ارباں ڈالر دی سرمایہ کاری

محمد اسلم خان

متحدہ عرب امارات نے پاکستان نوں دو ارب ڈالر بلاسود امدادی قرض دی واپسی دی مدت وچ اک ورھے دی توسیع کر دتی اے پر سنیا اے کہ سعودی عرب تے قطر توں متوقع 30ارب ڈالر دی سرمایہ کاری دی راہ وچ کجھ رکاوٹاں اجے باقی نیں۔متحدہ عرب امارات نے ابوظہبی وچ وزیرخارجہ شاہ محمود قریشی تے اماراتی ہم منصب شیخ عبد بن زاید النہیان وچکار ملاقات وچ امدادی قرض دی واپسی دی مدت وچ توسیع بارے دسیا۔ ایس امدادی قرض دی واپسی دی ڈیڈلائن 19اپریل 2021ء نوں ختم ہو چکی سی ایس طرح متحدہ عرب امارات نے پاکستان نوں اک واری فیر ریلیف دے دتا اے۔
اودھر اسلام آباد وچ ڈرائنگ رومز وچ چائے دی پیالی وچ طوفان برپا کرن وچ مشہور دانشور اپنے ذریعے دے حوالے نال تیراندازی کردے نیں۔ وزیراعظم عمران خان نوں تیار کیتا جا رہیا اے کہ اوہ مریم نوازشریف دی لندن روانگی وچ رکاوٹاں دور کرن تاں جے سعودی عرب تے قطر توں 30ارب ڈالر مالیت دی سرمایہ کاری پاکستان وچ آن دی راہ پدھری ہو سکے۔ قطر نے تے مصر دی طرز تے پاکستان نوں نقد قرض دین دی مشروط پیش کش وی کر دتی اے۔واللہ علم بالصواب۔ پر سرمایہ کاری بورڈ دے پچھلے چیئرمین نے پچھلے مہینیاں اپنے استعفے وچ 30ارب ڈالر دی سرمایہ کاری دی راہ وچ جہڑیاں رکاوٹاں دا ذکر کیتا سی اوہناں وچ لکھیا گیا سی کہ عدم تحفظ دا شکار بیوروکریسی دا ڈھانچے‘ سیاسی مداخلت‘ ناتجربے کار تے معلومات توں عاری بندیاں دی بیرونی سرمایہ کاری لئی تعیناتی بنیادی وجوہات نیں۔ اوہ معاشی پالیسیاں وچ عدم استحکام‘ افسرشاہی دی مزاحمت‘ سرمایہ کاری لئی بیرون ملک متعین کجھ کمرشل قونصلراں تے وزیراں دیاں نامزدگیاں وچ سیاسی مداخلت تے پروقار طریقے نال مستعفی ہوئے سن۔
ٹیکنوکریٹس نوں غیرمنصفانہ انداز وچ عہدے توں برطرف کرن دے ودھدے ہوئے رجحان نے اوہناں دا ایہ فیصلہ ٹھیک ثابت کیتا‘ پالیسیاں تے افسرشاہی دے اثرانداز ہون پاروں اوہ اپنی پیشہ ورانہ ذمے واریاں نہیں سن نبھا رہے۔ قطر نے بنگلہ دیش وچ پنج ارب ڈالر دی سرمایہ کاری کیتی اے جے پاکستان کوشش کردا تے ایہ سرمایہ کاری ایتھے وی آسانی نال آ سکدی سی۔ قطری کمپنیاں بنگلہ دیش وچ پاور سیکٹر‘ ایئرپورٹس‘ سیاحتی تھاواں دی تعمیر تے ہوٹل انڈسٹری وچ سرمایہ کاری کرن گئیاں۔
امیر قطر شیخ حمدالتھانی پاکستان لئی نرم گوشہ رکھدے نیں۔ اوہ چاہندے نیں کہ قطری کمپنیاں پاکستان وچ سرمایہ کاری کرن۔ پاکستان دی موجودہ حکومت نوں ایس سنہرے موقعے توں فائدہ چکنا چاہیدا اے۔ قطر انویسٹمنٹ اتھارٹی تے نیبراس پاور دے سربراہواں نے کجھ چر پہلاں اسلام آباد دا دورہ وی کیتا سی۔ ایس دورے دوران اوہناں نے وزیراعظم عمران خان سنے دوجے اعلیٰ حکام نال ملاقات کیتی سی۔ بعد وچ قطر دی سرمایہ کاری بارے سوال کیتا گیا تے اوہناں دا جواب سی کہ پاور سیکٹر‘ ایئرپورٹس دی تعمیر تے ہوٹلاں لئی پنج ارب ڈالر دی سرمایہ کاری دے حوالے نال گل ہوئی اے۔ کجھ تجزیہ نگاراں دا خیال اے کہ بنگلہ دیش نے قطری سرمایہ کاراں نوں اپنے ول کھچ لیا۔٭٭