بِناں حکم دے مرن نہ اوہ بندے

لكهت: جاوید پنچهی

غور نال پرکھیا جائے تے میاں نواز شریف دی شخصیت سگویں حضرت حسین بن منصور حلّاج ورگی اے تے میاں شہباز شریف دا مزاج شبلی ورگا اے۔
حسین بن منصور حلاج ہوراں تے الزام سی کہ :’’حسین شورش پسنداں نال اُٹھدا بہندا اے۔ا وہ بغداد دیاں گلیاں وچ لوکائی نوں واعظ و نصیحت کردا اے‘‘(یعنی لوکائی نوں حکومت وقت خلاف بغاوت کرن تے اُکساندا اے)
نواز شریف تے وی ایہو الزام اے کہ اوہ لندن بہہ کے پاکستان وچ’’مقتدر‘‘ طاقتاں خلاف گل کردا اے،جہدی وجھا نال پاکستانی لوکائی دے دلاں وچ ’’مقتدر حلقیاں‘‘ خلاف بغاوت جاگ پیندی اے۔
’’چونکہ حسین بن منصور حلّاج رائج نظام مالیات دے سخت خلاف سن اوہ نہیں سن چاہندے کہ لوکائی توں بے جا ٹیکس تے خراج وصول کیتا جائے تے اُس پیسے نوں عیش و عشرت راہیں اُڈایا جائے۔ ایس پاروں قدرتی طورتے اوہ لوک حسین دے دشمن ہو گئے جہناں داکم لوکائی توں ٹیکس وصول کرنا سی ۔ ایتھوں تک کہ محکمہ مال دا سارا عملا ای حسین دے خلاف اُٹھ کھلوتا‘‘
اِک طرحاں میاں نواز شریف وی ایہو کجھ چاہندا اے ۔ اوہدا مؤقف دوٹوک اے پئی اِک تے ’’ووٹ نال بنے وزیر اعظم نوں عزت دتی جائے، دوجا اوہنوں اپنی مرضی نال کم کرن دتا جائے تے لوکائی توں کٹھے کیتے ٹیکس دے پیسے ایویں ای کوئی ایشو بنا کے خرچ نہ کیتے جان۔ جے اوہ پیسے خرچ کیتے جان تے اوہناں دا آڈٹ وی ہونا چاہیدا اے۔
’’دشمناں نے ایہ مشہور کر دتا سی کہ حسین سیاسی شورش برپا کرنا چاہندا اے‘‘
ایتھے وی دشمناں نے میاں نواز شریف نوں چور، ڈاکو تے پتا نہیں کیہ کجھ آکھ کے مشہور کر دتا اے کہ ایہ بندہ لوکائی نوں ’’مقتدر حلقیاں‘‘ خلاف اُکسا رہیا اے۔
’’حسین بن منصور حلاج ہوراں خلاف مقدما چلیا تے جھوٹھے الزام لا کے جیل بھیج دتا گیا جتھے اوہ کِنے سال قید رہے‘‘
میاں نواز شریف تے وی جھوٹھے کیس بنا کے اوہناں نوں جیل بھیج دتا گیا جتھے اوہناں اپنی حیاتی دے چار پنج سال گزارے۔
’’شبلی(حسین بن منصور حلاج دے سجن) حسین دے انجام توں ڈر گئے سی ایس پاروں اوہ حسین دے عقائددی تردید کرن لگ پئے تاں جے حسین نوں مرن توں بچا لیا جائے‘‘
شایدمیں اُتے کدھرے دس چکیاں کہ میاں شہباز شریف دا مزاج شبلی ورگا اے ایسے پاروں اوہ اپنے وڈے بھرا نواز شریف نوں بلا وجھا دی موت توں بچانا چاہندا اے خورے ایہو وجھا اے کہ میاں شہباز شریف مفاہمت دی سیاست کر رہیا اے۔
’’خلیفہ وقت دا جوائی تے وزیر مالیات حامد جان بجھ کے اجہے حالات پیدا کرنا چاہندا سی تاں جے حسین نوں قتل کر دتا جائے۔حامد نے آکھیا: جے حسین نوں زندا چھڈ دتا گیا تے وڈا انقلاب آ جائے گا کیوں جے اوہ لوکائی نوں بغاوت کرن لئی تیار کر دے گا‘‘
ایتھے وی ’’کجھ لوک‘‘ جان بجھ کے اجہے حالات پیدا کرنا چاہ رہے نیں پئی کوئی وی سرپھریا کارکن اُٹھ کے میاں نواز شریف نوں (اللہ نہ کرے) قتل کر دیوے کیوں جے اوہناں نوں پتا اے کہ میاں نواز شریف پاکستانی لوکائی دے حق دی لڑائی لڑ رہیا اے تے بہت چھیتی ایس گل دا ادراک پاکستانی لوکائی نوں وی پوری طرحاں ہو جائے گا۔
’’حکومتی اداریاں وچ حسین دے دشمناں دی گھاٹ نہیں سی‘‘
پاکستانی حکومتی اداریاں وچ وی میاں نواز شریف دے دشمناں دی گھاٹ نہیں ۔ اوہ لوک میاں نواز شریف دے صرف ایس پاروں دشمن نیں کہ اوہناں نوں اقتدار پکا چاہیدا اے بھاویں کسراں ہووے ۔
’’ تاریخ دسدی اے کہ موسیٰ و فرعون، مسیح و ہیرودس، حسین ؑ و یزید، حلّاج و حامد، سید باب و ناصرالدین شاہ سدا نال نال رہے نیں۔بقول ڈاکٹرعلامہ محمد اقبال رحمۃ اللہ علیہ:
موسیٰ و فرعون و شبیر و یزید
ایں دو قوت از حیات آید پدید
’’حسین بن منصور حلاج تے دو وار مقدما چلیا تے کئی سال تک جیل وچ رہے‘‘
عجیب گل اے کہ میاں نواز شریف تے وی دو وار سیاسی مقدما چلیا تے اوہنے اپنی حیاتی دے قیمتی سال جیل وچ گزارے۔
ہر کسے دا اپنا اِک نظریا ہوندا اے تے اپنا پوائنٹ آف ویو ہوندا اے ۔ ہر بندا شیواں نوں اپنے زاویے نال ویکھدا تے بیان کردا اے۔ انج ای حسین بن منصور حلاج ہوراں دا وی اِک نظریا سی جہنوں اوہ اپنے لفظاں وچ انج بیان کردے نیں:
’’جدوں اللہ تعالیٰ کسے بندے نال محبت کردا اے تے لوکاں نوں اوہدے نال دشمنی تے آمادہ کر دیندا اے‘‘
ایہ گل نتر کے ساہمنے آ چکی اے کہ کجھ ناہنجار قسم دے لوک میاں نواز شریف خلاف اللہ واسطے دی دشمنی کر رہے نیں۔
گل کراہے نہ پے جائے ایس لئی میں اپنے اَصل موضوع ول آئوناں۔
۴ نقاب پوش بندیاں ولوں حسن نواز دے دفتر دھکے نال وڑن دی کوشش تے عین اوس ویلے حسن نواز دے دفتر وچ تِن وار دے پاکستانی وزیر اعظم رہن والے میاں نواز شریف دی موجودگی بذاتِ خود بڑا وڈا سوالیا نشان اے۔
دفتر وچ وڑن والے نقاب پوشاں نے میاں نواز شریف دے راکھیاں نال بحث وی کیتی۔ میاں نواز شریف دے گارڈز نے جدوں پولیس نوں سدیا تے اوہ چارے بندے دفتر چوں نکل گئے۔ لندن پولیس نے ایس وقوعے بارے چھان بین شروع کر دتی اے۔
دوجے پاسے مسلم لیگ ’’ن‘‘ دے صدر تے وفاقی اپوزیشن لیڈر میاں محمد شہباز شریف دا کہنا اے کہ:
’’لندن وچ نواز شریف تے حملے دی نیت نال چار نقاب پوشاں دا حسن نواز دے دفتر دھکے نال وڑنا انتہائی قابل مذمت ، شرم ناک تے تشویش ناک امر اے ۔ اللہ تعالیٰ دا شکر اے کہ نواز شریف ایس حملے وچ سلامت رہے نیں۔
شہباز شریف دا کہنا اے کہ نقاب پوش حملا آوراں دا اسلحے سنے نواز شریف تے حملے دی نیت نال حسن نواز دے دفتر وڑنا لمحہ فکریا اے ۔ لندن پولیس تے متعلقا حکام ایس واقعے بارے پوری چھان بین کرائون تے ایہدے وچ شامل عناصر نوں قانون مطابق سخت سزا دتی جائے‘‘
میاں نواز شریف دی بیٹی تے ’’ن‘‘ لیگ دی نائب صدر محترما مریم نواز دا ٹویٹر تے بیان وچ کہنا اے: ’’جیل وچ نواز شریف دی حیاتی نال کھلواڑ کرن والے ہُن تک نہیں مُڑے‘‘۔
مریم نواز دا کہنا اے کہ نواز شریف دا مقابلا اوس سوچ نال اے جہنے میری بیمار ماں دیاں تصویراں بنائون دی کوشش کیتی، کراچی ہوٹل وچ میرے کمرے دا دروازا توڑیا تے اج فیر نواز شریف تے حملا کرن دی کوشش کیتی۔ خدا کسے نوں کم ظرف تے بزدل دشمن نہ دے ‘‘
اک ہور ٹویٹ وچ مریم نواز صاحبا دا کہنا سی کہ:
’’سیاسی مایوسی تے ہار دے عالم وچ جرم دا سہارا لے کے تیجے درجے دے مجرماں راہیں لوکائی دی آواز نوں گھٹ یا خاموش نہیں کیتا جا سکدا‘‘
مریم بی بی دا کہنا سی کہ : ’’نواز شریف پاکستانی لوکائی دی آواز نیں تے لوکائی دی ایس آواز نوں چُپ نہیں کرایا جائے گا، ان شاء اللہ‘‘
ٹی وی توں ایہ خبر سُن کے میں سوچن تے مجبور ہو گیا کہ عدالت راہیں میاں نواز شریف دی نااہلی، مسجد وچ کسے ناہنجار شخص ولوں میاں نواز شریف ول چھتر سُٹیا جانا، خواجا آصف تے کالی سیاہی سُٹنا،کوٹ لکھپت جیل وچ میاں نواز شریف دے کھانے وچ زہریلی شئے دے اثرات ملنا، لاہور نیب آفس پیش ہون گئی مریم نواز دی گڈی تے حملہ، بلٹ پروف گڈی دی ونڈ سکرین وچ گولی لگن پاروں سوراخ ہو جانا، لاہور اک ریلی ویلے مریم بی بی دے سر وچ ڈنڈا وجنا ، کراچی ہوٹل وچ مریم بی بی دے کمرے دا دروازہ توڑیا جانا،مریم نواز دی بیٹی مہرالنساء دا ایکسیڈنٹ، میاں شہباز نوں عدالت ولوں اجازت دے باوجود ایئر پورٹ تے روک لینا، عید والے دن پنج دفتر کھلوا کے میاں شہباز شریف دا ناں ای سی ایل وچ پوانا تے فیر لندن وچ،میاں نواز شریف دی عین موجودگی ویلے چار نقاب پوش بندیاں دا اسلحہ سنے دھکے نال حسن نواز دے دفتر وڑنا، میاں صاحب دے گارڈز نال مونہ ماری کرنا کیہ ایس سب کجھ دے پچھے اِکو ای سوچ اے ؟
اوہ کون ہو سکدا اے جہڑا نواز شریف تے اوہدے خاندان توں اینا خوف زدہ اے پئی ہر صورت اوہناں نوں چُپ کروانا چاہندا اے۔
اجہی سوچ دے پچھے اَن ویکھی طاقت صرف میاں نواز شریف نوں چُپ نہیں کرانا چاہندی سگوں ۲۲ کروڑ لوکائی دی آواز نوں دبانا چاہندی اے۔ ایہ گل پکی اے پئی اجہی حرکت کرن والے بندے دا مشن میاں نواز شریف نوں نہ صرف پاکستانی سیاست توں دور رکھنا اے سگوں نواز شریف نوں یا اوہدے خاندان نوں نقصان اپڑا کے پاکستانی لوکائی خصوصاً مسلم لیگ ’’ن‘‘ دے نظریاتی کارکناں نوں مشتعل کرنااے تاں جے پاکستان دے حالات خراب ہون ، کشیدگی ودھے، افراتفری دی صورتحال پیدا ہو جائے تے پاکستانی لوکائی دا دھیان اوہدیاں ’’اپنیاں کرتوتاں‘‘ ول نہ جائے۔ ایہ وی پکی گل اے کہ ایس منصوبے پچھے جہڑا ذہن چل رہیا اے اوہ صرف میاں نواز شریف دا دشمن نہیں سگوں پاکستانی لوکائی دا دشمن اے، پاکستانی ترقی دا دشمن اے ،پاکستان دی سلامتی دا دشمن اے تے پاکستان دے وجود دا دشمن اے۔کیوں جے ہر اوسے بندے تے حملا ہو نا جہڑا پاکستان نال تے پاکستانی لوکائی نال پیار کردا اے۔جہڑا شخص ’’حکومت‘‘ تے تنقید کردا اے ۔ جہڑا ایہ پچھن دی کوشش کردا اے کہ پاکستانی لوکائی دے ٹیکس نوں ذاتی عیاشی لئی کیوں خرچ کیتا جا رہیا اے؟ ہر اوہ بندا جہڑا میاں نواز شریف دے بیانیے ’’ووٹ کو عزت دو‘‘ نال کھلوتا اے اوہی زیر عتاب کیوں اے؟ ایہ سب کجھ ویکھ کے آپ مہارے کئی سوال پیدا ہوندے نیں۔
میاں نواز شریف تے حملا کروان والا بندا نواز شریف توں نہ صرف ڈردا اے سگوں اوہنوں پتا اے کہ میاں نواز شریف دے ہُندیاں اوہدے ذاتی مقاصد پورے نہیں ہو سکدے تے نہ ای میاں نواز شریف نوں قانونی طور نقصان اپڑایا جا سکدا اے، اوہنوں ایہ وی پتا اے کہ میاں نواز شریف دی بیٹی مریم نواز نوں باپ دے ساہمنے گرفتار کرن دے باوجود میاں صاحب نوں نہیں توڑیا جا سکیا۔ کیوں نہ ہُن میاں صاحب تے مارُو حملا کروا کے اوہناں نوں ڈرا، دھمکا کے اپنی گل منوائی جا ئے۔
دوجے پاسے ایہ گل وی سوچن والی اے کہ لندن بیٹھے نواز شریف تے ایہ حملا جے پی ٹی آئی دے کسے رکن نے کروایا اے تے فیر اوہ دنیا دا سب توں وڈا بیوقوف انسان اے ۔ کیونکہ جے ایس گل دے شواہد لندن پولیس نوں مل جاندے نیں تے فیر کیہ میاں نواز شریف دی مقبولیت وچ وادھا نہیں ہووے گا؟ کیہ میاں نواز شریف پہلے توں وڈا ہیرو بن کے ساہمنے نہیں آوے گا؟ ایہ سارا کجھ سوچ کے بندا ایس نتیجے تے اپڑدا اے کہ میاں نواز شریف نوں راہ وچوں ہٹا کے فائدہ کہنوں ہووے گا؟
میری جاچے میاں نواز شریف نوں دشمناں توں محتاط رہنا چاہیدا اے۔ میں صرف ایہ آکھاں گا کہ جہڑا وی اپنے ذاتی فائدے یا اپنے مذموم مقاصد لئی میاں صاحب نوں رستے چوں ہٹانا چاہندا اے، اوہ جنی وی کوشش کر لوے، جنے وی جتن کر لوے ناکام رہے گا ۔کیوں کہ پنجابی صوفی شاعر حضرت سید وارث شاہ رحمۃ اللہ علیہ فرماندے نیں:
’’بناں حکم دے مرن نہ اوہ بندے
ثابت جہناں دے رزق دیاں ڈھیریاں نیں‘‘
٭٭٭٭٭