فلسطین وچ خون دی ہولی

قیوم نظامی

برصغیر دے مسلماناں دا فلسطین دے نال ہمیشہ ذہنی قلبی نظریاتی تے مذہبی تعلق رہیا اے۔ قائداعظم تے مسلم لیگ تسلسل دے نال فلسطین دی آزادی لئی اواز چکدے رہے۔ فلسطین دی حمایت وچ 1935توں 1946 تیکر 18 قرار داداں منظور کیتیاں گئیاں۔ مسلم لیگ باقاعدگی دے نال یوم فلسطین اُتے سیاسی سرگرمیاں دا انعقاد کر کے فلسطینی عوام دے نال اظہار یکجہتی کردی رہی۔ 23 مارچ 1940 نوں قرار داد لہور منظور کیتی گئی ایس تاریخی موقعے اُتے فلسطین دے نال یکجہتی دی قرار داد وی منظور کیتی گئی۔
پاکستان ایس پالیسی اُتے پورے عزم تے ایمانی جذبے دے نال کاربند رہیا اے۔ اسرئایل طاقت دے نشے وچ دھت اے تے اجکل حسب فطرت تے روایت بے بس تے مظلوم فلسطینیاں اُتے فضائی تے زمینی حملے کر کے خون دی ہولی کھیڈ رہیا اے۔اسرائیلی فوجی جدید اسلحہ نال لیس ہو کے مسلماناں دے مقدس مقامات قبلہ اول تے مسجد الاقصیٰ اُتے حملے کر رہی اے۔ بے یارومددگار مظلوم تے بے بس فلسطینی عوام اپنے معصوم بالاں دے لاشاں ہتھاں وچ چکے اسمان ول ویکھ کے اپنے رب نوں سد رہے نیں کہ ایہناں دے خون دے نال ہولی کدوں تیکر کھیڈی جاندی رہوے گی۔
اسرائیل دی ننگی جارحیت دی وجہ نال 218 بے گناہ فلسطینی شہید ہو چکے نیں جنہاں وچ 60 معصوم بچے وی شامل نیں جد کہ پنج ہزار چھ سو فلسطینی زخمی ہوئے نیں۔ اسرائیل دے ایہہ حملے یکطرفہ نیں جنہاں دا کوئی جواز نہیں۔ عالمی ضمیر مجموعی طور اُتے خاموش اے تے اسرائیلی وزیراعظم دھمکی آمیز تے اشتعال انگیز بیانات جاری رہیا اے کہ اوہ فلسطینی علاقیاں اُتے حملے جاری رکھے گا۔
اسرائیل نے فلسطینی علاقیاں اُتے اپنی طاقت دے بل بوتے اُتے ناجائز قبضہ کر رکھیا اے تے ایس دے توسیع پسندانہ عزائم ہجے تیکر ختم نہیں ہوئے، اوہ پورے مشرق وسطیٰ اُتے قبضہ کرن دا خواب ویکھ رہیا اے۔ اسلامی ملکاں دی تنظیم او آئی سی دا کردار ہمیشہ بزدلانہ تے موقع پرستانہ ای رہیا اے۔ افسوس اکثر مسلمان ملک امریکہ تے اسرائیل دے اثر و رسوخ وچ آ چکے نیں۔
او آئی سی نے فلسطین دی صورت حال اُتے ہنگامی اجلاس تے منعقد کیتا اے پر ایس اجلاس وچ وی ایس نے اپنی بزدلانہ روایت نوں قائم رکھدے ہوئے صرف ایہہ بیان جاری کر دتا اے کہ سلامتی کونسل فلسطین دی صورتحال دا نوٹس لے کے فوری مداخلت کرے تے اسرائیل نوں جارحیت توں روکے۔
پاکستان جاگو تحریک دے اعزازی مشیر سابق آئی جی پولیس تے ڈی جی آئی بی محترم شوکت جاوید نے اپنے ٹوئٹر پیغام وچ درست کہیا اے کہ اک پاسے اسرائیل غزوہ اُتے قبضہ کرن دی دھمکی دے رہیا اے تے دوجے پاسے او آئی سی دا کمزور رد عمل عالم اسلام دے مسلماناں  لئی تشویش دا باعث اے۔
او آئی سی نوں صورتحال دی سنگینی دے مطابق اسرائیل نوں سفارتی تے تجارتی تعلقات منقطع کرن دی دھمکی دینی چاہیدی سی۔ دنیا دا عالمی ادارہ اقوام متحدہ وی عالمی رائے عامہ دی نظر وچ اپنی اہمیت تے وقار کھوندا جا رہیا اے تے اپنی بنیادی ذمہ داری عالمی امن دے قیام وچ یکسر ناکام ہو چکیا اے۔ فلسطین تے کشمیر منہ بولدے ثبوت نیں اقوام متحدہ دے شرمناک کردار اُتے غالب دا ایہہ شعر صادق آندا اے۔
جب توقع ہی اٹھ گئی غالب
کیا کسی کا گلہ کرے کوئی
سلامتی کونسل نے ہنگامی اجلاس تے بلایا اے پر ایس وچ کوئی واضح تے ٹھوس موقف اختیار نہیں کیتا گیا۔ سلامتی کونسل دی قرار داد وچ اسرائیل نال مطالبہ کیتا گیا اے کہ اوہ جغرافیائی تے علاقائی تبدیلیاں توں باز رہوے۔

فلسطین اُتے حملے فوری بند کرے دو ریاستاں دے قیام دے اصول اُتے واپس آئے تے فلسطینیاں دی تنظیم حماس اسرائیل اُتے راکٹ حملے بند کر دیوے۔ فلسطین وچ صورتحال ایس قدر کشیدہ ہو چکی اے کہ کجھ عالمی مبصر وڈی جنگ دی خبراں دے رہے نیں۔ سلامتی کونسل دے اجلاس وچ چین دا رد عمل ہمیشہ وانگوں دلیرانہ تے منصفانہ رہیا اے جد کہ سلامتی کونسل دے اکثر رکن ملک خفیہ طور اُتے اسرائیل نوں ہلہ شیری دیندے رہندے نیں۔
افسوس عالم اسلام دے حکمران تے مسلمان بے حس تے بے ضمیر ہو چکے نیں۔ بھٹو شہید نے اسلامک بلاک بنان ل ئی سنجیدہ تے پر عزم کوششاں کیتیاں سی پر ذوالفقار علی بھٹو شہید تے سعودی عرب دے بادشاہ شاہ فیصل نوں امریکہ نے مسلماناں دے ہتھاں ای شہید کروا دتا جیہڑا مسلماناں دی تاریخ دا المناک باب اے۔
عالمی تاریخ گواہ اے کہ امریکہ تے اسرائیل اقوام متحدہ دی پرواہ نہیں کردے تے اوہ پوری دنیا وچ جتھے چاہندے نیں جارحیت تے دہشت گردی کردے نیں جس دے رد عمل وچ القاعدہ داعش تے طالبان جہی دہشت گرد تنظیماں پیدا ہوندیاں نیں۔ دنیا دے اوہ ملک جیہڑے نیک نیتی دے نال عالمی امن اُتے یقین رکھدے نیں ایہناں نوں متحد ہونا پئے گا تے عالمی امن نوں یقینی بنان لئی سرگرم تے پرعزم سفارتی کردار ادا کرنا پئے گا۔ اسرائیل دی دہشت گردی اُتے مبنی جارحیت دے خلاف امریکہ تے یورپ دے ملکاں وچ احتجاجی مظاہرے ہوئے نیں پر عالم اسلام دی سیاسی تے مذہبی تنظیماں دا کردار افسوسناک بلکہ شرمناک ای رہیا اے۔
پاکستان دے وفاقی وزیر خارجہ شاہ محمود قریشی نے قومی اسمبلی دے اجلاس وچ بیان دیندے ہوئے کہیا اے کہ فلسطین دے بارے وچ پاکستان دے واضح تے دو ٹوک موقف اختیار کیتا اے جس دا اعتراف فلسطینی قیادت نے وی کیتا اے۔ قومی اسمبلی نے متفقہ قرار داد منظور کر کے فلسطین اُتے اسرائیلی حملے دی مذمت کیتی تے فلسطینیاں نال یکجہتی دا اظہار کیتا۔ پاکستان تحریک انصاف دی حکومت وچ جدوں کوئی ناانصافی دا واقعہ ساہمنے آندا اے تے ذہنی اذیت دا ساہمنا کرنا پئے گا۔

پاکستان دی گورننس دا نظام ظالمانہ تے منتقمانہ ہو چکیا اے۔ حسد بغض تے کینہ جہی سماجی بیماریاں جنہاں دی قرآن وچ ممانعت کیتی گئی اے پاکستانی سماج وچ عروج اُتے اپڑ چکی اے۔ جیہڑے افرادنیت تے دیانت دے نال محنت کردے نیں ایہناں دی حوصلہ افزائی کرن دی بجائے ایہناں دے رستے وچ روڑے اٹکائے جاندے نیں۔ محترمہ پروفیسر راشدہ قریشی جیہڑا اک کالج دی پرنسپل نیں لہور دے نظریاتی فکری تے صحافتی حلقیاں وچ جانی پہچانی شخصیت نیں۔ ایہناں نوں اج کل حسد تے انتقام دا نشانہ بنایا جا رہیا اے۔

قانون تے قواعد و ضوابط دے مطابق اوہ اپنی محنت تے دیانت دی بنا اُتے گریڈ 20 دی حقدار نیں پر افسوس ایہناں نوں اپنے ایس جائز حق توں محروم کرن لئی مختلف قسم دی سازشاں کیتی جا رہیاں نیں۔ ایس سازش دے تحت ایہناں دے خلاف اک نکی انکوائری نوں بنیاد بنایا جا رہیا اے۔ 19 تے 20 گریڈ وچ ترقی دین دا اختیار وزیراعلیٰ پنجاب نوں اے۔ پنجاب دے وزیراعلیٰ محترمہ عثمان بزدار تے چیف سیکرٹری پنجاب نال درخواست اے کہ اوہ ایس کیس دا نوٹس لے کے محترمہ راشدہ قریشی نوں ایہناں دا قانونی حق دے کے تحریک انصاف دی حکومت وچ انصاف دی عملداری نوں یقینی بنان۔