اکادمی ادبیات پاکستان ولّوں عالمی عید ملن مشاعرہ

پاکستان چائنا اکنامک کاریڈور توں بعد ڈاکٹر خشک دی کوششاں نال پاک چائنا لٹریری کا ری ڈور ممکن ہو سکیا اے، ڈاکٹر وحید احمد

رپورٹ: آفاق بٹ

اکادمی ادبیا ت پاکستان دے زیر اہتمام آن لائن عالمی عید ملن مشاعرہ منعقد ہویا۔ صدارت ڈاکٹر وحید احمد (اسلام آباد) نے کیتی۔ سورج نارائن(کوہاٹ)، منصور آفاق(لاہور)، صابر رضا(مانچسٹر)اور غضنفر ہاشمی (امریکہ) مہمانان خصوصی سن۔ ڈاکٹر شائستہ نزہت (لاہور)، اعجاز کنورراجہ(لاہور)، سعد اللہ شاہ (لاہور)، کبیر اطہر(رحیم یار خان)، الطاف بخاری(امریکہ)، محسن شکیل(کوئٹہ)، علی ارمان(برطانیہ)، شفقت اللہ مشتاق(بہاولنگر) تے عارف افضل عثمانی مہمانان اعزاز سن۔ڈاکٹر یوسف خشک، چیئرمین، اکادمی ادبیات پاکستان ،نے ابتدائیہ پیش کیتا۔ مشاعرے وچ ملک بھر تے بیرون ملک توں شعراء کرام نے اپنا کلام پیش کیتا۔ نظامت شہزاد بیگ نے کیتی۔ ڈاکٹر یوسف خشک، چیئر مین، اکادمی ادبیات پاکستان نے ابتدائیہ پیش کردے ہوئے سارے ملکی تے غیر ملکی شعراء دا اکادمی ولوں بطور چیئر مین شکریہ ادا کیتا کہ اوہناں نے اکادمی دی دعوت نوں قبول کیتا تے ایس مشاعرے وچ شرکت کیتی۔ اوہناں نے کہیا کہ خاص طور تے رمضان المبارک دے مہینے وچ عالمی حمدیہ تے نعتیہ مشاعرے منعقد کیتے جس وچ اردو زبان دے نال پنجابی، سندھی، پشتو، پوٹھوہاری،سرائیکی، بلوچی، براہوئی، ہندکو، کشمیری، کھوار،گوجری پہاڑی، وخی، شینا ،بروشسکی تےبلتی وچ وی حمدیہ و نعتیہ مشاعرے پورے رمضان وچ منعقد کیتے گئے۔ ایس توں بعد خواتین دا عالمی حمدیہ و نعتیہ مشاعرہ منعقد ہویا تے اج تہاڈے اکابرین علم و دانش دی شفقت، محبت تے تعاون دی بدولت ای اکادمی نے عید ملن عالمی مشاعرے دا انعقاد کیتااے۔اوہناں نے کہیا کہ ایس وچ کوئی شک نہیں کہ پچھلے اک سال توں ایہہ دنیا جس طرح کووڈ دا ساہمنا کر رہی اے جس وچ پاکستان وی شامل اے تے ہن ایس وبا دی تیجی خطرناک لہر نال اسیں لوک نبرد آزما واں۔ ایس توں پہلاں لوکاں نے ایس طرح دی وبا دا ساہمنا نہیں کیتا سی۔

میں خراج تحسین پیش کرنا واں ایہناں ادیباں، شاعراں تے اہل قلم حضرات نوں جنہاں دے ہتھ وچ قلم سی اوہناں نے مایوس کن صورتحال وچ جس وچ پورا معاشرہ انتہائی بے چینی دی کیفیت وچ مبتلا سی ساڈے ایہناں انسان دوست اہل قلم نے معاشرے وچ وبا دے خلاف ہر اول دستے دا کردار ادا کیتا۔ اوہناں نے قلم دے ذریعے اپنی شاعری، مضامین تے کالماں دے ذریعے نہ صرف لوکاں دا حوصلہ ودھا بلکہ ایہناں وچ جین دی امنگ پیدا کیتی۔ ساڈے اہل قلم نے سماج وچ اپنی خدمات انجام دین والے ڈاکٹر ، رضاکاراں و دیگر سماجی کارکناں دا وی حوصلہ ودھایا۔ادیباں دے ایس کردار نوں عالمی سطح اُتے وی سراہیا گیا اے۔ بلاشبہ اوہ خراج تحسین دے مستحق نیں۔ ادیباں دا ایہہ کردار ناقابل فراموش اے۔ ایس موقعے اُتے ڈاکٹر یوسف خشک نے کہیا کہ اکادمی ادیبات پاکستان نے کووڈ دے باوجود کئی ملکاں دے نال سمجھوتے کیتے نیں تے خاص طور تے جیہڑا چائنہ دے نال سمجھوتا ہویا ایس دے تحت 100 پاکستانی کتاباں چائینز زبان وچ ترجمہ ہون گیاں۔ مزید کہیا کہ امید زیست ایوارڈ دے تحت جیہڑی شاعری وصول کیتی سی ایہنوں بوہت جلدی شائع کر رہی اے جس وچ ساڈے سینئر تے نوجوان شعرا نے نظماں، غزلاں تے دیگر اصناف وچ اپنی تخلیقات گھلیاں نیں۔ ایہہ کتاب وبا دے دور وچ انسانی زندگی دی بدلدی صورتحال دی بھرپور عکاسی کرے گی تے امید اے ایہہ کتاب ادبی دستاویز دی حیثیت حاصل کرے گی۔ مشاعرے دے صدر ڈاکٹر وحید احمد نے اپنی گل بات وچ مشاعرے نوں کامیاب و یادگار قرار دیندے ہوئے کہیا کہ موجودہ چیئر مین نے اکادمی ادیبات نوں بوہت متحرک بنا دتا اے۔ کووڈ دے باوجود پبلیکشنز تے پرواگرمز دا انعقاد ہونا ایہناں دی اپنی شعبے نال محبت دی علامت اے۔ پاکستان چائنا اکنامک کاریڈور توں بعد ڈاکٹر یوسف خشک دی کوششاں نال پاک چائنہ لٹریری کاری ڈور ممکن ہو سکیا اے جیہڑی اک وڈی کامیابی اے۔ مشاعرے وچ اشرف یوسفی(فیصل آباد)، مقصود وفا(فیصل آباد)، اظہر فراغ(بہاولپور)، فیصل ہاشمی(خانیوال)، رفیق احمد خاں(حیدر آباد)، انجم سلیمی(فیصل آباد)، خالد سجاد(کویت)، قمر ریاض(مسقط)، ڈاکٹر شفیق آصف(سرگودھا)، صائمہ آفتاب(لاہور)، عذرا ناز(لندن)، استوتی اگروال(ہندوستان)، شاہد زمان (کوہاٹ)، صائمہ نورین بخاری(ملتان)، رباب تبسم(اسلام آباد)، ڈاکٹر عارف فرہاد (اسلام آباد)، منان قدیر منان(لندن)، نیل احمد(کراچی)، نیلم ملک(لاہور)، ڈاکٹر شمع افروز(کراچی)، تسلیم اکرام(اسلام آباد)، احسان شاہ(گلگت)، میاں آفتاب احمد(فیصل آباد)، رمزی آثم(کراچی)، اعجاز احمد(دوحہ)، ہارون عدیل(پشاور)، مبشر سعید(ساہیوال)، شیراز غفور(ڈیرہ غازی خان)، حسن مسعود (میانوالی)، مجدد الارض(خیر پور)، عقیل شاہ (اسلام آباد)، ثناء￿ اللہ ظہیر(فیصل آباد)، ڈاکٹر شاہد اشرف(فیصل آباد)، دانش عزیز (لاہور)، محمود رضا سید(فیصل آباد)، کاشف عرفان (اسلام آباد)، عرفان عارف(جموں کشمیر)، ابھیشک شکلہ (ہندوستان)، محمد افضل (لاہور)، کاشف رحمان(ڈیرہ اسماعیل خان)، طاہر شیرازی(ڈیرہ اسماعیل خان)، ڈاکتر ضیغم خان(ڈیرہ اسماعیل خان)، غزالی (گوجرہ)، اویس سجاد اویس(بہاولپور)، فوزیہ شیخ(فیصل آباد)، اطہر ضیاء(اسلام آباد)، صغیر اسلم(مانسہرہ)تے دیگر نے اپنا کلام پیش کیتا۔