’’گورپیا کوئی ہور‘‘

عتیق انور راجہ

اسیں لوک عجیب آں اینے عجیب کہ ساڈے اُتے جدوں تیکر خود توں کوئی افتاد نہیں آ پیندی اسیں کسے وبا، کسے بیماری کسے وارننگ نوں منن نوں تیار ای نہیں ہوندے۔ ویکھن وچ آیا اے کہ میرے ملک دے سارے شہری بوہت سیانے نیں ۔ ہر کسے دے کول ہر مسئلے دا نہ صرف حل ہوندا اے بلکہ ہر کوئی ہر ساہمنے آن والے مسئلے نوں ایجنسیاں، حکومتی غفلت تے عالمی سازش نال جوڑن دی کوشش کرنا وی ضروری سمجھدا اے۔ کرونا وبا دے شکنجے وچ ترقی یافتہ، ترقی پذیر سارے ملک شامل نیں۔ روز خبراں سنن نوں مل دیاں نیں کہ یورپ دے فلاں ملک وچ لاک ڈائون وچ توسیع کر دتی گئی اے۔ ساڈا گوانڈھی ملک بھارت ایس شدت نال ایس وبا دا شکار ہو چکیا اے کہ اوتھے ہر دن ہزاراں دی تعداد وچ لوک جاناں گنوا رہے نیں۔ خبراں دے مطابق اوتھے دے ہسپتالاں وچ مریضاں نوں بروقت آکسیجن نہ ملن نال بوہت موتاں ہو رہیاں نیں تے انج دی تصویراں ساہمنے آ رہیاں نیں کہ اوتھے شمشان گھاٹاں وچ مردے ساڑن لئی لکڑی، ویلا تے تھاں تیکر گھٹ پئے گئی اے۔ فیر دو دن پہلے سعودی حکومت نے اپنے ملک آن جان والے بیرونی شہریاں دے حوالے نال سخت احکامات جاری کیتے نیں۔
برطانیہ ولوں پاکستانی شہریاں دے بارے خاص فیصلہ ساہمنے آیا تے ساڈے کجھ لوک غصے وچ آ ئے تے کجھ نے ایس فیصلے نوں کمزور حکومتی وجہ قرار دتا پر حقیقت ایہو اے کہ ساڈے لوکاں نے احتیاط کرنا ضروری نہیں سمجھیا جس دی وجہ نال کرونا ہولی ہولی فیر توں میرے ملک وچ پنجے گاڑ چکیا اے۔ جدوں توں ہفتے وچ دو دن لاک ڈائون دا حکم نامہ جاری ہویا اے اودوں توں ساڈی انتظامیہ دی ہر کوشش توں بعد لوک ایس لاک ڈائون دی خلاف ورزی کردے ویکھے گئے نیں۔ ساڈے لوک پولیس دی یا تے گل نہیں من دے یا فیر پولیس والیاں نوں کسے نہ کسے طور راضی کر کے اپنی دکاناں ویلے دے بعد وی کھلی رکھن وچ کامیاب ہو جاندے نیں۔ پچھلے کئی ہفتیاں توں اک پاسے بازاراں وچ عید دی خریداری لئی عوام دا رش ودھ چکیا سی تے دوجے پاسے شہریاں نے ماسک پانا وی چھڈ دتا اے۔ خواتین دی گل کیتی جائے تے خواتین ماسک پان نوں بالکل تیار نہیں آندی جدوں کدھرے کجھ سختی ہوندی اے تے اوہ اپنے دوپٹے نوں نک منہ اُتے لپیٹ کے ماسک دا کم چلا لیندیاں نیں۔ یعنی ایہہ کہیا جا سکدا اے کہ ہجے تیکر ساڈی قومی سوچ کرونا ایس او پیز اُتے عمل کرن نوں تیار نہیں ہو سکی۔ ہن جد کہ کرونا وچ شدت آ چکی اے تے جاری لاک ڈائون وچ سختی لئی حکومت نے فوج تے رینجر دی خدمات حاصل کر لئی اے تے ایس نال کرونا ایس او پیز اُتے عمل داری وچ یقینا بہتری آئے گی۔ فوج دے سڑکاں اُتے آن نال یقینی طور اُتے لوک ماسک پان گے تے مارکیٹاں وی ویلے اُتے بند ہونا شروع ہو جان گیاں۔ پر اصل نقطہ تے ایہہ وے کہ کسے طرح لوکاں نوں سمجھایا جائے کہ صاحبو کرونا اک حقیقت اے۔ ایہہ صرف اک افواہ نہیں بلکہ ایہہ اک وبا اے جس نے ساری دنیا نوں متاثر کیتا ہویا اے۔ ایس توں بچن دا واحد حل احتیاط اے۔ احتیاط انج دی کہ بغیر ضرورت گھراں توں باہر نہ نکلیا جائے۔ جے باہر نکلنا ضروری ہوئے تے ماسک نال نک منہ کَج کے نکلیا جائے۔ لوکاں نال ہتھ ملان تے گلے ملن دی بجائے دور دور توں ای سلام دعا کر لئی جائے۔ بخار یا کھانسی دی صورت کسے مستند ڈاکٹر توں چیک اپ کروایا جائے۔ گرم پانی دا استعمال زیادہ توں زیادہ کیتا جائے تے کھنگدے ویلے منہ اُتے رومال رکھنا فرض سمجھ لیا جائے۔ پوری دنیا وچ روزانہ جیہڑے ہزاراں لوک کرونا دی وجہ نال مر رہے نیں ایہناں دی وجہ موت توں سبق لیندے ہوئے احتیاط دا ہر صورت خیال کیتا جائے۔ دوجیاں نوں وینٹی لیٹر اُتے ویکھ کے سبق سکھ لینا چاہیدا اے کہ تھوڑی جہی لاپروائی نال ایس تھاں اسیں وی اپڑ سکنے آں۔ کرونا دی وجہ نال کسے دوجے دا جنازہ جاندے ہوئے خیال دل وچ آ جانا چاہیدا اے کہ ایہہ وبا ساڈی وی جان دی دشمن بن سکدی اے۔ ’’گور پیا کوئی ہور ‘‘جہی سوچ توں نکل کے اپنی جان بچانا فرض سمجھدے ہوئے کرونا ایس او پیز اُتے عمل کیتا جائے۔ اللہ نہ کرے کہ کرونا پاکستان وچ فیر توں بے لگام ہو جائے تے حکومت نوں مکمل لاک ڈائون لانا پئے ساڈے لوکاں وچ اینی سکت نہیں کہ زیادہ دن گھراں وچ رہ کے اپنے اخراجات پورے کر سکن۔