دھوبی پٹڑے تے کھیس پھٹیا سُو

لکھت: جاوید پنچھی

سورۃ بقرہ دی آیت ۳۰ وچ اللہ تعالیٰ ارشاد فرماندا اے:
’’رب تیرے نے ملائک نوں جدوں دسیا سی ،میں دنیا وچ ’’خلیفا‘‘ اِک بناون لگاں (فرشتے) آکھن لگے کیہ بناویں گا اُس وچ ،جہڑا بھنڈیاں پاسی رَت وگاسی، اسیں تیرا ناں جپدے حمداں کردے تے وڈیاندے تینوں، رب نے آکھیا جو کجھ میں جاناں اوہ تسی نہ جانوں‘‘o
رسول کریم ﷺ نے اللہ تعالیٰ دے حکم تے جدوں نبوت دا اعلان فرمایا اوس ویلے عرب تے عیاش ، زانی، شرابی ، تے اجہے لوکاں دی حکمرانی سی جہڑے دینِ ابراہیم توں بہت دُور جا چکے سن سگوں انج کہنا چاہیدا اے کہ اوہناں نوں ’’دینِ ابراہیمی‘‘ بارے کجھ پتا نہیں سی ۔ اوہناں دا سب توں گھٹیا عمل ایہ سی کہ اوہناں لئی عورت دی کوئی عزت احترام نہیں سی۔
جسراں اج دے حکومتی ٹولے نوں عورتاں دی عزت احترام نال کوئی سروکار نہیں۔
رسول اللہ ﷺ دے اعلان نبوّت مگروں اوہناں مشرکاں نے رسول اللہ ﷺ تے ظلم کرنے شروع کر دتے ، قریش مکہ نے رسول اللہ ﷺ دا بائیکاٹ کر دتا۔ آپ ﷺ نوں اک گھاٹی (شِعبِ ابی طالب)وچ دو مہینے گزارنے پئے۔ فر اوہ ویلا آیا جدوں رسول کریم ﷺ نماز ادا کر رہے سن تے ابو جہل اینڈ پارٹی نے آپ ﷺ دی کمر مبارک تے اونٹ دی اوجھڑی رکھ دتی، اوس ویلے کسے دی ہمت نہیں سی کہ اوہناں دے ساہمنے آ سکے ۔ فِر رسول کریم ﷺ دی پیاری بیٹی حضرت فاطمۃ الزہرا سلام اللہ علیہا گھروں نکلیاں تے اوہناں نے آ کے اپنے بابا جی دی کمر مبارک توں اوجھڑی ہٹائی۔
دنیا وچ اوہ پہلی خاتون سن جہڑے اپنے بابا دے دفاع واسطے گھروں نکلے۔ اوہناں دی ذات اقدس تے کروڑاں درود، کروڑاں سلام۔
دو سری خاتون رسول اللہ ﷺ دی آل وچوں حضرت زینب سلام اللہ علیہا نیں جہناں نے نہ صرف مدینہ منورہ توں کربلا تک سفر کیتا سگوں دنیاوی کُتے یذید دے دربار وچ حق تے سچ دی گل کیتی ۔ کیوں جے سیّد نا مسعود رضی اللہ عنہ توں روایت اے کہ:رسول اللہ ﷺ نے فرمایا:
’’بہت چھیتی تہاڈے تے اجہے حکمران مسلط ہو جان گے جہڑے دوجیاں(غیر مسلماں) نوں تہاڈے تے ترجیح دین گے ‘‘ صحابہ نے عرض کیتی: اے اللہ دے رسول صلی اللہ علیک وسلم! جہڑا ساڈے وچوں اجہی صورتحال ویکھے اوہ کیہ کرے؟‘‘ آپ ﷺ نے فرمایا: ’’تسیں اوس حق نوں ادا کرنا جہڑا تہاڈے اُتے ہے تے اپنے حق واسطے اللہ توں سوال کرنا‘‘(مسند احمد حدیث ۳۴۳۸)
تے فیر کربلا وچ رسول اللہ ﷺ دی آل نے اوہی کیتا پئی حق سچ لئی آواز چکی، خیر تے شر وچکار کندھ اُسار دتی ۔ نااہل حکمراناں خلاف جہاد کیتا بیشک اوہناں نوں سارا کنبا تے لگدے لانے شہید کرانے پئے۔
دنیا وچ لیڈر بنن لئی بڑے یُدھ کرنے پیندے نیں۔ حالات دے دریا دیاں بپھریاں ہوئیاں لہراں دے ان گنت تھپیڑے سہنے پیندے نیں ۔ حق تے سچ دی راہ تے ٹرن والے لوکاں نوں بہت کجھ کھوہنا پیندا اے۔ جسراں حضرت بی بی زینب سلام اللہ علیہا نوں کربلا وچ سارا کنبا شہید کرانا پیا ۔
پاکستان دی تاریخ وچ دو خواتین دا ناں آئوندا اے جہناں نے پاکستان دی سلامتی، پاکستان دی بقا تے پاکستانی عوام دے حق لئی ڈکٹیٹرشپ دے خلاف آواز چکی تے نتیجا اوہناں نوں اپنی جان گوانی پئی ۔
پہلی خاتون محترمہ فاطمہ جناح سن جہناں نے پاکستان دی سلامتی، بقا تے پاکستانی عوام دے حق لئی ڈکٹیٹر شپ دے خلاف حق دی آواز بلند کیتی جہدے نتیجے وچ اوہناں نوں اپنی جان دا نذرانہ پیش کرنا پیا۔
دوجی خاتون محترما بے نظیر بھٹو سی جہنے ماضی قریب وچ ڈکٹیٹر شپ دے خلاف حق دا جھنڈا چُکیا تے اوہنوں وی اپنی جان دا نذرانہ پیش کرنا پیا۔
تیجی خاتون رہنما جہڑی ایس ویلے نااہل حکومت دے خلاف فیصلا کن جنگ شروع کر چکی اے اوہدا ناں اے ’’مریم نواز شریف‘‘۔
مریم نواز نوں کسے شئے دی کمی نہیں۔ اوہدے کول رہن لئی محل ورگا گھر موجود اے ، سفر کرن لئی بُلٹ پروف گڈی اے، نوکر تے اک پاسے، اوہدا پانی بھرن لئی کئی بے لوث خادماواں موجود رہندیاں نیں۔اوہ چاہوے تے دوجیاں عورتاں وانگ اپنے گھر بہت سوہنی حیاتی گزار سکدی اے پر چوں کہ مریم نواز پیدائشی لیڈر اے۔ اوہدے اندر پاکستان دی سا لمیت دے نال پاکستانی قوم واسطے درد موجود اے ایہو وجھا اے کہ اوہ پاکستانی قوم تے پاکستان دی بقاء واسطے اپنی جان دی پرواہ کیتے بغیر حق تے سچ دا جھنڈا چُک کے نا اہل حکمراناں خلاف جہاد کرن نکل چکی اے ۔ایس ویلے، ایس یُدھ وچ مریم بی بی بارے’’ کلی جان، دُکھ ہزار ‘‘والی کہاوت سچ ثابت ہو رہی اے۔ کیوں جے میاں نواز شریف اک تے بیمار نیں ، دوجا اوہ لندن بیٹھے نیں۔ہزاراں میل دُور۔۔۔۔۔۔مریم بی بی دے پچھے دعا کرن والی ماں وی کوئی نہیں۔
مریم نواز دے پیدائشی لیڈر ہون دی وجھا ایہ کہ جس ماحول وچ اوہدی تربیت ہوئی اوتھے ساری لیڈر شپ بیٹھی اے۔ ہر ویلے سیاست تے گل بات ہوندی اے۔ بچے وڈیاں دی گل بات دا اثر لیندے نیں۔ ایہ وی سچ اے کہ شیر دا پُتر شیر ای ہوندا اے۔مریم دے وڈکے سارے ای ببر شیر نیں۔
مریم نواز دے والد محترم میاں نواز شریف جہڑے کہ تِن واری وزیر اعظم پاکستان رہے ۔ اوہ بندا جہڑا پاکستان دی تاریخ وچ قائد اعظم توں بعد پہلا نظریاتی وزیر اعظم رہیا۔ جہنے پاکستان نوں ترقی دی راہ تے انج ٹوریا کہ پاکستان ایشین ٹائیگر بن رہیا سی تے عین اوس ویلے اوہدی حکومت ختم کر دتی گئی۔
مریم نواز دی ماں جی کلثوم نوازنے ڈکٹیٹر پرویز مشرف دے خلاف صدائے حق بلند کیتی تے مسلم لیگ ’’ن‘‘ دا ناں تے مقام دوبارہ بحال کروایا۔
مریم بی بی دا چاچا میاں شہباز شریف،وفاقی قائد حزب اختلاف تے اپوزیشن لیڈر، کالج دور دا لیڈر اے۔ اجہیا لیڈر جہنوں نہ صرف چائنا نے منیا، سگوں ترکی دے صدر طیب اردگان نے میاں شہباز شریف نوں اپنا بھرا منیا۔
چاچا زاد بھرا حمزہ شہباز لیڈر ، جہڑا ایس ویلے پنجاب اسمبلی دا قائد حزب اختلاف تے اپوزیشن لیڈر اے۔
مریم نواز نے وی بہت کجھ کھوہیا اے ۔ جس ویلے مریم نواز دی ماں جی نوں اوہدی بہت چوکھی ضرورت سی اوس ویلے مریم نواز اپنے والد دے نال گرفتاری دین واسطے لندن توں پاکستان آ رہی سی تے پچھوں مریم بی بی دے ماں جی ایس دنیا نوں چھڈ گئے۔
پنجابی صوفی شاعر میاں محمد بخش رحمۃ اللہ علیہ فرماندے نیں:
باپ سراں دے تاج محمد ماواں ٹھنڈیاں چھاواں
ہر اِک چیز بازاروں لبھدی نہیں جے لبھدیاں ماواں
’’ماواں باجھ محمد بخشا! کون کرے رکھوالی‘‘
اک ہور تھاں اوہ انج بیان کردے نیں :
سئیاں نال میں کھیڈن گئیاں ٹُٹ گئیاں نیں ونگاں
ماں ہُندی تے ہور چڑھاندی پیو توں منگدی سنگاں
ماں دے جان توں بعد مریم بی بی دیاں سلھیاں اکھاں صاف کرن لئی دادی ماں موجود سی ’’ پشاور جلسے والے دن اوہ وی اللہ نوں پیاری ہو گئی تے مریم بی بی آخری ویلے اپنی ماں ورگی دادی نال دو چار مٹھیاں گلاں کرسکی تے نہ کوئی نصیحت پلے بنھ سکی۔
۱۶ مئی نوں شیخوپورا وچ میاں جاوید لطیف دے ڈیرے تے کارکناں نوں خطاب کردیاں مریم نواز سچ مچ ببرشیرنی نظر آ رہی سی۔ اوہدے اندازوچ شیرنی دی دھاڑ تے شکار نوں دبوچ لین والی عقابی جھپٹ صاف نظر آ رہی سی۔ حضرت علامہ محمد اقبال رحمۃ اللہ علیہ ہوراں داایہ شعرمریم بی بی تے فٹ ہو رہیا سی۔
جھپٹا پلٹنا پلٹ کر جھپٹنا
لہو گرم رکھنے کا ہے اک بہانہ
مریم نواز نوں نااہل حکمراناں خلاف خطاب کردیاں ویکھ کے مینوں آپ مہارے عظیم پنجابی صوفی شاعر حضرت وارث شاہ رحمۃ اللہ علیہ ہوراں دا مصرعا یاد آگیا۔ اوہ فرماندے نیں:
’’نیڑے آ کے شیہنی دے وانگ گجی
اکھیں رَوہ دا نیر پلٹیا سُو‘‘
شیہنی دا مطلب ہوندا اے ببر شیرنی ۔ یعنی مریم نواز وچ حکمرانی کرن دے سارے ایلیمنٹس موجود نیں۔
مریم بی بی نے شیخوپورا دی لوکائی نوں مخاطب کردیاں آکھیا:
’’شیخوپورا دے شیراں واسطے نواز شریف تے شہباز شریف دا سلام لے کے آئی ہاں۔ میں کسے نوں نہیں سی دسیا کہ شیخوپورا جا رہی آں پر ایتھے لوکائی دا سمندر ویکھ کے پتا لگدا اے کہ ہُن لوکائی نے ڈرنا چھڈ دتا اے۔
غداری غداری کھیڈنا اسیں بڑے سالاں توں سُن دے آ رہے آں ۔ حق ، سچ، آئین ، قانون، سچائی ، بہادری توں ڈر لگدا اے تے کدی غداری ، کدی مذہب دا فتویٰ تے کدی چو ر ڈاکودا لقب نکل آئوندا اے۔جے آئین تے قانون دی گل کرن والا غدار اے تے فیر سارا پاکستان غدار اے ۔ غداری دا خطاب محترمہ فاطمہ جناح نوں وی ملیا تے نواز شریف تے وی غداری دا الزام لگیا۔ جے آئین تے قانون دی گل کرنا غداری اے تے فیر ایہ غداری اسیں بار بار کراں گے۔ غداری دی فیکٹری کھولن والیاں نوں پاکستانی لوکائی چنگی طرحاں جان چکی اے‘‘۔
مریم بی بی نے لوکائی نوں مخاطب کردیاں آکھیا :’’میں دساں غدار کون اے؟
کرسیاں تے بیٹھن والیاں نوں کرسیاں توں اُتارن لئی جہڑے غدار کہندے سن اج اوہ آپ کرسیاں تے بہہ کے غدار کہہ رہے نیں۔
امریکا دی جھولی وچ بہہ کے کشمیر دا سودا کرن والا غدار اے، اِک چُنے ہوئے وزیر اعظم نوں اُتارن والے ، پارلیمنٹ دے چڑھائی کرن والے غدار نیں، نواز شریف لوکائی دے ووٹاں نال آیا سی کسے دے موڈھیاں تے چڑھ کے نہیں سی آیا۔ کپتان جدوں بھارت وچ بہہ کے اپنی فوج خلاف گل کردا اے تے اوہ غداری اے، جدوں میڈیا نوں ڈرا دھمکا کے چُپ کرایا جاندا اے تے اوہ ہوندی اے غداری،جدوں جسٹس فائز عیسیٰ تے شوکت عزیز صدیقی ورگے ججاں نوں سچ بولن دی سزا دتی جاندی اے تے اوہ اے غداری۔۔۔۔۔۔۔۔۔۔غداری دے فتوے دین والیو! تہاڈا ’’یوم حساب‘‘ آون والا اے۔
مریم نواز نے ناں لین توں بغیر وزیر اعظم نوں مخاطب کردیاں آکھیا:’’نواز شریف دے خلاف تے احتجاج کرایا پر اپنی حکومت وچ احتجاج کرن والیاں نوں مسجداں وچ شہید کروایا،اج کہڑے مونہ نال فلسطین بارے گل کررہیا ایں ؟‘‘
مریم نواز نے ایہ وی آکھیا کہ:’’ نواز شریف نے جہڑا بیانیا دتا اے اج اوہ بیانیا گھر گھر اپڑ چکیا اے۔ شیخوپورا دے شیرو! یقین رکھو ایس کالی رات دی سویر ہون والی اے۔ مسلم لیگ ’’ن‘‘ دا سورج اِک وار فیر چڑھن والا اے۔
میں جاوید لطیف تے شیخوپورا دی لوکائی دے نال کھلوتی ہوئی آں ، سگوں ہر اوس شخص نال کھلوتی ہوئی آں جہڑا آئین تے قانون دی گل کردا اے تے جہڑا نواز شریف دے بیانیے نال کھلوتا اے‘‘
قصا مختصر ایہ کہ مریم بی بی نے نہ صرف ایہ ثابت کیتا کہ اوہ پیدائشی لیڈر اے ۔ سگوںاوہنے نااہل حکمراناں نوں انج دھویا اے جسراں وارث شاہ رحمۃ اللہ علیہ فرمائوندے نیں:
سِروں لاہ ٹوپی گلوں توڑ سیلھی
لکوں چائیکے زمیں تے سٹیا سُو
پکڑ زمیں تے ماریا نال غصے
دھوبی پٹڑے تے کھیس پھٹیا سُو
کیدو لنگے نوں پکڑ کے چور وانگوں
مار مار کے تے چا پھٹیا سُو
وارث شاہ فرشتیاں عرش اتوں
چا شیطان نوں زمیں تے سٹیا سُو

میری دعا اے کہ اللہ تعالیٰ اپنے سوہنے حبیب ﷺ دے صدقے مریم نواز ، اوہدے خاندان تے اوہدی پوری ٹیم تے اپنا فضل کرے تے اوہنوں دشمناں دے شر توں محفوظ رکھے۔
آمین ثم آمین
نوٹ: ایس مضمون وچ دس پائے گئے وچار لکھاری دے اپنے نیں ۔سدھی گل ایہ کہ لکھاری دی رائے نال ادارے دا کسے پکھوں وی متفق ہونا ضروری نہیں۔(ادارہ)