تن خبراں‘ تن کہانیاں

لكهت:مظہر برلاس

کسے نے حضرت علیؓ ہوراں توں پچھیا کہ انسان کجھ انساناں نال کھیڈدا اے‘ اوہناں دے نال پڑھدا اے‘ اک محلے یاں شہر وچ رہندا اے تے اوہناں نال دوستی نہیں ہوندی پر کجھ انساناں نوں صرف دو لمحیاں لئی ملدا اے تے اوہناں نال دوستی ہو جاندی اے حالاں کہ انسان نہ اوہناں دے نال کھیڈیا ہوندا اے نہ اکٹھے تعلیم حاصل کیتی ہوندی اے نہ ای اوہناں دا تعلق اک شہر‘ محلے یاں قبیلے نال ہوندا اے۔ علم دے دروازے نے نگاہواں نوں اسمان ول کیتا تے فرمایا ایہ معاملہ اسماناں تے طے ہویا سی۔ پچھن والا کہن لگا اوہ کیویں؟ جواباً تلی تے کائنات ویکھن والے نے فرمایا جدوں اللہ تعالیٰ نے عالم ارواح وچ روحاں نوں اکٹھا کیتا سی تے جہڑیاں روحاں اک دوجے دے نیڑے سن اوہ دنیا وچ جدوں کدیں جتھے کدھرے ملن گئیاں اوہناں دی فوراً دوستی ہو جاوے گی تے جہڑیاں روحاں اوتھے اک دوجے توں دور سن اوہ بے شک دنیا وچ اک مدرسے وچ پڑھیاں‘ اک میدان وچ کھیڈیاں‘ اک محلے یاں شہر وچ رہیاں‘ اک گھر وچ رہیاں حالاں کہ اک بسترے تے سُتیاں‘ اوہناں دی دوستی کدی نہیں ہو سکدی۔میں ایس قول نوں زمانہ طالب علمی توں لے کے عملی زندگی تک پرکھیا‘ ایہدا لفظ لفظ سچائی دی گواہی دیندا رہیا۔ رشتے تہانوں عطا ہوندے نیں‘ دوستیاں تسیں آپ یعنی تہاڈی روح پیدا کردی اے۔ مشہور اے کہ بھائی گھروں ملدے نیں جد کہ دوستاں دا انتخاب تسیں آپ کردے او۔ بھائی تہاڈے دوست ہون ایہ ضروری تے نہیں‘ تریخ وچ ایس گل دی گواہی برادران یوسف توں ملدی اے تے دوستی دی گواہی لئی صدیق اکبرؓ ای کافی نیں۔
اٹھ جون میرے لئی خوشگوار دن سی۔ ایس دن مینوں اپنے تن دوستاں دے بارے چنگیاں خبراں ملیاں۔ سب توں پہلاں جنرل عابدلطیف نے دسیا کہ اوہناں نوں ڈی جی اے ایس ایف لا دتا گیا۔ اجے اگ برساندا سورج ڈھلیا نہیں سی کہ پروفیسر طاہر ملک دا فون آ گیا۔ اوہناں نے پروفیسر شیخ محمد ملک نال وی گل کروائی دوویں پیو پتر خوش سن تے خوشی نال خبر دے رہے سن کہ تہانوں مبارک ہووے طارق ملک نوں چیئرمین نادرا لا دتا گیا اے۔ ملک صاحبان دا فون بند ہویا ای سی کہ مبشرحسن نال گل ہو گئی۔ مبشرحسن نوں سرکاری نیوز ادارے اے پی پی دا ایم ڈی لا یا گیا اے۔
ایہ تنے خبراں میرے تن دوستاں بارے سن ایس لئی مینوں خوشی ہوئی۔ تناں دے نال تن کہانیاں جڑیاں ہوئیاں نیں۔ میرے دوستاں نوں پتہ اے کہ میرے دوستی دے معیارات بڑے عجیب نیں۔ ایہ وی کسے دن دساں گا اجے جنرل عابدلطیف دی کہانی سن لوو۔ ایہ دہشت گردی دا موسم سی پاکستانی فوج امن عالم دی خاطر دہشت گردی دے خلاف پوری طاقت نال لڑ رہی سی۔ ایس دوران ساڈے ویریاں نے خاص طور تے بلوچستان نوں ٹارگٹ کر رکھیا سی۔ اوہناں دیہاڑیاں ساڈے راوین جنرل راحیل شریف آرمی چیف سن۔ سدرن کمانڈ جنرل عامرریاض دے حوالے سی۔ میڈیا وار نوں جنرل عاصم باجوہ نے سانبھیا ہویا سی۔ ایس دوران کئی واری صحافیاں نوں بلوچستان لے جایا گیا۔ اک شام جنرل عامر ریاض ولوں دتے گئے عشائیے وچ اک لمے قد‘ خوبصورت فوجی افسر نال لمحہ بھر ملاقات ہوئی۔ ایہ ملاقات فیر دوستی وچ بدل گئی۔ میں اسلام آباد وچ رہنا واں تے اوہ پیشہ ور فوجی نیں اوہناں دی ڈیوٹی کدی کدھرے تے کدی کدھرے‘ اک دن پرائیویٹ نمبر توں فون آیا‘ فون کرن والے نے کہیا سر تہاڈے نال ڈی جی سی جنرل عابدلطیف گل کرنا چاہندے نیں خیر گل ہوئی فیر ملاقات ہوئی۔
ہن طارق ملک دی کہانی سن لوو۔ پیپلزپارٹی نے اپنے دور حکومت وچ بڑے نفیس‘ پڑھے لکھے تے قابل بندے نوں چیئرمین نادرا بنایا۔ اوہنے اپنے ملک دی بڑی جانفشانی نال سیوا کیتی۔ طارق ملک بڑی محنت نال کم کر رہیا سی کہ رات ساڑھے دس دی تقریر دے بعد ن لیگ دی حکومت بن گئی۔ اوہناں نے طارق ملک توں کجھ نجائز کم کروانے چاہے پر ایہ چکوالی جوان ڈٹ گیا اوہدا اڑنا پسند نہ آیا تے اوس ویلے دے وزیرداخلہ نثارعلی خان نے شاہ دی وفاداری وچ حداں پار کر دتیاں۔ اوہنے طارق ملک دے اہل و عیال تک نوں پریشان کرنا شروع کر دتا محکے اوہدے پچھے لا دتے گئے۔ طارق ملک شریف آدمی سی ملک چوں ٹر گیا فیر جس ویلے دنیا طارق ملک نوں من رہی سی اوس ویلے نثارعلی خان اک ٹکٹ دے ہتھوں پریشان سی اوہدے علاقے نے قومی اسمبلی لئی اوہنوں رد کر دتا۔ ہن اوہنے تن ورھے بعد صوبائی اسمبلی دے رکن دی حیثیت نال حلف چکیا اے تے دوجے پاسے طارق ملک فیر توں نادرا دا چیئرمین اے۔
مشرف دور وچ ساڈا وزارتاں وچ آنا جانا گھٹ سی۔ پی پی دی حکومت آئی تے بڑی سمجھدار پارلیمنٹرین شیریٰ رحمن نوں وزیراطلاعات بنایا گیا۔ اوتھے ساڈا کافی آنا جانا سی۔ پرانے دوست رائو تحسین علی خان منسٹر آفس دے ڈی جی سن۔ شیری رحمن دے نال مبشرحسن تے انعام وزیر ہر ویلے متحرک نظر آئوندے دوویں باصلاحیت سن۔ دوہاں نال ایتھے دوستی ہوئی مبشرحسن بعد وچ فلم سنسر بورڈ دے چیئرمین تے بیت المال دے ڈپٹی ایم ڈی رہے۔ مبشرحسن باصلاحیت آدمی نیں ایہناں دے آن نال یقینا اے پی پی دا حلیہ بدلے گا۔ اوہناں دے ذہن وچ صحافیاں لئی بہت سارے پروگرام نیں۔ تناں دوستاں دی کامیابی لئی دعا دے نال اک ہور پیارے دوست حسن عباس رضا دا شعر پیش خدمت اے کہ:
تیرے بغیر شہر سخن سنگ ہو گیا
ہونٹوں پہ اب وہ ریشمی لہجے نہیں رہے