شوگر سکینڈل اُپر کپتان ڈٹ گیا

تحریر ،اکرم عامر سرگودھا

ملک وچ 25جولائی 2018ء نوں ہون والے انتخابات دے نتیجے وچ پی ٹی آئی دی حکومت برسر اقتدار آئی تے عمران خان ملک دے کپتان بنے، تے جہانگیر خان ترین نوں کپتان دا نیڑی ساتھی ہون دی بنا اُتے سیاسی حلقیاں اُتے بیورو کریسی وچ سیکنڈ وزیراعظم قرار دتا جان لگیا، کپتان دے بعد جہانگیر خان ترین دے ہر فرمان نوں حکومتی مشینری دے ہر طبقے وچ شاہی فرمان دا درجہ حاصل سی، انج لگ رہیا سی کہ ملک وچ اک نہیں دو وزیراعظم نیں، وفاق، پنجاب، سنے صوبیاں وچ اہم عہدیاں اُتے سرکاری افسران دی تعیناتیاں جہانگیر ترین دی مشاورت نال ہوندیاں سن، رکن پارلیمنٹ نہ ہون دے باوجود جہانگیر ترین کابینہ دے اجلاساں وچ شریک ہوندے تے ایہناں دی ہر رائے نوں کپتان سنے کابینہ دی اکثریت ترجیح دیندی سی، کیوں جے وفاق وچ عمران خان نوں وزیراعظم تے پنجاب وچ عثمان بزدار نوں وزیراعظم بنوان وچ جہانگیر ترین تے ایہناں دے طیارے دا اہم کردار سی، جہانگیر ترین تے ایہناں دے طیارے دی بدولت 2018 دے الیکشن وچ ملک توں آزاد جتن والے ارکان قومی اسمبلیز تے ارکان پنجاب اسمبلیز دی اکثریت نے کپتان دے کارواں وچ شمولیت اختیار کیتی سی، جس پاروں پی ٹی آئی ملک وچ سندھ دے علاوہ وفاق، دیگر صوبیاں وچ حکومت بنان وچ کامیاب ہوئی، جہانگیر خان ترین دی ملکی سیاست تے اداریاں وچ ودھدی ہوئی مداخلت اُتے جنوبی پنجاب دے کجھ سیاست دان ایہناں توں نالاں سن، جہڑے جہانگیر ترین نوں کپتان توں دور کرن لئی کم کرن لگے، جنوبی پنجاب دے ایس سیاسی گروپ تے جہانگیر ترین تے ایہناں دے حامیاں وچ محاذ آرائی دا سلسلہ عروج اُتے سی کہ وزیراعظم عمران خان دی تشکیل کردہ جے آئی ٹی نے شوگر سکینڈل دی انکوائری رپورٹ وزیراعظم عمران خان نوں پیش کر دتی۔ جس وچ حکومت تے اپوزیشن دی کئی قد آور شخصیات دے ناں ساہمنے آئے تے کپتان عمران خان نے شوگر سکینڈل وچ ملوث شخصیات دا احتساب بلا امتیاز کرن دا اعلان کردتا، پر نامعلوم وجوہ دی بنا ء اُتے فائل 11 مہینے تیکر دفتر وچ دبی رہی، اچانک ایس سال دے ابتداء وچ شوگر سکینڈل بابت جے آئی ٹی دی رپورٹ اُتے پیش رفت ہوئی تے جہانگیر خان ترین ایہناں دے پتر علی ترین تے ساتھیاں دے خلاف ایف آئی اے نے دو مقدمے درج کر لئے، جد کہ اپوزیشن لیڈر شہباز شریف دے خلاف اک مقدمہ درج ہویا، جہانگیر ترین ایہناں دے پتر تے ساتھیاں نے اپنے خلاف درج ہون والے مقدمیاں وچ عدالت توں عبوری ضمانت کرا رکھی اے، دوجے پاسے جہانگیر ترین دے ساتھیاں نے پی ٹی آئی وچ پریشر گروپ قائم کر لیا اے، جس وچ ہن تیکر 11 ارکان قومی تے 22 ارکان صوبائی اسمبلی کھل کے جہانگیر خان ترین دی حمایت وچ ساہمنے آ گئے نیں، بقول سیاسی ذرائع بوہت سارے ارکان قومی و صوبائی اسمبلیز تے وزراء، جہانگیر تین تے باغی گروپ نال رابطے وچ نیں، پی ٹی آئی دا پریشر گروپ جہانگیر ترین نوں مظلوم قرار دے کے ایہنوں انصاف دلوان لئی کوشاں تے، تے ایس پریشر گروپ نے وزیراعلیٰ پنجاب دے خلاف عدم اعتماد دی تحریک لیان لئی پیپلز پارٹی، مسلم لیگ ن تے ق لیگ دی قیادت نال گل کرن دا عندیہ دتا تے حکومت دی صف وچ شامل ملاقات کیتی، پر ایس ملاقات وچ جہانگیر ترین دا شامل نہ ہونا بوہت سارے سوال پیدا کر رہیا اے؟مخالف ذرائع کہہ رہے نیں کہ وزیراعظم عمران خان جہانگیر ترین توں ناراض نیں تے ایسے بنا اُتے باغی ارکان اسمبلیز نوں جہانگیر ترین نوں نال لیان توں روکیا گیا سی، جد کہ پریشر گروپ دے ارکان اسمبلی دے ذرائع کہندے نیں کہ اک حکمت دے تحت جہانگیر ترین نوں وزیراعظم نال ملاقات لئی نال نہیں لے کے گئے، جے جہانگیر ترین نوں نال لے کے جاندے تے تاثر پیدا ہوندا کہ جہانگیر ترین عمران خان نال ڈیل کرن گئے سن، ذرائع کہندے نیں کہ جہانگیر ترین دے حامی ارکان اسمبلیز (پریشر گروپ) نے عمران خان نوں باور کرایا کہ جہانگیر ترین دے نال زیادتی ہو رہی اے، ایہہ 10 سال پرانا معاملہ اے جس دے مقدمے ہن درج ہوئے نیں، وفد نے پی ٹی آئی لئی جہانگیر ترین دی خدمات تے فنڈنگ بارے وی کپتان نوں جتلایا تے دسیا تے جہانگیر ترین دے خلاف انکوائری روکن تے دوبارہ انکوائری کمیشن بنان دی استدعا کیتی، ذرائع کہندے نیں کہ کپتان نے جہانگیر ترین دے حامی ارکان اسمبلیز نوں واضح کہیا کہ اوہ اصولاں دی سیاست اُتے سمجھوتہ نہیں کرن گے، نہ تے دوبارہ انکوائری لئی کمیشن بنے گا تے نہ ای ایف آئی اے وچ جاری شوگر سکینڈل دی انکوائری روکی جائے گی اداریاں نوں آزادی توں اپنا کم کرن دین گے، ایس گل دا اظہار عمران خان نے برملا الیکٹرانک و پرنٹ میڈیا دے ذریعے وی کیتا کہ احتساب بلاامتیاز ہوئے گا، ایسے تناظر وچ ڈائریکٹر ایف آئی اے پنجاب ڈاکٹر رضوان نوں تحقیقاتی ٹیم دی سربراہی جاری رکھن دا حکم دیندے ہوئے انکوائری مکمل کرن دی ہدایت کیتی اے، یاد رہوے کہ ڈاکٹر محمد رضوان دی پنجاب پولیس توں ایف آئی اے تیکر شہرت قابل رشک اے، تے ایہناں دا شمار ایماندار تے دبنگ افسراں وچ ہوندا اے، تے اوہ کسے سیاسی یا غیر سیاسی دے دبائو وچ نہیں آندے، سو ہن وفاقی وزیر خسرو بختیار وی ایف آئی اے دے ریڈار اُتے نیں، ایس طرح کپتان نے جہانگیر ترین دے حامی پریشر گروپ دے ارکان نوں ’’کورا‘‘ جواب دتا اے، انج آن والے ویلے وچ کپتان نوں اپوزیشن دی (پی ڈی ایم ) دے نال پی ٹی آئی وچ موجود جہانگیر ترین دے حامی ارکان اسمبلیز دی وی مخالفت دا وی امکان اے، جیہڑا کپتان کس حد تیکر برداشت کر سکن گے ایہہ کہنا قبل از وقت اے سیاسی ذرائع کہندے نیں کہ جہانگیر ترین دے نال ہن ایہناں دے حامی ارکان اسمبلیز دے وی کڑے امتحان دا ویلا آ رہیا اے، چونکہ مطالبات تسلیم نہ ہون دی صورت وچ جہانگیر ترین دے حامی ارکان اسمبلیز نے وزیراعلیٰ پنجاب عثمان بزدار دے خلاف عدم اعتماد دی تحریک لیان دا عندیہ دتا سی جس دی کامیابی دی صورت وچ وزیراعظم دے خلاف عدم اعتماد دی تحریک لیان دی بڑھک ماری سی، بالکل ایسے طرح جس طرح پی ٹی آئی دی حکومت دےبرسر اقتدار آن اُتے اپوزیشن نے (پی ڈی ایم) بنا کے حکومت نوں للکاردے ہوئے ضمنی و سینٹ الیکشن دے بائیکاٹ، اپوزیشن دے ارکان اسمبلیز دے پی ڈی ایم دے پلیٹ فارم توں استعفےٰ، تے لانگ مارچ دا اعلان کیتا گیا سی پر حکومت دے پس پردہ شخصیات نے انج دی چال چلی کہ پیپلز ارٹی تے اے این پی نے پی ڈی ایم توں علیحدگی اختیار کر لئی اے تے پی ڈی ایم دے عہدیاں توں وی استعفےٰ دےدتے نیں۔ پی ڈی ایم بنن نال ہن تیکر خود ڈانواں ڈول تے اک دوجے نوں سنبھالدی رہی اے۔ ایہو وجہ اے کہ پی ڈی ایم دی قیادت پوری تحریک دے دوران ہن تیکر کسے مرحلہ اُتے وی کسے اک ایجنڈے اُتے متفق نظر نہ آئی تے ہر ایشو اُتے پی ڈی ایم نوں بار بار یوٹرن لینا پیا۔
سو گل کتھوں کتھے نقل گئی گل ہو رہی جہانگیر ترین دی حمایت وچ بنن والے ارکان قومی و صوبائی اسمبلیز دے پریشر گروپ دی جس دی وزیراعظم عمران خان نال ملاقات بے نتیجہ نظر آ رہی اے ویکھنا ایہہ وے کہ ہن ایہہ پریشر گروپ پی ٹی آئی وچ رہندا اے یا علیحدگی اختیار کر کے فاورڈ بلاک بنا کے اپوزیشن دے نال مل کے کردار ادا کردا اے تے اپنے اعلان دے مطابق اپوزیشن جماعتاں نوں نال ملا کے پہلے وزیراعلیٰ پنجاب عثمان بزدار دے خلاف عدم اعتماد دی تحریک لیان دا اعلان کدوں کردا اے؟ ویکھنا ایہہ وی اے کہ حکومت اپنی پارٹی دے باغی ارکان اسمبلیز نوں وزیراعلیٰ پنجاب دے خلاف عدم اعتماد لیان توں روکن لئی ایہناں نوں کس طرح رام کردی اے؟ کیوں جے پی ٹی آئی وچ جہانگیر ترین دا حامی پریشر گروپ نے وزیراعلیٰ ، پنجاب دے خلاف عدم اعتماد منظور ہون دی صورت وچ وزیراعظم دے خلاف عدم اعتماد دی تحریک لیان دا اعلان کر رکھیا اے، تاں ایہہ کہنا قبل از وقت ہوئے گا کہ کون کنہوں زیر کرے گا؟ پر ایہہ گل واضح اے کہ حکومت وچ شامل جنوبی پنجاب نال تعلق رکھن والی مٹھی بھر سیاسی شخصیات دا گروپ کجھ عرصہ توں ملک دے سیکنڈ وزیراعظم اکھوان والے جہانگیر ترین اُتے بھاری ثابت ہو رہیا اے ایہو وجہ اے کہ جہانگیر ترین اپنی ای پارٹی دی حکومت دے دور وچ اپنی بقاء دی جنگ لڑ رہے نیں تے کپتان توں انصاف منگ رہے نیں، حالانکہ شوگر سکینڈل عدالت وچ زیر سماعت اے تے ہن سزا جزا دا تعین وی عدالت نے کرنا اے۔