امریکی جنگ تے عمران خان داموقف

امریکہ دی دلچسپی دے مراکز ہن افغانستان، عراق، یمن، شام ایران نہیں رہے

ڈاکٹر عارفہ صبح خان

عمران خان نے کہیا اے کہ امریکی جنگ وچ اسیں ساتھ دتا، قربانیاں دتیاں تے بُرے وی بنے۔ شکر اے کہ کسے پاکستانی لیڈر نوں ایس گل دی سمجھ آئی اے۔ بھارت من مانیاں کردا اے تے امریکہ دی کسے ڈکٹیشن نوں قبول نہیں کردا۔ نہ افغانستان یا عراق جنگ وچ ایس نے امریکہ دی بظاہر کوئی مدد کیتی پر اوہ امریکہ دنظر وچ پسندیدہ اے۔ ہجے یورینیم دے حوالے نال مصدقہ خبراں چلیاں پر امریکہ نے کوئی کاروائی نہیں کیتی۔ کشمیر وچ شدید انسانی خلاف ورزیاں نوں 694 دن ہو چکے پر امریکہ تے اقوام متحدہ نے کسے قسم دی باز پرس کیتی؟ بھارت وچ اقلیتاں خاص طور تے مسلماناں دے نال بہیمانہ سلوک اُتے وی کدی انڈیا اُتے پابندیاں عائد کیتیاں گئیاں؟ ایس دی اک وجہ تے ایہہ وے کہ انڈیا وچ ہندی زبان نوں فخر و انبساط نال بولیا جاندا اے۔ اوہ اپنے مذہب، ثقافت تے زبان دے سب توں ودے علمبردار نیں۔ اوہ اپنی زبان تے ثقافت اُتے نہ صرف فخر کردے نیں بلکہ ساری دنیا وچ ایہنوں اعتماد تے بڑے مان نال فروغ دیندے نیں۔ اپنی زبان، ثقافت، تے مذہب اُتے فخر ای کسے قوم دی شناخت تے قدر و منزلت دا سبب بن دی اے۔ پتہ چلدا اے کہ ایہہ اک آزاد قوم اے۔ ساڈی طرح نہیں کہ اردو دی تھاں زباناں دا ملغوبہ استعمال کیتا جاندا اے۔ ساڈے حکمراناں دا وتیرہ رہیا اے کہ جس ملک نے منہ لا لیا ایسے دی پیروی تے اطاعت شروع کر دتی۔ پہلے حکمران امریکہ، برطانیہ، نفرانس تے جرمنی توں متاثر سن تے پاکستان وچ انگریزی دا جنون شروع ہو گیا۔ اج وی انگریزی دی غلامی کیتی جاندی اے تے پاکستان دے کالے انگریز اج وی انگریزی بولن نوں فخر سمجھدے نیں۔ ساڈے کول 90 فیصد ملازمتاں انگریزی بولن دی بنیاد اُتے دتیاں جاندیاں نیں۔ انگریزی تے امریکہ تے برطانیہ دے جمعدار تے جاہل وی کمال دی بولدے نیں انج دی انگریزی ساڈے کول ایم اے، ایم فل انگریزی کرن والے وی نہیں بولدے۔ ساڈے کول ایم اے، ایم فل کرن والے ایس قدر ناقص تے اغلاط دے مجموعیاں دے نال انگریزی بولدے نیں کہ جے گورے ایہہ انگریزی سن لین تے کہہ اٹھن گے کہ پاکستانیاں نے انگریز سامراج توں اپنا انتقال لے لیا۔ اک انگریزی بولن والا اوہ طبقہ اے جنہاں دے کول نہ کالج دی تعلیم اے نہ یونیورسٹی دی۔زیادہ تر شوبز، سپورٹس، نو دولتیئے لوک نیں۔ جنہاں وچ سیاستدان، اداکار، کھلاڑی، بیوٹیشن، بزنس مین تے نویں نویں امیر ہون والے بندے شامل نیں ایہہ کوئی اکیڈمی جوائن کر لیندے نیں یا کوئی ٹیوٹر کجھ مہینے لئی رکھ کے کجھ مخصوص جملے تے الفاظ سکھ لیندے نیں ایس دے بعد ایہہ انگریزی تے اردو دی کھچڑی پکاندے نیں بلکہ رومن اردو انگریزی دا تڑکا وی لاندے نیں۔ خیر عمران خان دی ایہہ گل سن کے کافی خوشی ہوئی کہ ایہناں نوں اپنی زبان نال محبت اے تے اوہ اردو وچ ای گل بات کردے نیں۔ عمران خان دی ایہہ گل وی مثالی لگی کہ اوہ اپنی زبان تے ثقافت دے حوالے نال اقدامات کر رہے نیں۔ جدوں حکمران اپنے قول و فعل نال کجھ ثابت کردا اے تے قوم وی ایس دے نقش قدم اُتے چلدی اے۔ عمران خان دے کجھ بیاناں توں خاصی تشفی ہوئی اے پر جویں کہ عمران خان نوں جاننی آں کہ اوہ ڈٹ جان تے کر گزردے نیں۔ مینوں ڈر لگدا اے کہ امریکہ نوں اڈے نہ دین والا کدھرے جذباتی ہو کے امریکہ دیاں چالاں دا شکار نہ ہو جائے۔واضح رہوے کہ نویں امریکی صدر نے افغانستان نال جنگ بندی دا فیصلہ کر لیا اے۔ افغانستان توں امریکی تے نیٹو فوجاں واپس آ رہیاں نیں۔ سابق امریکہ صدر ڈونلڈ ٹرمپ نے وی افغانستان وچ جنگ ختم کرن دا بارہا عندیہ دتا سی پر جوبائیڈن نے باقاعدہ جنگ ختم کر دتی اے تے ہن افغانستان جہے کھنڈر ملک توں امریکہ دی ساری دلچسپیاں ختم ہو گئیاں نیں۔ امریکہ دی دلچسپی دے مراکز ہن افغانستان، عراق، یمن، شام ایران نہیں رہے۔ پاکستان وچ نہ چاہندے ہوئے وی دلچسپی رکھنا امریکہ دی مجبوری اے تاں ہن امریکہ دی ساری کشش چین، روس وچ اے۔ روس پرانا حریف اے تے ایس توں امریکہ دی ساری قوتاں ہمیز ہوندیاں نیں۔ سپر پاور دا ٹیگ بنن دے باوجود روس اج وی اپنی زبان، ثقافت، سیاحت، سیاست، ذہانت تے علم و ادب دے علاوہ سائنس تے ٹیکنالوجی وچ سپرپاور اے۔ ایس دیاں جڑاں مضبوط نیں تے اوہ ذہانتاں، قیادتاں، نفاستاں، تے شجاعتاں دا سرچشمہ اے۔ ایس لئی امریکہ لئی روس اج وی پرکشش اے۔ چین نے خود نوں ایشیا دا سپرپاور ثابت کر دتا اے۔ اج ساری دنیا وچ چین تجارت کر رہی ااے تے ہر حوالے نال طاقتور اے۔ سی پیک چین لئی خزانیاں دی کنجی اے جس نال چین دنیا دا سپرپاور بن جائے گا۔ صرف چار ورہے بعد ساری دنیا وچ چین دا سکہ چلے گا تے ایہہ سب سی پیک دی بدولت ہوئے گا۔ سی پیک اک لمبی مدت دا منصوبہ اے جیہڑا مشرف دور وچ بنایا گیا تے ایس وچ پاکستان دی سرزمین ، باشندے، محنت، طاقت، پیسہ، سب کجھ مسلسل لایا گیا اے، ایس وچ پاکستان نے اپنا بوہت کجھ داء اُتے لایا اے پاکستان دی ساری زمین شامل اے۔ سی پیک نال خطے وچ زبردست خوشحالی آن والی اے تے ثقافت دے نویں رنگ کھلرن والے نیں۔