عمران خان دا دور حکمرانی

گرفتاری توں بعد گوگی بٹ اُتے جھوٹے مقدمے بن دے چلے گئے جیہڑے عدالت وچ جا کے مٹی ہو جان گے

آصف عنایت

شاید 33 ورہے لنگھ گئے ہون جدوں وی کوئی قانونی کاروائی لئی درخواست لکھی اے یا کسے دوست، رشتہ دار واقف نے دکھ بیان کیتا اے تے ایہو کیتا اے کہ فلاں بندہ میرے پیسے دبا کے بہہ گیا، پنچایت ہوئے یا عدالت وچ معاملہ، دھوکہ دہی یا زبردستی کسے دی زمین ہتھیان یا پیسہ دبان دا ای قصہ ہویا۔ موجودہ حکومت دا تے خیر قانون سازی ول رحجان ای نہیں آرڈیننس جاری کر کے ضابطہ وچ کجھ انج دا بندوبست کیتا جا سکے کہ لوکاں دے دبائے ہوئے پیسے تے ناجائز قبضہ شدہ تھاں واپس دلوائی جا سکے۔ کدی جدوں کسے حکمران یا خاندان دا دور پڑھدے تے باقاعدہ اک باب ایس دے کارنامیاں اُتے محیط ہوندا ، ایٹمی توانائی، ایٹمی قوت، میزائل پروگرام، خارجہ پالیسی، آئین سازی، اسلامی کانفرنس، سکولاں، کالجاں تے میڈیکل کالجاں دے علاوہ ہسپتالاں وغیرہ جہے کارنامے جناب بھٹو تے محترمہ بینظیر بھٹو حکومت جد کہ سڑکاں انفراسٹرکچر، ایٹمی دھماکے، میاں نواز شریف، شہباز شریف دے کھاتے وچ نیں۔ تنقید دے وی بوہت سارے پہلو نیں پر ایس ویلے کجھ مثبت پہلو اُتے طائرانہ نظر ماری جائے گی۔ ایسے طرح موجودہ حکومت دے کارنامیاں وچ اپنے علاوہ سب نوں چور، ڈاکو، ملزم، مجرم، بھگوڑے، غدار کہنا تے سابقہ حکومتاں دے کھاتے وچ مغلیہ دور دی کوتاہیاں وی پا دینا، البتہ مارشل لاء دے ادوار نوں بڑی چابکدستی نال باہر رکھیا جانا احتساب دے ناں اُتے انتقام ، کینہ، منفی اقدامات تے تاریخی قرضے وی موجودہ حکومت دا خاصہ اے۔ وزیراعظم اپنے بہنوئی دا اک پلاٹ دلوا سکے۔ بے نظیر انکم سپورٹ پروگرام نوں احساس دا ناں دے سکے یا سابقہ حکومتاں دے منصوبیاں اُتے تختیاں لان دے علاوہ اک عورت نوں ٹی وی اُتے درخواست کرن نال ایس دے 5 لکھ دلوا سکے۔ انج دے کماں لئی سستی شہرت نہیں بلکہ قوانین بنائے تے اپنائے جاندے نیں۔ ایہہ کم تے میرے جہیا کمزور بندا درجناں لوکاں دے کرا چکیا بلکہ لہور پولیس نے جیہڑی قبضہ گروپ وغیرہ دی لسٹ جاری کیتی ایس وچ ڈان دے طور اُتے لہور دے خواجہ عقیل احمد (گوگی بٹ ) دا ناں سب توں اُتے لکھیا گیا ( اوہ لسٹ عدالت عالیہ وچ چیلنج ہو چکی) جد کہ بٹ صاحب انج دی نیکیاں بغیر تشہیر دے عمر بھر کردے رہے نیں۔ ایہناں اُتے دشمنی دی بنا اُتے جیہڑے مقدمات ہوئے اوہ 10 سال پہلے ختم ہو گئے۔ ہر مقدمہ وچ باعزت بری ہوئے۔ ہن اوہ اک صوم الصلوٰۃ دے پابند تے عاشق رسول بندے دے طور اُتے زندگی گزار رہے نیں۔ دشمنی دی بنا اُتے گارڈز رکھنے پیندے نیں۔ انتخابات توں پہلے بٹ صاحب نوں بااثر دوستاں نے کہیا تسیں عمران خان دے تاجراں دے جلسے وچ آئو اوہناں نے انکار کیتا سیاست نال کجھ واسطہ نہیں پر اک دوست دے مشورے اُتے اوہ عمران خان دے جلسے وچ آ گئے ۔لوکاں نے عمران خان دی نسبت ایہناں توں زیادہ سلیفیاں بنوائیاں۔ ایس جلسے دی تصویراں سوشل میڈیا اُتے پی ٹی آئی نے وائرل کر دتیاں تے الٹے پیراں دھمال پائی کہ گوگی بٹ ساڈے جلسے وچ آئے نیں۔ایس جلسے دے بعد اوہ فیر اپنی معمول دی زندگی لنگھان لگے ۔ گوگی بٹ اُتے ایہناں دی پوری زندگی وچ اک وی ناجائز قبضہ، بھتہ خوری، ناجائز فروشی تے کسے دی اک انچ زمین اُتے قبضہ دا کوئی اک مقدمہ نہیں۔صحافی، دانشور، جج، بیورو کریسی نوں میں سمجھنا واں کہ جے جانبدار ہون تے معاشرہ نہیں چل سکدا پر حقیقت ایہہ وے کہ جے حکمران جانب دار، منتقم المزاج تے شہرت دا متمنی ہوئے تے فیر عوام رُل جاندے نیں۔ لہور پولیس نے جیہڑی لسٹ جاری کیتی اے اوہ متنازع اے ایس وچ کسے پولیس والے دا ذکر وی نہیں۔ تے فیر لہور دے علاوہ پنجاب وچ جرائم نہیں ہوندے اوتھے دی لسٹاں کون جاری کرے گا؟ گوگی بٹ اُتے جیہڑی پہلی حالیہ ایف آئی آر کٹی اک تے ایہناں پولیس والیاں نوں 15 اُتے کال وصول ہوئی تے ایہہ پولیس اینی چابکدستی نال لسٹ دے مطابق لہور دے سب توں وڈے ’ڈان‘‘ دے گھر نوں ڈیرہ ظاہر کر کے سول کپڑیاں وچ ریڈ کرن نکلی۔ ایف آئی آر دے مطابق درجناں پولیس والے تن اشتہاریاں نوں پھڑن جاندے نیں اگے انھے واہ فائرنگ ہوندی اے ایہہ شور مچاندے نیں کہ اسیں پولیس والے آں اوہ فائرنگ بند کر دیندے نیں تے ایہہ بہادر پولیس ایہناں نوں دبوچ لیندی اے تے اشتہاری فرار ہو جاندے نیں جد کہ ایف آئی آر دا حقیقت نال کوئی تعلق نہیں۔ باہر دے گارڈ نوں دبوچ کے رات 12 وجے پوڑھی لا کے چڑھدے نیں تے ایہناں دے طالب علم کم سن پتر نوں حراست وچ لے لیندے نیں۔ بٹ صاحب اطلاع ملن اُتے گھر دے نچلے پورشن تے آندے نیں۔ اپنے طالب علم پتر تے ایس دے دوست نوں چھڈن دا کہہ کے گرفتاری دیندے ہوئے کہندے نیں کہ مینوں اطلاع سی تسیں حکومت نوں کاروائی وکھانی اے ورنہ میرے اُتے کوئی مقدمہ نہیں۔ اصل وچ خواجہ عقیل احمد بٹ عرف گوگی بٹ لہور دی مقبول ترین شخصیت نیں۔ اج اوہ جھوٹے مقدمیاں وچ جیل وچ بند نیں۔ پورے لہور دے لوکاں وچ جس توں پچھو اوہ ایہو کہوے گا کہ جعلی مقدمے نیں۔ ایف آئی آر دے حوالے نال مینوں سب توں زیادہ حیرت ہوئی کہ اردو ادب یا پنجابی ادب اینا غریب ہو گیا کہ غیر استعمال شدہ گولی نوں زندہ گولی لکھن تے حالانکہ چلی ہوئی گولیاں سکے یا خول دا ذکر آندا اے تے یا فیر گولیاں جس توں مراد ای غیر استعمال شدہ گولیاں ہوندیاں نیں۔
عدالتی حکم اے کہ جے پولیس یونیفارم وچ نہیں تے ایس اُتے حملہ آور کارِ سرکار وچ مداخلت دا مرتکب تے پولیس مقابلے دا مرتکب نہیں ہوئے گا۔ پولیس یونیفارم وچ ریڈ کرے گی۔ ایف آئی آر دے مطابق جنہاں تن اشتہاریاں دی اطلاع سی اوہ تے فرار ہو گئے تے ایہناں دے نام پتے وی لکھے نیں کیہ لہور پولیس نے گوگی بٹ دی گرفتاری دے بعد ایہناں اشتہاریاں دے گھر اُتے یا ایہناں دی گرفتاری لئی کوئی اک ریڈ وی کیتا اے بلکہ ایس دے بعد گوگی بٹ اُتے جھوٹے مقدمے بن دے چلے گئے جیہڑے عدالت وچ جا کے مٹی ہو جان گے۔ سوال ایہہ وے کہ جے عمران خان نے وی بدترین روایت نوں اپناندے ہوئے حکومت کرنا اے تے فیر تبدیلی میرے خیال نال صرف ماہ و سال دی تبدیلی اے۔
جے معاملہ عدالت وچ نہ ہوندا تے میں ایس ایف آئی آر دی دھجیاں ادھیڑ دیندا۔ شاید پورے برصغیر وچ کوئی وکیل، جج صاحب ملزم حتیٰ کہ منشی وی یقین نہ کرے جد کہ مہذب دنیا وچ تے پولیس پارٹی نوں ای مقدمہ دا ساہمنا کرنا پئے جائے۔ گوگی بٹ اُتے ایف آئی آر توں مینوں حبیب جالب دا اک واقعہ یاد آ گیا کہ اک وار ایہناں اُتے شراب دا مقدمہ قائم کیتا گیا۔ مجسٹریٹ نے فرد جرم عائد کردے ہوئے کہیا کہ تہاڈے اُتے الزام اے کہ فلاں وقت فلاں دن فلاں جگہ اُتے تہاڈے توں شراب دی بھری ہوئی بوتل برآمد ہوئی اے۔ ہن حبیب جالب وی جالب سن شراب نوشی توں انکار نہیں کر سکدے پر مقدمہ جھوٹا سی۔ اوہناں نے ایہہ کہہ کے انکار کر دتا کہ جناب شراب دی بوتل جے ادھی، کوارٹر یا تھوڑی جہی ہوندی تے میں من لیندا پر شراب دی بوتل بھری ہوئے تے جالب توں برآمد ہوئے ممکن نہیں۔ ایسے طرح گوگی بٹ دے گھر ریڈ اُتے پولیس نے جنہی فائرنگ تے دیواراں توں پچھے لُک کے لیٹ کے جاناں بچائیاں، جے حقیقت وچ انج ہوندا تے فیر ایف آئی آر دوجی پولیس پارٹی آ کے لکھواندی ایہہ نہ لکھوا پاندے کیوں جے ایہہ سول کپڑیاں وچ سن تے گوگی بٹ دشمن دار لہٰذا ایس واقعے دا وجود سرے توں موجود ای نہیں۔ تحریک انصاف دی انج دی حکومت اے کہ جس اُتے وی مقدمہ قائم ہوئے عوام پکار اٹھدے نیں مقدمہ بے بنیاد تے جھوٹااے۔ اوہ مقدمہ رانا ثناء اللہ اُتے ہوئے، فریال تالپور، احسن اقبال اُتے ہوئے، جاوید لطیف اُتے ہوئے یا پیپلز پارٹی دے کسے لیڈر اُتے حتیٰ کہ گوگی بٹ لئی وی لہور دے ہر علاقے توں ایہو اواز اے کہ بٹ صاحب اُتے مقدمے جھوٹے تے بے بنیاد نیں جدوں کسے حکومت دی ساکھ راکھ وچ بدل جائے ایس نوں اپنے رویے تے طرز حکمرانی اُتے غور کرنا چاہیدا اے۔