بزم اجم ولوں مولانا عبدالرحیم اشرفؒ دی یاد وچ تقریب

پروفیسر حکیم سید عمران فیاض

مولانا عبدالرحیم اشرفؒ دا ناں نوکِ قلم اُتے آندے ای وطن عزیز دی اک نہایت متحرک، فعال تے دل آویز شخصیت دا پیکر جمیل اکھاں دے ساہمنے آ جاندا اے۔ جس نے بلاشبہ ادھی صدی تیکر پاکستان دے سیاسی، دینی، طبی تے صحافتی شعبیاں وچ نہایت مثبت کردار ادا کیتا۔ اوہ نہ صرف ایہناں شعبیاں دے آفاق اُتے پوری آب و تاب نال جلوہ گر رہے بلکہ ہر کسے نال اپنی بے پایاں صلاحیتاں دا لوہا وی منوایا اوہ اگرچے جسمانی طور اُتے زیادہ قد کاٹھ دے مالک نہیں سن پر ایہہ اک مسئلہ حقیقت اے کہ قومی زندگی وچ اپنی غیر معمولی فعالیت پاروں ایہناں دا شمار ساڈی قد آور قومی و ملی شخصیات وچ ہون لگیا سی۔ اوہناں نے مولانا مودودی دی قیادت وچ اسلامی دستور دے نفاذ دی تحریک توں لے کے تحفظِ ختم نبوت دی دونواں تحریکاں تے تحریک نظام مصطفی تیکر وچ ودھ چڑھ کے حصہ لیا تے ایہناں تحریکاں وچ قید و بند دی مصیبتاں وی نہایت خندہ پیشانی نال برداشت کیتیاں۔ایہہ حقیقت روز روشن وانگوں عیاں اے کہ کجھ شخصیات دے افکار و نظریات دا مطالعہ کئی نسلاں نوں فکری جلا بخش دا تے ذہنی بالیدگی بہم اپڑاندا اے انج دی ای عظیم شخصیات وچوں اک نمایاں ناں مولانا حکیم عبدالرحیم اشرف دا وی اے۔ محترمہ علامہ حکیم عبدالرحیم اشرف افکار مسیح الملک حکیم محمد اجمل خانؒ دے علمبردار سن۔ اوہناں نے ساری زندگی اسلامی تے طبی اقدار دے فروغ دی خاطر لنگھائی اوہ فرقہ واریت تے اتائیت دے سخت خلاف سن۔ اوہناں نے دنیا نوں دین اُتے کدی غالب نہیں آن دتا۔ علامہ عبدالرحیم اشرف ؒ دی تعلیمات ساڈے لئی مشعل راہ نیں اوہناں نے ہمیشہ اصولاں دی پاسداری دی علامہ اشرف دی خدمات رہندی دنیا تیکر یاد رکھیاں جان گیاں۔ایہناں وچاراں دا اظہار حکیم ڈاکٹر زاہد اشرف نے علامہ اشرف دی یاد وچ منعقدہ اک تقریب وچ خطاب کردے ہوئے کیتا۔ اوہ بزم اجمل دے زیر اہتمام اک تقریب دی صدارت کر رہے سن۔ ڈاکٹر زاہد اشرف نے کہیا کہ اپنے اسلاف نوں یاد رکھنا باعث رحمت ہوندا اے۔ تِلمیذِ اشرف پروفیسر منصور العزیز نے کہیا کہ علامہ عبدالرحیم اشرف قول و فعل دے تضاد توں پاک سن ایہو وجہ اے کہ قدرت نے ایہناں دی گل بات نوں تاثر نال بہرہ مند کیتا سی منصور العزیز نے کہیا کہ مرحوم علامہ عبدالرلحیم اشرفؒ عام لوکاں تے حکومتی بندیاں وچ یکساں مقبول سن پر مرحوم علامہ نے ذاتی مفاد توں بالاتر ہو کے فن طب تے دین اسلام دے فروغ لئی بہترین کردار ادا کیتا۔ معروف طبی قائد حکیم محمد سلیمی نے خیالات دا اظہار کردے ہوئے کہیا کہ حکیم عبدالرحیم اشرف بلاشبہ فِکرِ اجمل دے فروغ دی خاطر اہم کردار ادا کیتا۔

اوہناں نے کہیا کہ علامہ الرحیم اشرف طبی و دینی حلقیاں وچ یکساں مقبول سن اوہناں نے فرقہ واریت دے خلاف عملی جہاد کیتا تے طب دی اساس نوں قائم رکھن لئی موثر جدوجہد دی علامہ اشرف دی خدمات نوں سنہری الفاظ وچ لکھنا جانا چاہیدا اے۔ حکیم صابر علی شاہ نے خطاب کردے ہوئے کہا کہ میں بزم اجمل دے سارے احباب نوں مبارکباد پیش کرنا واں کہ اوہناں نے مسیح الملک حکیم محمد اجمل خان تے ایہناں دے فالوارز دی خدمات نوں اجاگر کرن دا مستقل سلسلہ شروع کیتا۔اوہناں نے کہیا کہ میرے لئی ایہہ گل سعادت توں گھٹ نہیں کہ مینوں بزم اجمل دے دوجے کامیاب پروگرام وچ مدعو کیتا گیا نسل نو تے اج دے طبیب نوں اپنے اکابر دے احسانات توں کماحقہ آگاہ رہنا چاہیدا اے۔ حکیم ضیاء اللہ فتح گڑھی نے کہیا کہ حکیم عبدالرحیم اشرف نے طب یونانی تے دین دی ترویج لئی جیہڑی خدمات سرانجام دتیاں نیں ایہناں نوں واقعی ساہمنے لیان دی لوڑ اے۔ بزم اجمل دے صدر حکیم خلیق الرحمن نے اپنے صوتی پیغام وچ ایس عزم دا اعادہ کیتا کہ بزم اجمل مسیح املک حکیم محمد اجمل خان تے ایہناں دے متوسلین دی تعلیمات دے فروغ لئی بھرپور ادا کرے گی۔ اوہناں نے سارے شرکاء بالخصوص ڈاکٹر زاہد اشرف،حکیم منصور العزیز تے حکیم محمد احمد سلیمی دی شرکت اُتے ایہناں دا شکریہ ادا کیتا۔ بزم اجمل دے جنرل سیکرٹری حکیم قیصر نوید گھمن نے کہیا کہ بزم اجمل قبل ازیں طب یونانی دے عالمی دن دے موقعے اُتے اک بھرپور پروگرام دا انعقاد کر چکی اے تے اج معروف دانشور عالم دین تے معالج علامہ حکیم عبدالرحیم اشرف دی یاد وچ ایہہ تقریب ساڈے لئی سعادت توں گھٹ نہیں تے انشاء اللہ اپنے اکابرین دی خدمات نوں اجاگر کرن دا سلسلہ جاری رکھیا جائے گا۔
شعبہ ادب بزمِ اجمل دی نگران معروف شاعرہ محترمہ فرحانہ عنبر نے جناب حکیم عبدالرحیم اشرف نوں منظوم خراجِ عقیدت پیش کیتا۔ تلاوت دی سعادت قاری محمد عثمان نے حاصل کیتی۔ کلامِ اقبال حکیم رضوان نے پیش کیتا تے نعتِ پاک دا شرف حکیم شوکت علی دے حصے وچ آیا تقریب وچ حکماء ، وکلاء ، اساتذہ ، تے دیگر سارے شعبۂ زندگی دے بندیاں نے بھرپور شرکت کیتی۔ آخر وچ حکیم اظہر مجددی نے سارے شرکاء دا شکریہ ادا کیتا۔