کرونا توں بچنا اے تے ویکسین لگوائو

عتیق انور راجہ

پروفیسر ڈاکٹر محمد انور چوہدری دا مسیج آیا کہ راجہ صاحب برائے کرم لوکاں دی آگاہی لئی اک کالم لکھو تے ایہناں نوں دسن دی کوشش کرو کہ نہ صرف کرونا نوں اک حقیقت سمجھنا شروع کرن بلکہ ایس توں بچائو لئی ویکسین وی لگوانا شروع کرن۔ قارئین دی اطلاع لئی دسدا چلاں کہ پروفیسر ڈاکٹر محمد انور چوہدری جنرل ہسپتال لہور وچ پنجاب انسٹی ٹیوٹ آف نیورو سرجری دے ہیڈ آف ڈیپارمنٹ نیں۔ مینوں اج توں کوئی 17 سال پہلے دا اوہ دن یاد اے جدوں ساڈی اماں جی نوں فالج تے برین ہیمرج ہویا سی دو دن اتفاق ہسپتال والیاں نوں بھاری فیساں دین توں بعد وی ایس ہسپتال دا کوئی مستند ڈاکٹر والدہ نوں ویکھن تشریف نہ لیایا تے کسے مہربان دے مشورے اُتے اسیں اپنی والدہ نوں جنرل ہسپتال لے گئے سن۔جہاں ڈاکٹر انور چوہدری دے اک کامیاب اپریشن دے بعد والدہ صاحبہ دو بارہ زندگی ول واپس آن۔ ایس دے بعد اک دوبارہ فیر والدہ نے سر درد دی شکایت کیتی تے اسیں فیر توں ڈاکٹر انور چوہدری ول ای نسے۔ ایس دوران میری ڈاکٹر نال دو تن ملاقاتاں ای ہو سکی سی۔ پر ایہناں نال جدوں وی ملاقات ہوئی ایہناں دے رویے تے انداز گفتگو نے بوہت متاثر کیتا۔ ہن توں کجھ مہینے پہلے حسن جلیل نے دسیا چاچو جی ڈاکٹر انور چوہدری تے ایہناں دی اہلیہ نوں بوہت شدید کرونا ہویا اے تسیں ایہناں دی جلد صحت یابی لئی بوہت کردے رہیے گا۔ ہن جدوں ڈاکٹر صاحب نال گل ہوئی تے اوہناں  نے تفصیل نال اپنی بیماری، بیماری داعلاج تے احتیاطی تدبیراں دے حوالے نال معلومات فراہم کیتی۔ ڈاکٹر صاحب نے دسیا کہ ایہناں نوں ایہناں دی گھر والی نوں پچھلے سال نومبر وچ کرونا پازیٹو دسیا گیا۔ کرونا دا ایہہ حملہ اینا شدید سی کہ 10 دن تیکر آپ نوں آکسیجن دے سہا رے اپنی ساہ بحال رکھنی پئی، ست کلو وزن گھٹ ہو گیا۔ کجھ عرصہ اوہناں نے مخصوص دوائیاں دا استعمال جاری رکھیا تے اللہ نے ایہناں نوں ایس وبائی مرض توں مکمل شفا دے دتی تے بعد وچ اوہناں نے شعبہ صحت دے اک طالب علم دی جان بچان لئی اپنا پلازمہ وی عطیہ جس نال اوہ مریض صرف دو دن وچ ای مکمل صحت یاب ہو گیا۔ڈاکٹر صاحب نے مزید دسیا کہ جویں ای ملک وچ ویکسین دی سہولت دستیاب ہوئی تے اوہناں نے پہلی فرصت وچ ویکسین دی دونویں ڈوز لگوا لیاں۔ ہن آپ روٹین وچ اپنی سروسز دے رہے نیں تے ہر دن ہسپتال تے کلینک وچ بلاجھجک کرونا پازیٹو مریضاں دا علاج کر رہے نیں۔ کرونا توں بچن لئی اینٹی بائیٹک دوائیاں دے استعمال نال ہن ایہناں نوں کسے قسم دا کوئی مسئلہ نہیں۔ ڈاکٹر صاحب اصل نقطے ول اشارہ کردے ہوئے دسے رہے سن کہ میرے ولوں سارے ہیلتھ ورکرز نوں کہو کہ اپنی تے اپنیاں دی زندگی محفوظ رکھن لئی پہلی فرصت وچ کرونا ویکسین لگوان دی کوشش کرو۔ڈاکٹر صاحب وڈے دکھ نال دسدے نیں کہ اوہ حیران نیں کہ عام لوک تے اک پاسے ساڈے ڈاکٹر وی کرونا وسیکین لگوان دے بارے وچ سنجیدگی دا مظاہرہ نہیں کر رہے نیں۔ آپ دا کہنا اے کہ جے ویکسین نہیں لگوائی جاندی تے نوجواناں وچ کرونا توں موت دی شرح دو تن جد کہ وڈی عمر دے لوکاں وچ ایہہ تناسب پنج توں اٹھ فیصد تیکر جا اپڑدا اے۔ ڈاکٹر صاحب دا ایہہ وی کہنا اے کہ اک وار کرونا ویکسین کورس مکمل ہو جان توں بعد ایس بیماری نال موت دے چانسز نہ ہون دے برابر رہ جاندے نیں۔ پورے ملک دے ہیلتھ ورکرز تے 50 سال توں وڈی عمر دے مرد و خواتین نوں ایہہ ویکسین لگوا لیندی چاہیدا اے۔ہن ویکھیا گیا اے کہ 50 توں اُتے دے بوہر سارے مرد حضرات ویکسین لگواندے ہوئے سوشل میڈیا اُتے اپنی تصویراں شیئر کر رہے نیں پر ہجے تیکر کسے خاتون دی ویکسین لگواندے ہوئے تصویر ویکھن نوں نہیں ملی لگدااے کہ میرے ملک دی خواتین دی عمراں 50 توں اُتے ہین ای نہیں۔
اپنے پچھلے کالم وچ وی ایسے مرض دے بارے وچ لکھیا سی تے لوکاں نال ویکسین لگوان دی گل کیتی سی۔ جس دن کالم شائع ہویا ایس دن اک خیر خواہ ملن چلا آیا تے ایس نے بڑی فکر مندی نال کہیا راجہ صاحب ویکسین نہ لگوانا۔ فیر آپ ای کہیا کہ ویکسین لگوان نال انسانی جسم وچ خون جم جاندا اے تے سنیا اے کہ کجھ موتاں وی ایسے وجہ نال ہوئیاں نیں۔ اپنی قوم دی سوچ نوں بدلن لئی سانوں پتہ نہیں کنہے کالم لکھنے پین گے۔ کنہے ڈاکٹراں نوں اپنی زندگیاں مشکل وچ پا کے لوکاں دا علاج کرنا پئے گا۔لوکاں دی بہتر رہنمائی لئی سرکار نوں چاہیدا اے کہ نہ صرف الیکٹرانک میڈیا، سوشل میڈیا بلکہ مسیتاں وچ آئمہ کرام تے خطباء عظام نوں وی کہن کہ خدارا! لوکاں نوں دسو کہ ویکسین ای کرونا توں بچائو دا واحد حل اے۔