جلنے والے دا منہ کالا

لكهت:وسعت اللہ خان

بچپن توں سانوں گھر‘ سکول ‘بچیاں دے رسالیاں تے تعلیمی نصاب راہیں جو سبق آموز قصے سنن نوں ملے اوہناں وچوں ایس قسم دے کئی واقعات وی شامل سن کہ ماضی دے مسلمان حکمران لوکاں دے دکھ درد تے مسئلیاں توں اپنے آپ نوں باخبر رکھن لئی کیہ کیہ جتن کردے سن۔ نوعمری وچ سنیا ایہ واقعہ مینوں ہن تک یاد اے کہ ریاست مدینہ دے حکمران حضرت عمر بن خطابؓ راتاں نوں بھیس وٹا کے گلیاں وچ گھمدے سن۔ اپنے موڈھیاں تے کھان پین والیاں شیواں دا بھار چک کے سفید پوشاں دے گھر خاموشی نال اپڑاندے سن۔ بیواواں تے یتیماں دی خبرگیری کردے سن۔ بھیس وٹا کے لوکاں دے دکھ درد معلوم کرن دا طریقہ اموی خلیفہ عمر بن عبدالعزیز تے عباسی خلیفہ ہارون رشید توں وی منسوب اے۔ ایہدے کئی فائدے سن۔ اک تے حکمران نوں بیوروکریسی سب اچھا کشل منگل دی جہڑی رپورٹ دیندی ہووے گی اوہدی غلط یاں صحیح بارے حکمران نوں براہ راست پتہ چلدا ہووے گا۔ آپ گشت کرن دے ذاتی تجربے دی روشنی وچ حکمران نوں عوامی فلاح و بہبود بارے ٹھیک فیصلے کرن وچ آسانی رہندی ہووے گی۔ نیز حکمران نوں ایہ وی پتہ لگ جاندا سی کہ اوہدے آل دوالے عمل داراں دا جہڑا حلقہ اے اوہ کنی صحت دے نال روزمرہ عوامی مسئلے حکمران دے علم وچ لیاندا اے۔ ایس حلقے وچ کون خوشامدی اے‘ کون تساہل پسند اے‘ کون کناں سچ تے جھوٹ بولدا اے تے کون کھرا یاں کھوٹا اے۔
پر اوہو لوک جہڑے ماضی دے حکمراناں دی عوام دوستی دے قصیاں تے سر جھون دے تے اوہناں نوں یاد کرکے سبحان اللہ کہندے نہیں تھکدے۔ جدوں ایہو دردمندی دور جدید دا کوئی زندہ حکمران وکھاندا اے تے اوہدی نیت تے فوراً شک دا اظہار ہون لگ پیندا اے۔ دال وچ کالا ظاہر کیتا جاندا اے۔ تشہیر تے فوٹو سیشن دا تماشا گر دسیا جاندا اے۔ تعصب دے انھے پن وچ حکمران دی خوش نیتی نوں داغدار کرن دی ہر ممکن کوشش کیتی جاندی اے۔ ساڈے وچوں بہت ساریاں نوں یاد ہووے گا کہ جدوں جنرل ضیاء الحق نے اک دن ملک وچ سادگی نوں فروغ دین لئی سائیکل تے سواری دا علامتی مظاہرہ کیتا تے یار لوکاں نے ایس پیغام دی اصل روح سراہن دی تھاں ایس مظاہرے وچ وی کیڑے کڈھ لئے سن۔ طعنہ زنی شروع ہو گئی کہ اک کلومیٹر تک سائیکل سواری راہیں سادگی نوں فروغ دین دا تماشا قومی خزانے نوں کئی لکھ روپیے وچ پیا۔ صدر مملکت دے باڈی گارڈز وی سائیکلاں تے سوار ہو کے جنرل صاحب نوں گھیرے ہوئے سن۔ جس عام بندے نوں درس سادگی دینا مقصود سی اوہنوں سائیکل سواری دے مقررہ راستے تے پر مارن دی وی اجازت نہیں سی۔ عام ٹریفک کئی گھنٹے رکیا رہیا تاں جے سائیکل بردار صدر مملکت دا سادگی نواز فوٹو سیشن خیریت نال مکمل ہو جاوے وغیرہ وغیرہ۔
جدوں خادم اعلیٰ شہبازشریف بارشاں دے بعد لہور دے نشیبی علاقیاں دے متاثرین نال اظہار یکجہتی لئی لانگ بوٹ پا کے تن تن فٹ پانی وچ کھڑے ہوئے تے اتفاقاً اوتھوں لنگھدے کسے فوٹو گرافر نے ایہ منظر محفوظ کر لیا اودوں وی خادم اعلیٰ دے ایس قابل قدر جذبے نوں رنگ بازی تے سستی شہرت دا مظاہرہ قرار دتا گیا۔ پچھلے ورھے جدوں وزیراعلیٰ عثمان بزدار مون سون وچ لوکاں دیاں تکلیفاں توں بذات خود جانکاری لئی بناں سکیورٹی دے اپنی لینڈ کروزر ڈرائیو کردے ہوئے لہور دیاں پانی والیاں سڑکاں تے نکلے تے موسلادھار بارش وچ فٹ پاتھ تے پھسے اک خاندان نو ںاپنی لینڈ کروزر وچ لفٹ دے کے منزل تک اپڑایا اودوں وی کسے نے واہ واہ نہیں کیتی۔ الٹا عثمان بزدار تے سستی ڈرامے بازی دا الزام لگ گیا تے کجھ دیہاڑ پہلاں ایہو کجھ جدید ریاست مدینہ دے حکمران عمران خان نال کرن دی کوشش کیتی گئی۔ عمران خان کرونا دے دور وچ وی ایس او پیز تے عملدرآمد دا حقیقی احوال جانن لئی اپنی گڈی آپ چلاندے ہوئے بناں سکیورٹی دے اسلام آباد دے عوامی مرکز دے دورے تے سینیٹر فیصل جاوید تے سی ڈی اے دے افسر اعلیٰ دے نال نکل پئے۔ اوہو لوک جہڑے حکمران تے عوام وچ موجود فاصلے مٹان دی لوڑ تے لمیاں لمیاں تقریراں کردے نہیں تھکدے تے وی آئی پی کلچر دی مذمت وچ دن رات اک کیتی رکھدے نیں۔ اوہناں اعتراضیاں نے وزیراعظم دے اچانک عوامی دورے دے پس پشت مثبت ارادے نوں سراہن دی تھاں اوہدے وچ وی میم میخ کڈھن دا موقع ہتھوں نہیں جان دتا۔ کسے جھل ککڑے نوں بس ایہ وکھائی دتا کہ جے ایہ دورہ واقعی اچانک سی تے وزیراعظم دی آمد توں پہلاں مخصوص علاقے وچ عام ٹریفک کہدی اطلاع تے روک دتی گئی۔ دو سیکٹراں وچ موبائل فون دے سگنلز کیویں جام ہو گئے۔ ایہناں افلاطوناں وچوں کسے نے وی ایمانداری نال ایس گل دا ذکر نہیں کیتا کہ بناں محافظاں دے سیلف ڈرائیو کرن والے وزیراعظم ہر اوس سگنل تے رکدے سن جتھے لال بتی روشن سی۔ ایہدی گواہی وزیراعظم دے ہمسفر سینیٹر فیصل جاوید نے دتی اے۔
جدوں کوئی معقول دلیل ہتھ نہ آئی تے فیر ایہ پھپھولے پھوڑے گئے کہ تصویراں وچ صرف ٹھیلے والے نظرآ رہے نیں آل دوالے خریدار کیوں وکھائی نہیں دے رہیا۔ ہر ٹھیلہ غیرمعمولی صاف ستھرا کیوں اے تے ہر ریڑھی والے نے ماسک کیوں لایا ہویا اے۔ اسلام آباد دے دوجے سیکٹراں وچ ایناں قنون پسند تے ایس او پیز دی مکمل پاسداری کرن والے ٹھیلہ بردار کیوں گھٹ نیں۔ فیس بک دے اک گفتار غازی نے تے پورا افسانہ ای کھچ دتا۔ تسیں وی پڑھو تے فیر اجہی منفی ذہنیت تے ماتم کرو جو ہر اچھے کم وچ وی جگت بازی دا موقع کڈھن وچ زندگی ضائع کر دیندے نیں۔ موصوف لکھاری دے بقول وزیراعظم نے گوشت مارکیٹ دا دورہ کیتا۔ بڑی صاف و شفاف مارکیٹ وچ چہل قدمی کردے ہوئے وزیراعظم اک قصائی دے کول جا کے کھلوتے۔ صفائی ستھرائی دی تعریف کیتی تے پچھیا گوشت تے چنگا وکدا ہووے گا۔
قصائی: صبح توں اک کلو وی نہیں وِکیا۔
وزیراعظم: کیہ وجہ اے؟
قصائی: کیوں جے تہاڈے آن پاروں خریداراں نوں مارکیٹ وچ آن ای نہیں دتا گیا۔
وزیراعظم: اوہو فیر تے میں چار کلو خرید لواں گا۔
قصائی: میں تہانوں گوشت نہیں دے سکدا۔
وزیراعظم: کیوں؟
قصائی: کیوں جے تہاڈی حفاظت لئی ساڈے توں چھریاں لے لئیاں گئیاں نیں۔
وزیراعظم: تے توں بناں وڈھ ٹک دے وی مینوں دے سکنا ایں۔
قصائی: نہیں میں نہیں دے سکدا۔
وزیراعظم: کیوں؟
قصائی: کیوں جے میں سکیورٹی اہلکار آں قصائی نہیں۔
وزیراعظم عصے نال: جا چھیتی اپنے سینئر افسر نوں سد کے لیا۔
قصائی: سوری سر انج نہیں ہو سکدا۔
وزیراعظم کیوں؟
قصائی: کیوں جے سامنے والی دکان تے اوہ مچھلی فروش بن کے کھلوتا اے۔
ہن مینوں دسو کہ انج دیاں اٹائیں سٹائیں اڑان والے چھچھورے گپ بازاں دا کیہ علاج اے؟۔ (بشکریہ ایکسپریس)