن ای اک بہترین قلم کار، دانش ور وی سن۔ اوہ نویں تے پرانے لکھاریاں نال ہر ویلے رابطے وچ رہندے سن۔ لمحہ بہ لمحہ ایہناں دی راہنمائی کردے سن ۔ ایہناں دا مشن سی کہ ابھردے ہوئے قلم کاراں توں بہترین کہانیاں لکھوانا۔ عمران قریشی دا دوجا ناں اجالا تے تے نئے افق سی اوہ مسلسل زندگی دے آخری دناں تیکر علم دی روشنی ونڈدے نظر آندے رہے ۔
جدوں عمران احمد دی رحلت دی خبر سنی میں ایس سوچ وچ واں کہ ایہناں دی ادبی خدمات نوں کنج خراج تحسین پیش کراں۔ وفات دے بعد ایہناں لئی لکھاں تے کیہ لکھاں۔ دکھ تے غم دی ایس گھڑی وچ ایہناں نوں خراج تحسین پیش کراں تے کنج کراں؟ انج ای کیوں ہوندا اے کہ کسے دے مرن دے بعد ایس دے بارے وچ کالم تے خصوصی فیچر لکھے جاندے نیں۔ اسپیشل ایڈیشن کڈے جاندے نیں، ایس دی علمی و ادبی خدمات دے اعتراف اُتے خصوصی پروگرام کیتے جاندے نیں۔ ہمیشہ توں ای انج کیوں ہوندا اے۔ ایہناں دی زندگی وچ ایہناں دی خدمات دا اعتراف کیوں نہیں کیتا جاندا۔
حادثے، موتاں تے حیاتی اک دوجے دے نال باہم جڑے ہوئے تے لازم و ملزوم نیں، انسان جنہا وی کوشش کر لوے احتیاطی تدبیراں اختیار کر لوے پر اوہ تقدیر الٰہی توں بچ نہیں سکدا۔ انسان فانی اے۔ لافانی ذات صرف اللہ دی اے۔ ایس راز نوں جیہڑے جان لیندے نیں اپنی زندگی انج جیندے نیں کہ ہر ویلے موت لئی تیار رہندے نیں۔ ایہہ قانون فطرت اے جیہڑا پیدا ہویا اے اوہ مر کے رہوے گا جیہڑا قائم ہویا اے فنا ہو کے رہوے گا۔ جان والے دا غم سب نوں ہوندا اے۔ جیہڑا جنہا کسے نال جڑیا ہوندا اے ایس دا غم اینا زیادہ ہوندا اے۔ ایہہ غم وکھری شے اے غم منانا تے رب دی رضا اُتے راضی رہنا سانوں آقا ﷺ دی سنت وچ سکھایا گیا اے۔
آقائے کائنات دے فرزند ابراہیم ؓ جدوں دنیا فانی توں رخصت ہوئے تے آپ ﷺ نے ایہناں دی میت نوں گود وچ چکیا ہویا اے تے آپ ﷺ دی اکھاں توں اتھرواں دی برسات جاری ہو گئی۔ صحابہ کرامؓ نے پچھیا، یا رسول اللہ ﷺ تسیں تے پیکر صبرو ر ضا او تے آپ ؐ نے ہمیشہ صبر دی تلقین کیتی فیر ایہہ اتھرو کنج ؟ آقا ﷺ جواب دیندے نیں کہ سبر ایہہ وے زبان نال کوئی انج دی گل ہ کڈی جائے جس نال اللہ دی ناشکری ظاہر ہوئے۔ ایہہ اتھرو تے اللہ دی رحمت اے جیہڑی ایس نے اپنے بندیاں دے دل وچ پا دتی اے۔
ایہناں اتھرواں توں دل دا غبار نکل جاندا اے۔ میں سوچنا واں محترم مشتاق احمد قریشی صاحب جنہاں دی تحریراں پڑھدے ہوئے ہم جواب ہوئے اج وی ایہناں دا کالم قومی اخباراں وچ شائع ہوندا اے تے ماہنامہ نئے افق وچ دستک دے عنوان توں حالات حاضرہ اُتے لکھدے نیں۔ اوہناں نے اپنے جواب پتر دے غم نوں کنج سہیا ہوئے گا۔ ایسے طرح محترم طاہر قریشی صاحب دا خیال آندا اے جان والیاں نوں کوئی روک نہیں پایا ایہناں دے جان توں بعد اکیلے پن دا دکھ ہوندا اے، ملال ہوندا اے اک کسک جہی رہ جاندی اے۔ عمران احمد قریشی اسیں تیری جدائی دا صدمہ کنج برداشت کراں گے، دکھ تے غم دی ایس گھڑی وچ کنج دلاسہ دیاں گے۔
اپنے اپنے دکھ کی لاشیں
اپنے کندھوں پہ لادے ہوئے
ہم بیکل بیکل رہتے ہیں
اور تیری جدائی کا صدمہ
مت پوچھ کے کیسے سہتے ہیں!
ایس ویلے محترم مشتاق احمد قریشی، محترم طاہر قریشی تے عفان احمد قریشی سنے دیگر اہل خانہ لئی بلاشبہ اک بوہت وڈا صدمہ اے۔ اللہ نال دعا اے کہ مرحوم دی مغفرت فرمائے ایہناں دے درجات بلند کرے تے اہل خانہ نوں صبر جمیل عطا فرمائے۔ ایس دنیا وچ جیہڑا وی آندا اے جان لئی آندا اے۔ جان والے چلے جاندے نیں۔ پچھے رہن والیاں نوں غم دے جاندے نیں جیہڑے پچھے رہ جاندے نیں اوہ وی اک دن چلے جاندے نیں۔ ایہہ دنیا اے انج ای ہوندا آیا اے ہوندا رہوے گا۔ جان والیاں لئی ساڈی دعائواں ای ہن عمران احمد لئی کارآمد نیں۔ ایہناں دی بخشش تے اعلیٰ مقام دا باعث بن سکدیاں نیں ایس لئی سانوں سب نوں ایہناں لئی دعاواں ای کرنیاں چاہیدیاں نیں۔ اللہ تعالیٰ نال دعا اے کہ ایہناں اُتے اپنی بے شمار رحمتاں نازل فرمائے۔ اے میرے اللہ عمران احمد بھائی دے سب کبیرہ صغیرہ گناہواں نوں ایس دی مغفرت وچ بدل دے۔ یا اللہ ایہناں دی مغفرت فرمانا۔ اللہ تعالیٰ ایہناں نوں قبر دی سختیاں توں دور رکھنا، ایہناں دی قبر نوں اپنے نور نال روشن کر دینا، ایہناں دی قبر نوں اک محل وانگوں وسیع کر دینا۔ ایہناں نوں جنت دے اعلیٰ باغاں وچوں اک باغ نصیب فرمائو تے ایہناں نوں جنت الفردوس وچ عظیم مقام عطا فرمائو۔
اس وقت محترم مشتاق احمد قریشی ،محترم طاہر قریشی اور عفان احمد قریشی سمیت دیگر اہل خانہ کے لیے بلاشبہ ایک بہت بڑا
یا رب العالمین تینوں تیری غفور الرحیمی دا واسطہ۔ عمران احمد قریشی دی سب خطائواں دی بخشش فرمانا۔ ایہناں دیاں خطائواں نوں عطائواں وچ بدل دینا۔ یا اللہ مرحوم دے درجات بلند فرمانا۔ قبر و حشر دے معاملات وچ آسانی فرمائو۔ ہر قدم اُتے حضور ؐ دی مدد نصیب فرمائو۔ جنت الفردوس وچ ٹھکانا مرحمت فرمائو آمین ثم آمین۔ یا رب العالمین اللہ پاک نال دعا اے کہ عمران احمد قریشی دے اہل خانہ تے نویں افق نال منسلک ہر بندے نوں ایہناں دی جدائی دا دکھ سہن دی ہمت عطا فرمائو۔ اللہ تعالیٰ ایہناں دی مغفرت تے درجات بلند فرمائو۔ ایہناں نوں جنت الفردوس وچ اعلیٰ مقام عطا فرمائو۔ آمین ثم آمین۔۔۔!!!