ایس فعل پچھے نیت دا اجے تک پتہ نہیں لگا

لكهت:ابرار ندیم

پیارے قارئین! کجھ لطیفیاں وانگوں کجھ خبراں وی انج دیاں عجیب و غریب تے مضحکہ خیز ہوندیاں نیں کہ اوہناں نوں پڑھن تے سنن مگروں ایہ سمجھ نہیں آئوندی کہ اوہناں تے ہسیا جاوے یاں رویا جاوے۔ بالکل اوسے طرح جیویں میرے اک مخولیہ دوست دی دعوت تے ویب ٹی وی لئی اوہدا اک مذاقیہ شو ویکھ کے میں بڑی دیر تک کنفیوژ رہیا کہ ایہدے تے ہساں یاں روواں جہدے بعد اوہدے بار بار پچھن تے مینوں ایہ کہنا پیا کہ بڑا زبردست شو اے۔ ایہدے تے اوس سائیں لوک نے میری گل نوں سمجھے بناں الٹا میرے توں شو دی بہتری لئی مشورہ وی منگ لیا جہدے تے میں بڑی مشکل نال اپنے ہاسے نوں کنٹرول کردے ہوئے پکا جیہا منہ بنا کے اوہنوں کہیا یار! کیوں جے تیرا شو مزاحیہ اے ایس لئی کوشش کریا کرو کہ ایہدے وچ کوئی ادھ گل ہسن ہسان والی وی ہووے۔ ایہدے تے بجائے اوہدے کہ میرا اوہ فلسفیانہ دوست میرے ایس مخلصانہ مشورے تے خوش ہوندا لٹا میرے نال ایویں ای رنج ہو گیا حالاں کہ میں اوہنوں ایہ مشورہ پوری بدنیتی نال دتا سی کیوں جے مینوں اوہدا شو ویکھ کے ہاسا تے ڈھیر آیا پر ایہدا کارن اوہدیاں گلاں نہیں اوہدیاں حرکتاں سن۔بہرحال میں اوہدی ناراضگی تے بجائے افسردہ ہون دے ڈھیر خوش آں ایس لئی کہ ورھیاں توں ہن تک ساڈی دوستی وچ اوہدا ایہ پہلا احسان اے جو اوہنے میری ذات تے کیتا اے پر اوہدی طبیعت وچ غیرمستقل مزاجی پاروں مینوں اکثر ایہ خیال ستاندا اے کہ اللہ نہ کرے میری کسے غفلت پاروں جے کسے دن اوہنے ایہ نراضگی ختم کر دتی تے میری باقی ایہ پہاڑ ورگی زندگی کیویں گزرے گی جو حنیف جذباتی تے شاطر ورگے کمینے دوستاں دی وجہ نال پہلے ای واہوا بور اے۔ خاص طور تے میں جدوں وی مفتی عبدالقوی تے ڈاکٹر عامرلیاقت دے حوالے نال کوئی نویں نویلی خبر سننا واں تے زندگی وچ روکھے پن تے بے رونقی دا احساس ہور وی زیادہ ہو جاندا اے۔
اجہے موقعے تے مہندر کپور دے گائے ہوئے گانے دے بول جب تلک کوئی رنگین سہارا نہ ہو وقت کافر جوانی کا کٹتا نہیں بار بار گنگنان نال مینوں اک پاسے جتھے حنیف جذباتی‘ شاطر تے ایس مخولیے دوست زہر لگن لگدے نیں اوتھے کدی کدی میرے دل چوں ایہ آہ وی نکلدی اے کہ کاش اسیں وی مفتی عبدالقوی تے ڈاکٹر عامرلیاقت حسین وانگوں پڑھے لکھے ہوندے۔ خیر ایہ اک وکھرا موضوع اے جہدے بیان لئی پورا باب چاہیدا اے اجے میں تہانوں کالم دے آغاز وچ ذکر کیتی گئی عجیب و غریب تے مضحکہ خیز خبراں دے سلسلے دی اک کراری خبر دسنا چاہنا واں جہدے مطابق بھارت دے صوبہ اترپردیش وچ اک بندہ ووہٹی دا لباس پا کے اپنی گرل فرینڈ دے ویاہ وچ اوہنوں ملن ٹر گیا پر لوکاں ولوں پھڑے جان تے اوہ موقعے توں نس گیا اوہدے ایس فعل دے پچھے نیت اجے تک پتہ نہیں لگ سکی۔ تسیں سوچ رہے ہوو گے کہ فی زمانہ ساڈے معاشرے وچ جس قسم دا فلمی چلن عام ہو گیا اے اوہدے تناظر وچ ایس خبر وچ انج دی کہڑی خاص گل اے کہ ایہنوں گرما گرم کراری خبر قرار دتا جا سکے۔ ایہدے تے میں ایہ کہواں گا کہ ایس خبر وچ ووہٹی دے لباس وچ پھڑے جان والے وچارے عاشق نامراد دی مضحکہ خیزی تے سیڈ لو سٹوری تے ہسن تے رون دی زبردست گنجائش دے باوجود بظاہر ایس خبر وچ واقعی کوئی وکھری گل نہیں کہ اوہنوں کسے اخبار یاں ٹی وی چینل تے فخریہ پیش کیتا جاوے پر جے تسیں ایس خبر نوں پورے دھیان نال آخر تک پڑھو گے تے ایس خبر دی آخری سطر تہانوں ضرور چونکا دیوے گی۔ایس خبر وچ میرے لئی وی دلچسپی دا اصل پہلو خبر دے آخر وچ اوہدے رپورٹر دا ایہو اک سطری تجزیہ اے جہدے مطابق ایس کھیڈ‘ فعل‘ یاں فیل دے پچھے نیت اجے تک پتہ نہیں لگ سکی۔ میرے وانگوں جے تسیں وی خبراں وچ دلچسپی لیندے او تے میں دعوے نال کہواں گا کہ تسیں اج تک کسے خبر دے آخر تے اوہدے رپورٹر ولوں اجیہا زبردست تجزیہ نہیں ویکھیا ہووے گا جنہوں بلامبالغہ صحافتی دنیا وچ اک نویں طرز دے طور تے ویکھیا جا سکدا اے۔ میرے خیال وچ ایس فعل دے پچھے نیت اجے تک پتہ نہیں لگ سکی ایہ اک لائن اینی زبردست تے کمال دی اے کہ ایہنوں کسے وی خبر دے آخر وچ لا دین نال اوہدے توں خبر دی ہیت ای بدل جاوے گی جہنوں اپنا کے صحافتی دنیا وچ اک انقلاب برپا کیتا جا سکدا اے تے جے کسے وجہ نال ساڈے صحافتی حلقے ایس روایت نوں نہ اپنا سکن۔
پیارے قارئین تہاڈے اگے گزارش اے کہ اج دے بعد تسیں اپنی پسندیدہ تے ناپسندیدہ سیاسی و غیرسیاسی خبراں دے آخر تے ایس سطر دا اپنے طور تے وادھا کرکے ایہ ذمہ داری آپ پوری کر لین۔ ایہدے بعد وکھووکھ خبراں دے آخر وچ ایس سطر دا وادھا کرن نال جو شکل سامنے آوے گی اندازا اے اوہ کجھ ایس قسم دی ہووے گی۔ معمولی تکرا رتے بیوی نے روٹی بنان والا ویلنا مار کے شوہر دا سر پاڑ دتا‘ ایس فعل دے پچھے نیت اجے تک پتہ نہیں لگ سکی۔ محلے والیاں نے بھونڈ عاشق دی ٹنڈ کرکے اوہدا منہ کالا کر دتا ایس فعل دے پچھے نیت اجے تک پتہ نہیں لگ سکی۔٭٭