جنرل باجوہ تے پاکستان

لكهت:مظہر برلاس

ہر حکمران وانگوں ہر آرمی چیف دے کماں نوں بڑی گہری نگاہواں نال ویکھیا جاندا اے۔ جنرل قمر جاویدباجوہ بظاہر ہنس مکھ نیں پر اوہ اوس دور وچ فوج دے سربراہ بنے جدوں خطرے تے دہشت گردی دا سامنا سی۔ جنرل باجوہ نے دہشت گردی دے خاتمے دا عزم کیتا۔ 22فروری 2017ء دے دن جنرل باجوہ دی سربراہی وچ اپریشن ردالفساد دا آغاز ہویا۔ ایہ اپریشن پورے ملک وچ شروع کیتا گیا۔ مقصد اکو سی کہ پاکستان پرامن‘ مستحکم تے نارمل نظر آوے‘ پاکستانی قوم دا اعتماد بحال ہووے۔ ایہ اپریشن اوس ویلے شروع ہویا جدوں قبائلی علاقیاں وچ دہشت گرداں نے پناہ لے کے زندگی مفلوج کرن دی بھرویں کوشش کیتی۔ ایس اپریشن لئی حکمت عملی بنائی گئی۔ کائونٹر ٹیررازم دے تن بنیادی نکتے سن۔
-1 طاقت دا استعمال صرف ریاست دی صوابدید ہووے۔
-2 مغربی سرحداں نوں محفوظ تے مستحکم بنایا جاوے۔
-3 ملک بھر چوں دہشت گرداں دی بنیادی حمایت ختم کیتی جاوے۔
ایسے طرح انتہاپسندی دے خاتمے لئی وی تن بنیادی نکتے سن:
-1 نیشنل ایکشن پلان تے عملدرآمد
-2 قبائلی علاقیاں دی قومی دھارے وچ شمولیت
-3 تعلیمی اداریاں‘ مدرسیاں دے نال نال پولیس وچ وی ریفارمز
دہشت گردی خلاف کامیاب جنگ دے چار مرحلے سن۔ علاقیاں نوں کلیئر کرنا‘ استحکام لیانا‘ تعمیراتی پرگورام تے سول اداریاں دی عملداری بحال کرنا۔ اپریشن ردالفساد دے تحت انٹیلی جنس دی بنیاد تے تن لکھ 75 ہزار توں ودھ اپریشن کیتے گئے۔ ایہناں اپریشناں وچ ایم آئی‘ آئی ایس آئی‘ آئی بی‘ سٹی ٹی ڈی‘ رینجرز‘ ایف سی تے پولیس نے حصہ لیا۔ اپریشناں راہیں دہشت گرداں دے نیٹ ورک ختم کیتے گئے۔ مثال دے طور تے مئی 2017ء وچ چمن توں خودکش بمبار پھڑے گئے‘ مستونگ دیاں پہاڑیاں وچ دہشت گرداں دے خلاف اپریشن کیتا گیا‘ گوادر وچ دہشت گرد حملہ آوراں نوں ماریا گیا۔ خیبرپختونخوا توں علاوہ کراچی وچ سٹاک ایکسچینج تے چینی قونصل خانے تے نہ صرف حملیاں نوں نکام بنایا سگوں حملہ آوراں نوں مار دتا گیا۔ پنجاب وچ ایسٹر دے تہوار تے وڈی دہشت گردی نوں نکام بنا کے قیمتی انسانی جاناں بچائیاں گئیاں۔
دہشت گرداں توں وڈی گنتی وچ اسلحہ برآمد کیتا گیا۔ واڑ راہیں سرحداں نوں محفوظ تے مستحکم بنان دی غرض نال پاک افغان سرحد تے 84فیصد کم مکمل ہو چکیا اے جد کہ پاک ایران بارڈر تے 43فیصد کم ہو چکیا اے۔ ایہناں بارڈراں تے بارڈر پوسٹاں تے ٹرمینلز بنائے گئے نیں۔ مشکل حالات وچ قبائلی علاقیاں وچ 423 چیک پوسٹاں بنائیاں گئیاں سن۔ امن و امان وچ بہتری پاروں ہن 248 پوسٹاں رہ گئیاں نیں۔ ایس دوران سکیورٹی فوجاں نے پولیس دے سینتی ہزار جواناں نوں تربیت دتی۔ ایہ عمل ہن وی جاری اے‘ لیویز نوں وی تربیت دتی گئی ۔ خالی کروائے گئے علاقیاں وچ مقامی لوک فیر توں آباد ہو گئے نیں۔ دہشت گرداں نوں کیفرکردار تک اپڑان لئی ملٹری کورٹس بنائیاں گئیاں‘ 78 توں ودھ دہشت گرد تنظیماں خلاف ایکشن لیا گیا‘ منی لانڈرنگ‘ بھتہ خوری‘ اغوا برائے تاوان تے ٹارگٹ کلنگ تے ڈکا پایا گیا۔
شدت پسند مواد دی تشہیر نوں روکیا گیا۔ وفاق المدارس تے علماء دی مشاورت پاروں اٹھاراں توں ودھ مذہبی رہنما پیغام پاکستان دے تحت انتہاپسندی خلاف یک زبان ہوئے۔ پیغام پاکستان نے نوجواناں نوں مذہب دے ناں تے دہشت گردی دے چنگل وچ جان توں بچایا۔ اپریشن دوران ای چھیویں مردم شماری ہوئی۔ اپریشن پاروں امن و امان دی صورتحال وچ بہتری آئی۔ کراچی 2014ء وچ جرائم دے اعتبار نال چھیویں نمبر تے سی۔ ہن اوہ 106 ویں نمبر تے آ چکیا اے۔ قبائلی ضلعیاں وچ 31ارب دی لاگت نال 831 ترقیاتی منصوبیاں تے کم ہو رہیا اے۔ بلوچستان وچ سی پیک توں علاوہ وی کئی وڈے منصوبیاں تے کم ہو رہیا اے۔ ہن کھیڈ دے میدان آباد نیں۔ سیاحت لئی دنیا گوادر‘ گلگت بلتستان تے کے ٹو ول ویکھ رہی اے پر ہن سانوں کرونا ورگی وباء دا سامنا اے۔ چین نے پاکستانی فوجاں لئی ویکسین تحفے دے طور تے دتی سی۔ جنرل باجوہ نے خالصتاً قومی سوچ دے تحت ویکسین این سی او سی دے حوالے کیتی تے آکھیا کہ ایہ ویکسین سب توں پہلاں فرنٹ لائن ہیلتھ ورکراں نوں لگنی چاہیدی اے جہڑے ساڈے ہیرو نیں جہناں نے قیمتی انسانی جاناں بچان لئی دن رات اک کیتی رکھیا۔
ایس دوران فوڈ سکیورٹی دے حوالے نال وی کم کیتا گیا۔ تعلیمی نظام دا وی جائزہ لیا گیا کیوں جے اسیں دنیا دے تعلیمی انڈکس وچ بہت پچھے آں۔ ساڈے ایتھے پنجی ملین بچے سکولاں چوں باہر نیں۔ ساڈے ایتھے اک توں ودھ تعلیمی نظام نیں۔ سرکاری ادارے‘ پرائیویٹ تے مدرسے قوم دی تقسیم دا کارن نیں۔ 1947ء وچ ساڈے ایتھے 247 مدرسے سن تے اج مدرسیاں دی گنتی تریہہ ہزار اے۔ افغان جنگ تے انقلاب ایران دے بعد مدرسیاں دی گنتی وچ تیزی نال وادھا ہویا۔ زیادہ تر مدرسے عسکریت پسند نہیں‘ بڑے گھٹ مدرسے انتہاپسندی ول رغبت دواندے نیں۔ ایہ حقیقت اے کہ مدرسیاں وچ غریب طالب علماں نوں تعلیم تے رہائش مفت دتی جاندی اے دینی تعلیم دے نال نال پاکستانیت دا درس دتا جاندا اے پر ایہدے نال کجھ مدرسیاں توں فرقہ واریت وی ابھردی اے اوہناں دے طلباء عسکریت پسندی ول راغب ہوندے نیں۔ اجہے نقصانات نوں سامنے رکھدے ہوئے ہن فرقہ واریت نوں ہوا دین والا مواد ختم کیتا جا رہیا اے دوجے مضموناں نوں شامل کرکے ٹیچر وی مقرر کیتے جان گے۔ مدرسے حکومت دے ماتحت ہون گے سارے مدرسے اکائونٹس کھلوان گے حکومت دی عملداری ہووے گی‘ ہائرایجوکیشن کمیشن تے بورڈ دی عملداری ہووے گی‘ ایس طرح اک بدلیا ہویا پاکستان نظر آوے گا۔
اک دور سی ہر پاسے دہشت گردی نظر آئوندی سی ساڈے شہر دھماکیاں نال گونجدے سن‘ اپریشن ردالفساد دے راہیں شہراں نوں محفوظ بنایا گیا۔ اساں دنیا نوں دہشت گرداں توں بچان لئی ستر ہزار توں ودھ قیمتی جاناں دا نذرانہ پیش کیتا۔ دہشت گرداں دا لک دوہرا ہو چکیا اے۔ جنرل قمرجاوید باجوہ نے ایہ سارا کم بڑی محنت تے حکمت نال کیتا اے۔ جنرل باجوہ صرف سپہ سالار ای نہیں بہترین حکمت کار وی نیں کہ
خونِ دل دے کے نکھاریں گے رخ برگِ گلاب
ہم نے گلشن کے تحفظ کی قسم کھائی ہے
٭٭٭