’’انوکھا لاڈلا ‘‘توں ’’کھیلن کو مانگے چاند‘‘ تک

لكهت:تنویر ظہور

جھنگ دے ڈاکٹر نیازعلی محسن مگھیانہ نال میرا نیازمندانہ تعلق ویہہ ورھیاں توں ودھ عرصے دا اے۔ ڈاکٹر محسن مگھیانہ دی سجری 21ویں تصنیف ’’کھیلن کو مانگے چاند‘‘ نومبر 2020ء وچ چھپی۔ مینوں ایہ کتاب اپریل 2021ء وچ ملی۔ انوکھا لاڈلا ڈاکٹر صاحب دی پہلی ہڈبیتی سی جو 1994ء وچ چھپی۔ ڈاکٹر صاحب دی ایہ خودنوشت اینی مقبول ہوئی کہ ایہدے چار ایڈیشن چھپے۔ کھیلن کو مانگے چاند ایہدا تسلسل اے۔ انوکھا لاڈلا جھنگ وچ ڈاکٹر محسن مگھیانہ دی پیدائش توں ملک تے بیرون ملک تعلیم حاصل کرکے سرجن بن کے واپس آن یعنی 1956ء توں 1990ء تک دے سفر دی روداد بیان کیتی گئی سی۔ ڈاکٹر صاحب 31دسمبر 2015ء وچ ریٹائر ہوئے۔ 1990ء دے بعد دی داستان کھیلن کو مانگے چاند وچ بیان کر دتی گئی اے۔ اک ہزار صفحیاں تے مشتمل ایس داستان نوں اک ہزار دی گنتی وچ چھاپیا گیا اے۔ ایہ منفرد قسم دی سوانح حیات اے۔ ایہ داستان 202 باب تے مشتمل اے۔ اپنی پیشہ ورانہ سرجری‘ ڈاکٹری معاملیاں دے نال نال اینی لمی داستان حیات لکھنا سوکھا کم نہیں سی۔ سوانح عمری توں علاوہ دوجے تخلیقی کم وی ڈاکٹر صاحب جاری رکھے ہوئے نیں۔ ڈاکٹر محسن مگھیانہ نے کتاب وچ اوہناں تقریباں دا وی ذکر کیتا اے جو اوہناں دیاں کتاباں دے حوالے نال تے اوہناں دے اعزاز وچ وکھووکھ شہراں تے بیرون ملک منعقد ہوئیاں۔ مثلاً انوکھا لاڈلا اسلام آباد وچ‘ ایوارڈدی پروقار تقریب دبستان لہور وچ‘ لہور وچ چھیڑخانی دیسی ان ولایت اسلام آباد وچ‘ کراچی آٹس کونسل وچ ‘فیر توں لہور وچ‘ دبستان سرگودھا وچ کوئٹہ وچ حاضری وغیرہ۔
کتاب دے آخر وچ ڈاکٹر محسن مگھیانہ دی الوداعی تقریب تے اوہناں تے لکھے گئے کجھ کالم چھاپے گئے نیں تے شاعراں دا ڈاکٹر محسن مگھیانہ نوں منظوم خراج وی۔ کتاب دا دیباچہ ڈاکٹر فوزیہ چوہدری نے لکھیا اے۔ نثر ہووے‘ شاعری ہووے یاں کالم نگاری‘ ہر صنف وچ طنزومزاح دے پہلو نوں ڈاکٹر صاحب نے سامنے رکھیا اے۔ ڈاکٹر محسن مگھیانہ اعلیٰ پائے دے شاعر وی نیں۔ نثر دی وجہ نال اوہناں دا ایہ پہلو دب کے رہ گیا۔ 1996ء وچ میری کتاب چونویاں پنجابی غزلاں چھپی تے میں ڈاکٹر محسن مگھیانہ دی غزل وی شامل کیتی سی۔ اک شعر ملاحظہ کرو۔
میں پچھیا شریف دا مل کیہ اے
اوس ڈھا کے لما کر ماریا
پنجابی‘ اردو جریدہ ’’سانجھاں‘‘ دا اجرا میں 1974ء وچ کیتا۔ 1955-96-97 دے شماریاں وچ ڈاکٹر صاحب دیاں غزلاں وی چھاپدا رہیا۔ جون 1997ء دے شمارے وچ اوہناں دیاں اردو غزلاں چھپیاں۔ ڈاکٹر محسن مگھیانہ دی اردو غزل دا ایہ شعر ملاحظہ کرو۔
جائز کاموں کے بھی اب لگتے ہیں پیسے
محسن کیسی بے شرمی آ رہی ہے
لہور وچ ڈاکٹر صاحب دیاں کتاباں دیاں جہڑیاں تعارفی تقریباں ہوئیاں سن اوہناں دی روداد وی ’’سانجھاں‘‘ وچ چھپدی رہی۔ غزلاں توں علاوہ ڈاکٹر صاحب دیاں نظماں وی سانجھاں وچ چھپدیاں رہیاں۔ دسمبر 1996ء دے شمارے وچ اوہناں دی اک نظم ’’آس‘‘ چھپی جہدا آخری شعر اے۔
کدیں تاں توں وی آسیںسہی
محسن دا دل پر چاسیں سہی
فروری 1998ء وچ میری وڈی دھی زوئے تنویر دے ویاہ دے موقعے تے ڈاکٹر محسن مگھیانہ اچیچے جھنگ توں تشریف لیائے سن۔ 1996ء وچ پنجابی شاعر تے استاد مظہر جعفری تے ماہر اقتصادیات و سماجی شخصیت حاجی انعام الٰہی اثر دے نال میں جھنگ گیا تے ڈاکٹر محسن مگھیانہ دے پرائیویٹ ہسپتال مگھیانہ میڈی کیئر وچ محفل مشاعرہ دا پربندھ کیتا گیا۔ ایہ مشاعرہ ادبی تنظیم قلم قبیلہ ولوں ہویا۔ مہمانان خصوصی وچ مظہرجعفری‘ حاجی انعام الٰہی اثر‘ڈاکٹر نیازعلی محسن مگھیانہ تے راقم الحروف شامل سن۔ مشاعرے وچ صاحبزادہ رفعت سلطان، بیدل پانی پتی، صفدر سلیم سیال، احمد تنویر، ڈاکٹر محسن مگھیانہ، علی کوثر جعفری، ریاض حسین سیال، ممتاز بلوچ، محمد انیس انصاری، شفیق احمد شفیق، ظفر سعید، علی اصغر عباس، قیصر بھٹی، امیر اختر بھٹی، لطیف شیدائی، ابراہیم عدیل، یعقوب ابو الخیری، مجیب امجد، غضنفر مہدی، احمد بشیر سنگاہ، طاہر شیرازی، غضنفر شاد تے جاوید رسوا نے اپنا کلام سنایا۔
حاجی انعام الٰہی اثر نے میزبان ڈاکٹر محسن مگھیانہ نوں ایس معیاری ادبی محفل دے پربندھ تے مبارکباد دتی تے قلم قبیلہ دے ارکان دا وی شکریہ ادا کیتا۔ راقم الحروف نے آکھیا کہ جھنگ وچ اجیہا خوبصورت ادبی ماحول ویکھ کے بڑی خوشی ہوئی۔ ایس توں علاوہ وی راقم الحروف نوں جھنگ جان دا موقع ملیا۔ ڈاکٹر محسن مگھیانہ دے نال مائی ہیر دی قبر تے وی جان ہویا۔ ڈاکٹر محسن مگھیانہ نے اپنی سجری داستان حیات وچ ایہناں دو اہم تقریباں دا ذکر نہیں کیتا۔ کھیلن کو مانگے چاند وچ وینا ورما تے ڈاکٹر جگتار سنگھ دے مائی ہیر دی قبر تے جان دے ابواب شامل نیں۔ ایہناں دوہاں دا تعلق انڈیا نال سی۔ ایہ دوویں بھارتی شخصیات گھمن گھیریاں دے نال لہور توں جھنگ گئیاں سن۔ میں تے مظہرجعفری پاکستانی سی۔ شاید ایس لئی ڈاکٹر محسن مگھیانہ نے ذکر کرنا مناسب نہ سمجھیا۔٭٭