گڈا چکڑ چوں کیویں نکلے؟

ارشاد بھٹی

پرانے ویلیاں دی سواری گڈا جدوں چکڑ وچ پھس جاندا تے امیرلوک اپنا سامان لاہ کے دوجی سواری وچ بہہ کے ٹر جاندے۔ درمیانے درجے دے لوک چھاویں بہہ کے گڈے دے نکلن دا انتظار کردے جد کہ غریب تے ماڑے گڈے نوں چکڑ چوں کڈھن وچ جُٹ جاندے۔ سوچنا واں پاکستان وی اک اجیہا گڈا جو بیڈگورننس‘ مس مینجمنٹ‘ بدنیتی‘ کرپشن‘ شخصیت پرستی دے چکڑ وچ پھسیا ہویا‘ مراعات یافتہ طبقہ اپنا سامان لاہ کے دوجے ملکاں وچ جا رہیا‘ بیوروکریسی‘ درمیانے درجے دے لوک چھاویں بہہ کے گڈے دے نکلن دا انتظار کر رہے نیں جد کہ عوام مسلسل گڈے نوں چکڑ چوں کڈھن وچ لگے ہوئے نیں۔ اکثر سوچنا واں کہ گڈا چکڑ چوں کیویں نکلے‘ جدوں قدم قدم تے ڈیلیاں‘ ڈھیلاں‘ قدم قدم تے بے ایمانی‘ دونمبری‘ قدم قدم تے کرپشن‘ لٹ مار‘ گڈا چکڑ چوں کیویں نکلے۔ جدوں پوری سیاست دس شخصیات دے دوالے گھم رہی ہووے‘ ایہ دس آقا باقی غلام‘ جو آقا کہہ دین غلام لئی حرف آخر‘ گڈا چکڑ چوں کیویں نکلے۔ جدوں 90 فیصد اشرافیہ نوں ایہ پتہ ای نہ ہووے کہ اوہناں نے پیسہ کمایا کیویں‘ اوہناں دے کول پیسہ آیا کیویں‘ مطلب کسے دے کول منی ٹریل ای نہ ہوے‘ گڈا چکڑ چوں کیویں نکلے۔
جدوں ساڈے وزیر خزانہ اعدادوشمار وچ جعل سازی کرن‘ جدوں اپنے زرداریاں دا زر‘ زمین‘ پنج براعظماں تک کھلریا ہویا ہووے‘ جدوں اپنے شریف ناں دے وی شریف نہ ہون‘ گڈا چکڑ چوں کیویں نکلے۔ جدوں پچھلیاں حکومتاں بینکاں توں قرضے لے کے 5.8فیصد گروتھ وکھاندیاں رہیاں ہون‘ جدوں موجودہ حکومت اپنے پونے تن ورھیاں وچ چوتھا وزیر خزانہ لیا کے وی آئی ایم ایف دیاں گلاں فل سٹاپ‘ کماں تک من رہی ہووے گڈا چکڑ چوں کیویں نکلے۔ جدوں نظام پرانا‘ نکارہ‘ بدبودار ہو چکیا ہووے جدوں ملک 5فیصد لئی جنت تے 95فیصد لئی بھخدا جہنم بن چکیا ہوووے فیر گڈا چکڑ چوں کیویں نکلے۔ جدوں قرضے انج لئے جا رہے ہون یاں ایس سوچ دے تحت لئے جاندے ہون گڈا چکڑ چوں کیویں نکلے‘ جدوں ایمانداری دا ایہ عالم ہووے کہ نواز حکومت وچ اک غیرملکی کمپنی ایتھے سکوٹر سازی دا کارخانہ لان آوے‘ وزارت خزانہ کمپنی توں کمیشن منگ لوے تے افغانستان وچ نیٹو دا انمائندہ کہوے ایہ کمیشن وزیرخزانہ نے منگی سی۔ ایہ اطلاع وزیراعظم نوازشریف نوں دتی گئی پر اوہناںنے اوہنوں سیریس نہیں لیا گڈا چکڑ چوں کیویں نکلے‘ اسیں پسند نہ پسند وچ اینے اگے نکل جائیے‘ اسیں انج جھول بول جائیے کہ جدوں اسیں بھارت نوں لٹایا ہویا سی اوہدے تن جہاز ڈھا سٹے‘ بھارتی پائلٹ پھڑ لیا سی پوری دنیا ساڈی ایئرفورس تے فوجاں دی تعریف کر رہی سی اودوں ساڈے ایازصادق فرما رہے سن کہ ساڈے سپہ سالار دیاں لتاں کنب رہیاں سن‘ گڈا چکڑ چوں کیویں نکلے۔ جدوں ساڈیاں پالیسیاں دا ایہ لیول ہووے کہ ساڈے تن واری دے وزیراعظم ڈاکٹر طاہرالقادری دا زور توڑن لئی تحریک لبیک بنوا دین گڈا چکڑ چوں کیویں نکلے۔ جدوں پاکستان دے سکیورٹی اداریاں نوں پتہ لگے کہ وزیراعظم آفس‘ وزارت خارجہ دی اہم دستاویزات لیک ہو رہی ہووے‘ سکیورٹی ادارے ہور تحقیقات کرن‘ ایہ گل ٹھیک نکلے‘ سکیورٹی ادارے وزیراعظم آفس‘ وزارت خارجہ دا سسٹم ٹھیک کرن‘ فول پروف بنان‘ گڈا چکڑ چوں کیویں نکلے۔
جدوں چین دے وزیراعظم نوں سانوں ایہ کہنا پوے کہ اسیں کدوں تک تہاڈے سارے سٹینڈرڈ چاول‘ چینی خریدے رہواں گے ایس توں علاوہ وی سانوں کجھ دیو‘ گڈا چکڑ چوں کیویں نکلے اسیں پیداوار وچ سب توں پچھے رہ گئے‘ ویت نام‘ بنگلہ دیش ساڈے توں اگے نکل گئے‘ گڈا چکڑ چوں کیویں نکلے۔ اسیں 22 واری آئی ایم ایف دا بوہا کھڑکا چکے آں چودھویں واری تے انج ہویا اسیں اودھر آئی ایم ایف توں قرضہ لیا تے اودھر آئی ایم ایف نے قرضہ اپنے قرضیاں وچ ایڈجسٹ کر لیا مطلب اسیں صرف کاغذاں وچ قرضہ لیا تے آئی ایم ایف نے صرف کاغذاں وچ قرضہ دتا گڈا چکڑ چوں کیویں نکلے۔ ساڈے تے قرضیاں دا ایہ حال کہ جولائی توں مارچ 9 مہینیاں وچ قرضیاں تے سود دی ادائیگی 21کھرب تک اپڑ گئی ایہ حکومتی آمدنی دے 82فیصد دے برابر۔ گڈا چکڑ چوں کیویں نکلے۔ جدوں اسیں مسلم امہ دے خواباں چوں نکل ای نہیں رہے‘ مسلم دنیا بدل چکی۔ جذبات دی تھاں مفادات دے رشتے بن چکے سارے خلیکی ملک مسلماناں دے قاتل مودی نوں اپنے سب توں وڈے ایوارڈ دے چکے‘ تے اوہ ایوارڈ کیوں نہ دین اسیں اوہناں توں ہر ورھے چار ارب ڈالر دا تیل خریدے آں جد کہ بھارت 40 ارب ڈالر دا تیل خریدا اے گڈا چکڑ چوں کیویں نکلے۔ ایتھے ڈکٹیٹر آ کے جمہوریت پسند بنن وچ لگے رہن جد کہ ساڈے جمہوریے ڈکٹیٹرز بنن وچ لگے رہن‘ گڈا چکڑ چوں کیویں نکلے۔ اسیں زرعی ملک تے کنک روس توں خرید رہے‘ چینی برازیل توں لے رہے‘ کپاہ بھارت توں منگوا رہے‘ دالاں امپورٹ کر رہے‘ آئل امپورٹ کر رہے‘ سبزیاں دے بیں حالاں کہ ہائبرڈ چاول امپورٹ کر رہے آں‘ گڈا چکڑ چوں کیویں نکلے۔ سانوں جو وی ملیا‘ پرفارمنس صفر‘ ڈیلیوری صفر‘ میرٹ صفر‘ جھوٹھاں وچ گولڈ میڈلسٹ‘ حماقتاں وچ سپرسٹار‘ گڈا چکڑ چوں کیویں نکلے۔ ساڈی جمہوریت اجہی کہ دوفیصد نوں انڈے‘ بچے باقی 98فیصد لئی بانجھ‘ نظام انصاف اجیہا کہ 95فیصد لئی جانوراں توں بدتر‘ 5فیصد نوں انج انصاف ملے کہ جھٹ منگنی پٹ ویاہ‘ گڈا چکڑ چوں کیویں نکلے۔ غریباں دیاں عورتاں جیلاں وچ نجائز بچے جم رہیاں نیں‘ غریباں نال حوالاتاں وچ بدفعلیاں ہو رہیاں نیں غریب بھکھ‘ غربت‘ بیروزگاری توں تنگ آ کے بچیاں سنے خودکشیاں کر رہے نیں جد کہ اشرافیہ طبقہ نوں کھا کھا کے بدہضمیاں ہو چکیاں نیں۔ اشرافیہ دیاں جیلاں غریباں دے گھراں توں ودھ آرام دہ‘ اشرافیہ دا پیدا ہون والا ہر بچہ حکمران‘ گڈا چکڑ چوں کیویں نکلے۔ یقین کرو 98فیصد غریب غرباء گڈے نوں دھکے لا لا کے تھک گئے۔ یقین کرو جدوں تک امیراں نوں واپس بلوا کے تے درمیانے لوکاں نوں چھاں چوں اٹھا کے غریباں دے نال گڈے نوںدھکا نہیں لگوایا جاندا ایہ گڈا اوسے طرح چکڑ وچ پھسیا رہوے گا۔ پر ہاں امیر لوک جو سامان ایدھر اودھر شفٹ کر چکے اوہ سامان ساڈا‘ ساڈا غریباں دا‘ اوہنوں ریکور کرنا نہ بھُلنا۔
(بشکریہ روزنامہ جنگ)