پِلاک لوک سٹوڈیو اور پِلاک ٹی وی ولوں ماضی دے معروف گلوکار حامد علی بیلا دی برسی دے موقعے اُتے مکالماتی نشست

رپورٹ: سید علی قیصر

پنجاب انسٹیٹیوٹ آف لینگوئج، آرٹ اینڈ کلچر (پِلاک) دے زیر اہتمام پلاک لوک سٹوڈیو تے پلاک ٹی وی ولوں ماضی دے معروف گلوکار حامد علی بیلا دی برسی اُتے اک مکالماتی نشست دا انعقاد کیتا گیا جس دی میزبانی ڈاکٹر صغرا صدف ڈائریکٹر جنرل پلاک نے کیتی جد کہ اظہار خیال کرن والیاں وچ عنایت عابد، قادر علی شگن، سجاد علی بیلا تے خاقان حیدر غازی شامل سن۔

ڈاکٹر صغرا صدف نے کہیا کہ اردو تے پنجابی بولن والا شاید ای کوئی انج دابندا ہوئے جس نے ’’مائے نی میں کہنوں آکھاں‘‘ شاہ حسین دا ایہہ کلام نہ سنیا ہوئے۔

حامد علی بیلا اوہ عظیم گلوکار نیں جنہاں نے پہلی وار ایس کلام نوں گایا تے سنن والیاں نوں ورطہ حیرت وچ پا دتا۔

انج لگیا جویں کوئی آفاقی پیغام سنایا جا رہیا ہوئے۔ شاہ حسین نے جس درد تے سوز دے نال ایس کلام نوں لکھیا ایس دی بھرپور عکاسی حامد علی بیلا نے کیتی۔ایس کلام نوں گان نال ایہناں نوں اوہ شہرت ملی جس دا اوہناں نے کدی سوچیا وی نہیں سی۔

ایس موقعے اُتے عنایت عابد، قادر علی شگن تے سجاد علی بیلا نے ایہناں دا گایا ہویا صوفیانہ کلام پیش کیتا۔