اسرائیل دے خلاف تیجی مزاحمتی تحریک دا آغاز

او آئی سی، اقوام متحدہ، سلامتی کونسل تے عالمی برادری فلسطین اُتے اسرائیلی بربریت روکن وچ ناکام

قادر خان یوسف زئی

57 مسلم اکثریتی ملکاں دی نمائندہ تنظیم او آئی سی نے فلسطین دی صورت حال اُتے وزرائے خارجہ دے ہنگامی اجلاس وچ اسرائیلی حملیاں تے موجودہ حالات دا جائزہ لے کے روایتی مذمتی قرار داد منظور کردے ہوئے معاملے نوں نمٹا دتا۔ حالیہ کشیدگی ایس ویلے ودھی جدوں مشرقی یروشلم وچ اسرائیلی فوجیاں نے کئی فلسطینی خانداناں نوں زبردستی گھراں توں کڈ دتا سی۔ افسوسناک حد تیکر مسلم اکثریتی ملک مسلم مہ نوں پوری دنیا وچ پیش آئے مسلیاں دا ح ل کڈن وچ مصلحت، ذاتی مفادات و تجارتی ترجیحات سنے اسرائیل و امریکہ دے خوف دا شکار نظر آندے نیں۔ واضح رہوے کہ خدشہ اے غزہ وچ فلسطینیاں دی اسرائیل دے خلاف مزاحمتی تحریک دا آغاز ہو سکدا اے۔ پہلی تحریک 1987 توں 1993 ء تیکر جاری رہی جد کہ دوجی مزاحمتی تحریک دا آغاز 2000ء وچ ہویا تے ایہہ قریباً پنج سال تیکر جاری رہی۔ اسلامی تعاون تنظیم، اسرائیل نوں دبائو وچ لیان لئی متفقہ طور اُتے اقتصادی بائیکاٹ یا کسے وی قابل عمل رد عمل دا اعلان کر سکدی سی پر صرف اک رسمی بیان جاری کر کے کہ القدس الشریف تے مسجد اقصیٰ دی حیثیت مسلم امہ لئی ریڈ لائن جہی اے کوئی وی مسلم ملک اپنی دینی ، اخلاقی و انسانی ذمہ داری توں بری نہیں ہو سکدا۔اسرائیل یہودی آبادکاری دے منصوبے اُتے دنیا دی پروا کیتے بغیر عمل پیرا اے تے ایس غاصبانہ کاروائی نوں روکن والا کوئی نہیں۔ ہن تیکر دے اسرائیل حملیاں وچ بالاں سنے سینکڑے بے گناہ فلسطینی شہید ہو چکے نیں جد کہ 10 ہزار توں ودھ بندے بے گھر ہوئے۔ اسرائیلی رعونت دا اندازہ ایس امر توں وی لایا جا سکدا اے کہ ایس نے میڈیا ہائوسز و رہائشی عمارت نوں وی میزائلاں نال نشانہ بنا کے منہدم کر دتا، دے مطابق ایہناں نوں عمارتاں خالی کرن لئی صرف اک گھنٹے دا ویلا دتا گیا سی۔ اسرائیلی فوج نے خان یونس دے علاقے وچ حماس دے سیاسی ونگ دے رہنما یحییٰ السنوار دے گھر نوں مسمار کیتا۔ اسرائیل ایس ویلے مشرق وسطیٰ وچ انتہا پسندی نوں فروغ دے رہیا اے ایس دے اقدامات نال خطے سنے پوری دنیا وچ اسرائیل دے خلاف نفرت وچ مزید وادھا ہویا اے۔
امریکہ نے اسرائیلی جارحیت دی ہمیشہ پشت پناہی کیتی اے جس دی وجہ نال خود سرولے پالک نے مشرق وسطیٰ وچ امن و سکون نوں برباد کر کے رکھ دتا اے۔ اسرائیلی شر انگیزیاں دی وجہ نال خطے وچ کوئی مملکت محفوظ نہیں۔ ایس دے نال اتحاد و دوستی دا ہتھ ودھان والے مسلم اکثریتی ملک ای نہیں بلکہ پوری دنیا ایس بربریت دا وحشت ناک کھیڈ ویکھ رہی اے۔ اسرائیل مخالف تنظیم حماس ایٹمی قوت دا مقابلہ روایتی طریقیاں نال کر رہی اے پر ایس ویلے فلسطین نوں مسلم امہ و عالمی برادری دی سخت لوڑ اے تاں جے بے گناہ عوام اُتے ہون والے مظالم نوں روکیا جا سکے۔حماس و اسرائیل دی لڑائی تیجے ہفتے وچ داخل ہو رہی اے۔ عالمی برادری نوں گمراہ کرن لئی اسرائیل بیان دیندا اے کہ IDF دے لڑاکا طیارے غزہ دی پٹی وچ، دہشت گرداں دے ٹھکانیاں نوں نشانہ بنا رہے نیں ایہناں حملیاں دے جواب وچ حماس دے راکٹاں نے اسرائیل دے جنوبی شہر بیرسیہ تے اشکلون نوں نشانہ بنایا سی۔ انسانی حقوق دے عالمی ادارے رپورٹر ز وڈ آئوٹ بارڈرز (آر ایس ایف) نے بین الاقوامی فوج داری عدالت (آئی سی سی ) دے پراسیکوٹر فتوئو بینسوداتوں میڈیا نوں نشانہ بنائے جان اُتے تحقیقات دا مطالبہ کیتا اے۔ واضح رہوے کہ اسرائیلی فضائی حملے وچ رہائشی عمارت وچ قائم غزہ وے ایسوسی ایڈپریس (اے پی ) الجزیرہ سنے کئی میڈیا ہائوسز دے دفاتر سن۔ آر ایس ایف دے سیکرٹری جنرل کرسٹوف ڈیلور دا کہنا سی کہ جان بوجھ کے ذرائع ابلاغ نوں نشانہ بنانا اک جنگی جرم اے۔ اے پی ایڈیٹر سیلی بزبی دے مطابق اک دہائی توں ایہناں دے دفاتر ایہناں عمارتاں وچ قائم سن تے اسرائیل نے ایہناں نوں کدی نہیں دسیا کہ حماس یا ایس دی انٹیلی جنس فورس ایہناں عمارتاں وچ موجود اے۔ اوہناں نے اسرائیل فضائی حملیاں وچ میڈیا ہائوسز نوں نشانہ بنان و رہائشی عمارتاں نوں مہندم کیتے جان اُتے تحقیقات دا مطالبہ کیتا۔اسرائیل دا واضح مقصد سی کہ میڈیا کوریج نوں روکیا جائے تے دنیا نوں اسرائیلی جارحیت توں آگاہ نہ ہون دتا جائے۔ دوران جنگ ایہہ عالمی قانون اے کہ شہری آبادی نوں کسے صورت نشانہ نہیں بنایا جائے گا پر اسرائیل نے بین الاقوامی قوانین دی دھجیاں اڑاندے ہوئے براہ راست شہری آبادی اُتے فضائی حملے کیتے جس دے مناظر پوری دنیا وچ ویکھے گئے۔ اسرائیلی وزیراعظم میڈیا دے خلاف ہون والی کاروائی دا بھونڈا دفاع کردے ہوئے کہندے نیں کہ حماس ایہناں عمارتاں نوں اپنی کاروائیاں لئی استعمال کر رہی سی۔ امریکہ دے صدر بائیڈن پائیدار سکون، دے ناں اُتے اسرائیل دا ساتھ دے رہے نیں۔ مسلماناں دے مذہبی تہوار دے دن وی فلسطینیاں نوں نشانہ بنانا اسرائیلی فسطائی سوچ نوں مزید آشکار کردی اے۔
قابل افسوس کردار امریکہ دا ایس ویلے ساہمنے آیا جدوں سلامتی کونسل وچ چین، ناروے تے تیونس ولوں اسرائیل دے خلاف پیش کیتی جان والی قرار داد نوں امریکہ نے ویٹو کر دتا۔ اسرائیلی وزیراعظم نے امریکہ دا شکریہ ادا کیتا۔ اک پاسے امریکہ حملیاں نوں اسرائیل دا دفاعی حق قرار دیندا اے تے دوجے پاسے فلسطین اُتے ڈھائی جان والی قیامت اُتے افسوس دا اظہار وی کردا اے۔ سلامتی کونسل وچ تسلیم کیتا گیا کہ اسرائیل دی کاروائیاں غیر قانونی نیں تے مہلک طاقت دے سخت استعمال نال انسانی حقوق دا استحصال ہویا اے۔ اسرائیل اُتے سلامتی کونسل دا دبائو ودھن دی امید سی پر امریکہ اسرائیل دے خلاف کسے وی قرار داد نوں ویٹو کرن وچ تامل نہیں کردا۔ امریکہ اپنے ایس عمل توں اپنے خلاف نفرتاں نوں فروغ ای دیندا آیا اے جس دی وجہ نال پوری دنیا وچ امریکی مفادات نوں نقصان اپڑن دا ڈر رہندا اے۔ چین نے اسرائیل تے فلسطین دے مابین مذاکرات دی میزبانی دی وی پیشکش کیتی تاں ایتھے ایہناں مسلم اکثریتی ملکاں دا کردار وی مایوس کنہاں نظر آندا اے جنہاں نے اپنے مفادات دے تحت اسرائیل دے نال سفارتی تعلقات بحال کردے ہوئے فلسطینیاں دے حقوق دے دفاع دا وی ذکر کیتا سی پر ایہناں دی مجرمانہ خاموشی ثابت کر رہی اے کہ ایہناں نوں فلسطینیاں توں زیادہ اپنے فروعی مفادات زیادہ عزیز نیں۔ IDF دا کہنااے کہ اک ہفتے وچ 3100 راکٹاں توں اوسرائیل نوں نشانہ بنایا گیا۔آئی ڈی ایف دے مطابق ایہناں نوں ملکی تاریخ وچ راکٹ فائر دے سب توں زیادہ روزانہ حملیاں دا ساہمنا اے۔ ایہناں حملیاں وچ اٹھ اسرائیلی ہلاک ہو چکے نیں۔ اسرائیلی فوج دے مطابق اوہناں نے اپنے جدید سکیورٹی سسٹم دی وجہ نال اک ہزار راکٹاں نوں روک لیا سی جد کہ 450 راکٹ غزہ دی پٹی وچ ڈگے۔راکٹ حملیاں نے اسرائیل دے جدید ترین نظام نوں متاثر کیتا، راکٹ حملے دی صورت وچ اسرائیلیاں دے کول صرف 15 توں 90 سیکنڈ دا ویلا ہوندا اے تے ایس دا انحصار وی ایس گل اُتے اے کہ جدوں سائرن وجدے نیں تے اوہ غزہ دی پٹی توں کنہے دور ہوندے نیں۔ اقوام متحدہ وچ امریکی سفیر تھامس گرین فیلڈ نے حماس توں راکٹ حملیاں تے اشتعال انگیزیاں نوں فوری طور اُتے روکن دا مطالبہ کیتا۔ اوہناں نے سارے فریقاں اُتے زور دتا کہ اوہ اشتعال انگیز، پر تشدد حملیاں تے دہشت گردی دی کاروائیاں دے نال نال انخلاء توں وی باز رہن۔ جنہاں وچ مشرقی یروشلم، انہدام تے 1967ء دی لائناں دے مشرق وچ آبادکاری دی تعمیر وی شامل اے۔ امریکی خصوصی ایلچی ہادی امر وی اسرائیلی تے فلسطینی عہدیداراں نال گل بات لئی اسرائیل اپڑے۔ امریکی وزیر خارجہ انٹونی بلنکن نے وی مصری وزیر خارجہ سمہ شوگری نال گل کیتی، جیڑے فائر بندی لئی ثالثی کر رہے نیں۔
اسرائیلی حملیاں و جارحیت دے خلاف پوری دنیا وچ مسلماناں نے احتجاجی مظاہرے کیتے پر ایہناں مظاہریاں دے خلاف وی کاروائیاں کیتیاں جا رہیا نیں۔ برطانیہ دی پولیس فلسطینیاں دے مظاہرے وچ اسرائیل مخالف نعراں دے خلاف سوشل میڈیا وچ زیر گردش فوٹیج دی مدد توں قانونی کاروائیاں لئی پچھ گچھ شروع کر چکی اے۔ برطانیہ وچ موجود یہودیاں دے خلاف فلسطینی حامیاں ولوں مظاہرے اُتے برطانیہ دے وزیراعظم بورس جانسن نے برطانیہ دے یہودیاں دے نال اظہار یکجہتی کردے ہوئے کہیا کہ اوہ ایہناں دے نال کھڑے نیں۔ ایہو وجہ اے کہ حالیہ برساں وچ ، اقوام متحدہ دی سلامتی کونسل دی ساری قرار داداں اُتے حقیقت وچ پوری طرح توں عمل درآمد نہیں ہویا، خاص طور اُتے جدوں فلسطینیاں نوں اپنی ریاست خود بنان دا حق حاصل اے۔ اسرائیل حالیہ کشیدگی نوں جائیداد دے تنازع وچ تبدیل کرن لئی اپنی جارحیت نوں درست قرار دیندا اے۔ اسرائیل دے اقوام متحدہ وچ سفیر گیلڈاردن نے سلامتی کونسل دے اجلاس وچ کہیا کہ حماس سیاسی اقتدار دے حصول لئی اسرائیل اُتے وڈے پیمانے اُتے حملے کر رہی اے۔ ایہناں دا مزید کہنا سی کہ فلسطینی اتھارٹی دے صدر محمود عباس دی وجہ نال انتخابات وچ تاخیر دی وجہ نال عسکریت پسند گروپ وچ کشیدگی ودھی۔ فلسطینی اتھارٹی نے امریکہ توں مداخلت دی اپیل کیتی سی جد کہ وزیر خارجہ ریاض الملکی نے اقوام متحدہ دے سلامتی کونسل دے اجلاس وچ امریکہ نال مطالبہ کیتا کہ ساڈے لوکاں، گھراں، سرزمین اُتے جارحیت تے حملہ ختم کرن لئی وی اپنا کردار ادا کرن۔ اوہناں نے امریکہ اُتے نسل پرستی دا سنگین الزام وی عائد کیتا۔ مسلم اکثریتی ملک روایتی رسمی طور اُتے اسرائیل دے ناجائز اقدامات دی مذمت تے کر رہے نیں پر ایہہ فلسطین دے مسئلے دا حل نہیں۔ انسانی حقوق دے علمبردار ملکاں سنے مسلم اکثریتی ملکاں نوں اقوام متحدہ دی قرار داداں دے مطابق یہودی غیر قانونی آبادی کاری نوں روکن تے دو ریاستی حل لئی اپنا مثبت کردار ادا کرنا ہوئے گا۔ اسرائیل دے خلاف عرب ملکاں وچ اج وی اینی جنگی قوت نہیں کہ اوہ ایس جارحیت نوں روک سکن۔ اقتصادی ہتھیار استعمال کر کے مشرق وسطیٰ وچ طاقت دے پیمانیاں نوں تبدیل کر سکدے نیں پر ایس لئی ایہناں نوں فروعی مفادات توں باہر نکل کے اجتماعیت ول آنا ہوئے گا تے مسلم امہ نوں در پیش مسائل توں نکلن لئی متحد ہونا پئے گا۔