شہباز نہ کر سکے پرواز

تحریر محمد اکرم عامر سرگودھا

ملک وچ اپوزیشن جماعت مسلم لیگ ن دے سپہ سالار میاں شہباز شریف جدوں عدالت دے حکم اُتے اٹھ ہفتے لئی علاج کران دی غرض نال بیرون ملک جان لئی لہور ایئر پورٹ اپڑے تے شہباز شریف اوتھے پہلے توں موجود ایف آئی اے لہور دی ٹیم نوں ویکھ کے ششدر رہ گئے، موصوف ہجے ایس بارے سوچاں وچ گم سن کہ ایف آئی اے دی ٹیم نے ایہناں نوں دسیا کہ آپ دا ناں بلیک لسٹ وچ شامل اے ایس لئی تسیں بیرون ملک نہیں جا سکدے۔ ایس طرح شہباز شریف بیرون ملک جا کے اپنے وڈے بھرا میاں نواز شریف نوں ملن دی خواہش لئے ایئر پورٹ توں واپس ماڈل ٹائون اپڑ گئے، مسلم لیگ ن دی قیادت میاں شہباز شریف نوں بیرون ملک جان توں روکن نوں توہین عدالت قرار دے رہی اے جد کہ حکومت کہندی اے کہ بلیک لسٹ توں ناں کڈن دا اختیار صرف ایف آئی اے دے ڈائریکٹر جنرل نوں حاصل اے، جے حکومت دی گل درست من لئی جائے تے ماضی وچ کئی شخصیات عدالت عالیہ، یا عدالت عظمیٰ، دی اجازت اُتے بیرون ملک کیوں گئے، جنہاں وچ سرفہرست میاں نواز شریف وی شامل نیں جیہڑے تن ہفتیاں لئی علاج دی غرض نال بیرون ملک گئے سن پر واپسنہ آئے تے ہن ہر تاریخ پیشی اُتے نواز شریف دے وکیل عدالت وچ ایہناں دے غیر ملکی ڈاکٹر دا جاری کردہ میڈیکل پیش کر کے التوا منگدے نیں تے ایہہ کھیڈ کئی مہینے توں جاری اے۔ عدالت نے میاں نواز شریف نوں غیر حاضری اُتے اشتہاری وی قرار دے رکھیا اے تے ایہناں دے وارنٹ وی جاری کر رکھے نیں، وفاقی حکومت نے کجھ مہینے پہلاں انٹرپول دے ذریعے میاں نواز شریف نوں وطن واپس لیا کے قانون دے کٹہرے وچ کھڑا کرن دا اعلان کیتا سی پر ناجانے ایس مسئلے اُتے حکومت نے فیر چپ کیوں سادھ لئی ایہہ اوہ سوال اے جیہڑا ہر سیاسی شعور رکھن والا شہری کر رہیا اے؟
دوجے پاسے میاں نواز شریف دی بیرون ملک سرگرمیاں سوشل میڈیا دی زینت بن دیاں رہندیاں نیں تے اوہ میاں نواز شریف، اپوزیشن دے اجلاساں نال خطاب دے علاوہ بیرون ملک دوست احباب دی محفلاں وی اٹینڈ کردے سوشل میڈیا اُتے ویکھے جاندے نیں جد کہ حکومت نواز شریف دی راہ تک رہی اے کہ اوہ کدوں وطن واپس آ ن گے، حکومتی وزیر میاں نواز شریف اُتے کڑی تنقید کر رہے نیں تے ایہناں نوں بھگوڑا تیکر قرار دے رہے نیں جد کہ مسلم لیگ ن دی قیادت کہندی اے کہ میاں نواز شریف صحت یاب ہوندے ای وطن واپس آن گے پر سیاسی ذرائع کہندے نیں کہ موجودہ ملکی سیاسی حالات میاں نواز شریف لئی ساز گار نہیں اوہ کسے صورت وی کپتان دی حکومت وچ وطن واپس نہیں آن گے تے جے نواز شریف وطن واپس آن دی غلطی کرن گے تے ایہناں نوں سدھی جیل یاترا کرنا پئے گی۔
ہن میاں شہباز شریف وی علاج دی غرض نال اٹھ ہفتے لئی مشروط طور اُتے بیرون ملک جانا چاہ رہے سن کہ ایہناں نوں ایف آئی اے نے پرواز کرن توں پہلے ای ایئر پورٹ اُتے روک لیا اے۔ اپوزیشن خاص طور تے مسلم لیگ ن دی قیادت ایہناں نوں حکومت وقت دی انتقامی کاروائی قرار دے رہی اے تے کہہ رہی اے کہ نیب ولوں شہباز شریف دے خلاف کک بیکس دے شواہد نا ملن دا اعتراف کیتا گیا، جس اُتے عدالت نے ایہناں نوں بیرون ملک جان دی اجازت دتی، شہباز شریف دے اکائونٹس وچ پیسیاں دے آن دا عنصر وی نہیں پایا گیا، ماڈل ٹائون دا گھر نصرت شہباز دے ناں اے، ثبوتاں دے بغیر شہباز شریف اُتے کیس بنایا گیا، مسلم لیگ ن دی خاتون رہنما مریم اورنگ زیب نے تے ایتھوں تیکر کہہ دتا کہ حکومت نے بوکھلاہٹ وچ شہباز شریف دا ناں دہشت گرداں والی بلیک لسٹ وچ شامل کر دتا جد کہ حکومتی وزراء کہندے نیں کہ میاں شہباز شریف وی اپنے بھرا وانگوں ملک فرار ہونا چاہندے نیں، حکومت نے عدالت عالیہ لہور ہائیکورٹ دے میاں شہباز شریف دے بیرون ملک جان دی اجازت دین دے فیصلے نوں عدالت عظمیٰ وچ چیلنج کرن دا اعلان کیتا اے۔
اپوزیشن کہندی اے کہ اوہ میاں شہباز شریف نوں بیرون ملک جان توں روکن اُتے حکومت دے خلاف توہین عدالت دی درخواست دائر کرے گی،انج حکومت تے مسلم لیگی قیادت آپس وچ اک دوجے اُتے کڑی تنقید کر رہی اے، ایسے نوعیت دا ماحول کجھ دن پہلاں تیکر پی ڈی ایم تے حکومت دے وچکار سی پی ڈی ایم نے حکومت نوں ٹف ٹائم دین لئی پہلے ضمنی، فیر سینٹ دے انتخابات دے بائیکاٹ، فیر اسمبلیاں توں اپوزیشن دے ارکان اسمبلیز دے مشترکہ استعفیاں، تے 26 مارچ نوں اسلام آباد وچ لانگ مارچ دا اعلان کیتا پر نادیدہ قوتاں نے انج دا کھیڈ کھیڈیا کہ پی ڈی ایم دا اتحاد تار تار ہو گیا تے اپوزیشن دے اتحاد وچ شامل پاکستان پیپلز پارٹی تے اے این پی، پی ڈی ایم توں وکھری ہو گئیاں۔ تے ایہناں دونواں جماعتاں نے پی ڈی ایم دے عہدیاں توں وی استعفےٰ دے دتے جس اُتے پی ڈی ایم نوں حکومت مخالف تحریک دے ہر اعلان توں یوٹرن لینا پیا۔ ایس طرح باقی بچ جان والی پی ڈی ایم اپنا مطلوبہ ٹارگٹ تے پورا نہ کر پائی پر سیاسی ذرائع کہندے نیں کہ اپوزیشن دے اتحاد پی ڈی ایم توں پاکستان پیپلز پارٹی نے خوب سیاست کیتی تےاپوزیشن دی مدد نال اسلام آباد دی سینٹ دی سیٹ جت کے حکومتی سینٹرز دی مدد نال یوسف رضا گیلانی نوں سینٹ وچ اپوزیشن لیڈر بنوا لیا۔ انج دا ملکی سیاسی تاریخ وچ پہلی وار ہویا اے کہ اپوزیشن لیڈر نوں نامزد کرن وچ حکومتی جماعت دے سینیٹرز نے اپوزیشن لیڈر دی تائید کیتی ہوئے حالانکہ سینٹ دے ایوان وچ مسلم لیگ ن دوجی وڈی سیاست جماعت اے تے سینٹ وچ اپوزیشن لیڈر شپ مسلم لیگ دا حق سی۔
سو گل کتھوں کتھے نکل گئی گل ہو رہی سی میاں شہباز شریف دے عدالت عالیہ دے حکم اُتے علاج لئی اٹھ ہفتیاں لئی بیرون ملک جان دی، پر کپتان تے ایہناں دی ٹیم ایہناں نوں بیرون ملک جان نہیں دینا چاہندی، کیوں جے تن ہفتے لئی علاج لئی جان والے میاں نواز شریف ملک واپس نہیں آ رہے تے ہن جے شہباز شریف وی چلے جاندے نیں تے فیر اوہ وی بیرون ملک توں بہہ کے میاں نواز شریف وانگوں حکومت اُتے گرجن برسن گے، ایسے تناظر وچ حکومت نے میاں شہباز شریف نوں بیرون ملک جان توں روک کے عدالت عالیہ ہائیکورٹ دے فیصلے دے خلاف عدالت عظمیٰ وچ اپیل کرن دا فیصلہ کیتا اے جد کہ مسلم لیگ ن حکومت دے ایس اقدام دے خلاف توہین عدالت دائر کرے گی ، ایسے طرح حکومت تے اپوزیشن دے مابین قانونی جنگ شروع ہون جا رہی اے ویکھنا ایہہ وے کہ ایہہ جنگ کون جت دا اے؟ ایس لئی قارئین نوں تھوڑا انتظار کرنا ہوئے گا۔