کرونا توں وی وڈی سزا دا انتظار اے؟

بچپن توں پڑھدے آئے آں کہ پاکستان نہ مقبوضہ کشمیر توں دستبردار ہو سکدا اے تے نہ فلسطین نوں تنہا چھڈ
سکدا اے پر اج اسیں اپنی اکھاں نال ویکھ رہے آں اسیں کشمیر وی چھڈ دتا تے فلسطین نوں وی تنہا کر دتااے

طیبہ ضیاچیمہ

غزہ وچ اسرائیلی بمباری نال تباہ گھر دے ملبے دے ڈھیر اُتے کھڑی 10 سالہ بچی دا کہنا سی کہ ، میں چاہنی آں کہ اپنے لوکاں لئی کجھ کراں پر میں کیہ کر سکنی آں؟ میں تے صرف 10 سال دی اک بچی واں۔۔۔ بچی دا کہنا سی کہ میں خود نوں کہنی واں کہ اسیں ایس سب دے اہل کیوں آں؟ میری فیملی کہندی اے کہ اوہ صرف ساڈے توں نفرت کردے نیں، اوہ سانوں پسند نہیں کردے کیوں جے اسیں مسلمان آں، تسیں مسلماناں دے نال انج دا رویہ کیوں اختیار کردے او؟۔۔۔ غزوہ اُتے اسرائیل فوج دے تازہ ترین حملیاں وچ مزید 42 بندے شہید ہو گئے نیں جس دے بعد ایتھے حالیہ تنازعے وچ شہید ہون والے فلسطینیاں دی کل تعداد 188 ہو گئی اے۔ فلسطین وچ مسلماناں نوں 1924 توں پہلے بوہت وڈی اکثریت حاصل سی تے یہودی کل آبادی دا چھ فیصد سن۔ 1917ء وچ برطانیہ نے ایس ملک نوں یہودیاں دا قومی وطن بنان دا فیصلہ کر لیا تے دنیا دے مختلف ملکاں وچ آباد یہودیاں نوں ترغیب دتی کہ اوہ فلسطین وچ آ کے آباد ہو جان۔ مختلف یورپی علاقیاں توں وسیع پیمانے اُتے یہودیاں نے فلسطین ولوں نقل مکانی کیتی۔ عرباں نے یہودیاں دی ودھدی ہوئی آبادی توں خطرہ محسوس کردے ہوئے ملکی آزادی دا مطالبہ کر دتا۔ پر برطانیہ نے فلسطین دا مسئلہ حل کرن دی بجائے ایس ملک نوں متنازعہ بنا کے چھڈ دتا۔ ہندوستان دی تقسیم وچ وی انگریز راج نے جموں کشمیر دے مسلماناں دے نال ایہو سلوک کیتا۔ فلسطین وچ یہودیاں دی پشت پناہی کیتی تے کشمیریاں دے خلاف ہندوئواں دی حمایت کیتی تے جموں و کشمیر نوں وی متنازعہ بنا کے چلے گئے۔ 1948ء وچ امریکہ تے ایس دے حلیف ملکاں نے فلسطین نوں تقسیم کر دتا۔ اک حصہ مسلماناں نوں دے دتا تے دوجا حصہ بطور اسرائیلی ریاست تسلیم کر لیا گیا۔ عرباں نوں ایہہ تقسیم گوارا نہیں سی تے اوہناں نے یہودیاں نال آزادی دی جنگ شروع کر دتی پر امریکہ، برطانیہ تے فرانس دی پشت پناہی توں اسرئایلی سلطنت مضبوط ہوندی چلی گئی تے فیر ایہہ زمانہ آیا کہ اسرائیلی خطہ اپنے باپ دادا فرعون دے نقش قدم اُتے چل رہیا اے۔ اسرائیلیاں دی قبل از مسیح تاریخ دا مطالعہ قرآن پاک توں کیتا جائے تے یہودیاں دی فطرت دا صحیح طور اُتے اندازہ لایا جا سکدا اے۔ اللہ تعالیٰ فرماندے نیں، اسیں اپنی کتاب (صحف آسمانی کا مجموعہ) وچ بنی اسرائیل نوں ایس گل اُتے متنبہ کر دتا سی کہ تسیں دو وار زمین وچ فساد عظیم برپا کرو گے تے بڑی سرکشی وکھائو گے۔
آخر کار جدوں ایہناں وچوں پہلی سرکشی دا موقع پیش آیا، تے بنی اسرائیل اسیں تہاڈے مقابلے وچ اپنے انج دے بندے چکے جیہڑے نہایت زور آور سن تے اوہ تہاڈے ملک وچ وڑ کے ہر پاسے ودھ گئے۔ ایہہ اک وعدہ سی جنہوں پورا ہو کے ای رہنا سی۔ ایس دے بعد اسیں تہانوں ایہناں اُتے غلبے دا موقع دے دتا تے تہانوں مال تے اولاد نال مدد دتی تے تہاڈی تعداد پہلے توں ودھا دتی۔ ویکھو! تسیں بھلائی کیتی تے اوہ تہاڈے اپنے ای لئے بھلائی سی تے بُرائی کیتی تے اوہ تہاڈی اپنی ذات لئی بُرائی ثابت ہوئی۔ فیر جدوں دوجے وعدے دا ویلا آیا تے اسیں دوجیاں نوں تہاڈے اُتے مسلط کیتا تاں جے اوہ تہاڈے چہرے وگاڑ دین تے مسجد (بیت المقدس) وچ ایسے طرح وڑ جان جس طرح پہلے دشمن گھسے سن تے جس شے اُتے ایہناں دا ہتھ پئے ایہنوں تباہ کر کے دکھ دین۔ ہو سکدا اے ہن تہاڈا رب تہاڈے اُتے رحم کرے پر جے تسیں فیر اپنی سابق روش دا اعادہ کیتا تے اسیں وی فیر اپنی سزا دا اعادہ کراں گے تے کفر ان نعمت کرن والیاں لئی اسیں جہنم نوں قید خانہ بنا رکھیا اے۔ (سورئہ بنی اسرائیل)۔
مذکورہ آیت مبارکہ دے پس منظر دے مطابق حضرت موسیٰ دی وفات دے بعد جدوں بنی اسرائیل فلسطین وچ داخل ہوئے تے ایتھے مختلف قوماں آباد سن۔ ایہناں قوماں وچ بدترین قسم دا شرک تے برائیاں پائیاں جاندیاں سن۔ تورات وچ حضرت موسیٰ دے ذریعے بنی اسرائیل نوں جیہڑی ہدایت دتی گئی سی ایہناں وچ صاف صاف کہہ دتا گیا سی کہ تسیں ایہناں قوماں نوں ہلاک کر کے ایہناں دے قبضے توں فلسطین دی سرزمین کھوہ لینا تے ایہناں دی خرابیاں نوں اپنان توں گریز کرنا پر اسرائیلی جدوں فلسطین وچ داخل ہوئے تے اللہ دے احکام بھُل گئے۔فلسطین دا اک حصہ لے کے وکھرا ہو گئے تے ایتھے موجود گمراہ تے مشرک قوم دی بُرائیاں وچ غرق ہو گئے۔ بنی اسرائیل دی نافرمانیاں دی تفصیل خاصی لمبی اے، حضرت موسیٰ دے بعد وی انبیاء تے نیک بادشاہ تشریف لیاندے رہے پر بنی اسرائیل اپنی نافرمانیاں دی روش دی بنا اُتے پسپائی دا شکار رہے۔ بنی اسرائیل دی دوجی ریاست جیہڑی یہودیہ دے ناں توں جنوبی فلسطین وچ قائم ہو چکی سی اوہ وی حضرت سلیمان دے بعد بوہت جلدی شرک تے بد اخلاقی وچ مبتلا ہو گئی۔ آخر 587 قبل مسیح وچ بخت نصر نے اک سخت حملہ کر کے یہودیاں دی اٹ نال اٹ وجا دتی۔ یروشلم تے ہیکل سلیمانی دا نام و نشان مٹا دتا۔یہودیاں دی بوہت وڈی تعداد نوں ایہناں دے علاقے توں کڈ کے تتر بتر کر دتا۔ ایہہ سی اوہ پہلا فساد جس نال بنی اسرائیل نوں متنبہ کیتا گیا سی تے ایہہ سی اوہ پہلی سزا جیہڑی ایہناں دی نافرمانیاں دی پاداش وچ ایہناں نوں دتی گئی۔ آیات مبارکہ دے مطابق اللہ تعالیٰ نے یہودیاں نوں اک وار فیر مہلت دتی، بنی اسرائیل نوں اپنے وطن واپس جان دے موقعے پیدا کر دتے۔ ہیکل سلیمانی دی دوبارہ تعمیر دا موقع مل گیا۔ حضرت عزیز نے دین موسوی دی تجدید دا بیڑا چکیا۔ ڈیڑھ سو سال بعد بیت المقدس فیر توںآباد ہویا۔ اسرائیلیاں دی تباہی دا دوجا دور رومی فاتحین دا فلسطین اُتے قبضہ سی۔ اوہناں نے بیت المقدس اُتے قبضہ کر کے یہودیاں دی آزادی دا خاتمہ کر دتا تے بزورِ شمشیر یروشلم نوں فتح کر لیا۔ ایس موقعے اُتے قتل عام وچ اک لکھ 33 ہزار بندے مارے گئے، ایس توں بعد فلین توں یہودی اثر و اقتدار انج دا مٹیا کہ دو ہزار ورہے تیکر ایس نوں فیر سر چُکن دا موقع نہ مل سکیا تے یروشلم دا ہیکل مقدس فیر تعمیر نہ ہو سکیا۔ ایہہ سی اوہ سزا جیہڑی قرآن دے مطابق بنی اسرائیل نوں دوجے فساد عظیم دی پاداش وچ ملی۔
دور حاضر دی تاریخ ول آنے آں جدوں یہودیاں نے انگریزاں دے ایما اُتے فلسطین اُتے قبضہ کیتا تے یہود و نصاریٰ دے گٹھ جوڑ نے اسرائیل نوں بطور اک یہودی ریاست تسلیم کرایا۔ پاکستان دی بھارت نال ناچاکی دا سبب مقبوضہ کشمیر تے اسرائیل نال مخالفت دی وجہ فلسطین دی حمایت اے۔ بچپن توں پڑھدے آئے آں کہ پاکستان نہ مقبوضہ کشمیر توں دستبردار ہو سکدا اے تے نہ فلسطین نوں تنہا چھڈ سکدا اے پر اج اسیں اپنی اکھاں نال ویکھ رہے آں اسیں کشمیر وی چھڈ دتا تے فلسطین نوں وی تنہا کر دتا۔ پاکستان ایٹمی قوت ہوندے ہوئے وی فلسطین اُتے ہون والے ظلم و بربریت دا چپ کر کے تماشہ ویکھ رہیا اے۔ 55 اسلامی ریاستاں بے حسی تے بے حمیتی دا مظاہرہ کر رہیاں نیں۔ جموں کشمیر اُتے ہندو سامراج دے لاک ڈائون دے سنگین ظلم دی پاداش وچ پوری دنیا کرونا دے لاک ڈائون دی سزا بھگت رہی اے، فلسطین اُتے مظالم اُتے وی دنیا چپ اے ، شاید کرونا توں وی وڈی کسے سزا دی منتظر اے؟