توں ڈگیں تے تینوں پنج سو چکدے نیں

لكهت:سعد اللہ شاہ

لفظ ٹوٹے لب اظہار تک آتے آتے
مر گئے ہم ترے معیار تک آتے آتے
ایسے لگتا ہے کہ آسودگی قسمت میں نہ تھی
جل گئے سایہ دیوار تک آتے آتے
کیہ کریئے سارے جتن کرکے ویکھ لئے دورفتن ختم ہون دا ناں نہیں لیندا۔ فیر اک نکی جہی امید تے اسیں جینے آں ایہ وی من لیا کہ برداشت کرن تے صبر کرن توں ساڈے قوی مضبوط ہوندے نیں بھاویں زندگی واسطے غم وی ضروری اے۔ ساڈی ترجیحات وچ تے پہلی تھاں تے غریب لوک تے سرکاری ملازم نیں تاجر تے اشیائے صرف وچ مہنگائی دے حساب نال وادھا کر دیوے گا وڈا تاجر تے وڈے بل تے سیلز ٹیکس لاندا اے تے اوہ حکومت دے ناں تے گڑ بڑ کردا اے۔ ایہ اک وکھری کہانی اے وچارہ تنخواہ دار تے رو وی نہیں سکدا۔ سارے لوک انھے تے نہیں کہ اوہناں دی سمجھ وچ کجھ نہیں آ رہیا۔ بجٹ آن دے بعد ساڈے خدشات تے توقعات دے بالکل مطابق حکومت نے دتی گئی مراعات یعنی دس فیصد تنخواہواں وچ وادھا کس طرح برابر کرنا شروع کر دتا سگوں سرکاری ملازماں نوں لینے دے دینے پے گئے۔ سب توں ودھ مضحکہ خیز تے تکلیف دہ خبر ایہہ وے کہ حکومت نوں متنبہ کیتا جا رہیا اے کہ جے کنک درآمد نہ کیتی گئی تے آٹا ضرور مہنگا ہووے گا:
دامن چشم میں تارہ نہ جگنو کوئی
دیکھ اے دوست مری بے سروسامانی کو
اسمبلی وچ گلاں ہوندیاں نیں کھوتیاں دیاں تے باندراں دیاں۔ میں ایہدے خلاف وی نہیں کہ تھوڑی جہی شرارت تے چھیڑچھاڑ کر لینی چاہیدی اے۔ بڑی چالاکی دے نال ویلا گزاریا جا رہیا اے ملک توں ودھ اپنی انا تے اپنے دوستاں دے مفادات مسئلہ بنے ہوئے نیں۔ سب توں تکلیف دہ گل ایہہ وے کہ حکومتی ترجمان خوشامدانہ بیان دیندے نیں کہ خان صاحب دی قیادت وچ معیشت دے بحال ہون تے اپوزیشن بھیڑی طرح پریشان اے گھٹو گھٹ سب دا ایہو کہنا اے کہ معاشی ترقی نے مخالفاں دیاں نیندراں حرام کر دتیاں نیں۔ ذرا سوچو تے گل اوہناں دی ٹھیک اے اپوزیشن ای کیہ لوک وی ایس ترقی تے پریشان سگوں حیران نیں۔ مینوں تے اوس ویلے پریشانی ہوئی کہ اپنی پسند دا فروٹ لیچی لین گیا تے پتہ لگا کہ لیچی ساڑھے تن سو روپیے کلو اے جہنوں شک ہووے آپ جا کے بازاروں پتہ کر لوے۔ آڑو ڈیڑھ سو روپیے کلو‘ ہر دانشور ایہو گل کہہ رہیا سی کہ حکومتی بنچز نوں اپوزیشن دی گل سننی چاہیدی سی۔ اوہ گل جہڑی توں نہیں سنی مری عمر بھر دا ریاض سی۔ اوہو ان سنی اخباراں تے ویکھی جا سکدی اے کہ ریکارڈ مہنگائی‘ پنجاہ لکھ بیروزگار‘ کارکردگی صفر‘ ایہدے جواب وچ وفاقی وزیراں ولوں کورس وچ اک ای جواب اسحاق ڈار دیاں غلطیاں بھگت رہے نیں ایہدا مطلب تے ایہ ہویا کہ مہنگائی تے قرض دے الزامات تے تسیں من رہے او تسیں تے آن والیاں لئی وی جواز دے رہے او۔ کیسی مزے دی گل اے کہ شماریات تے عشاریاں دے تحت تے مہنگائی وچ کمی آ رہی اے شاید اوہ شے جہڑی پنجاہ توں اک سو دس روپیے ہو گئی تے اوہ دس روپیے گھٹ ہو گئے ہون پر انج وی نہیں اک ہور وزیر فخر کر رہے سن کہ مہنگائی دس رہی اے کہ لوکاں دی قوت خرید ودھدی اے۔
بات ایسی ہے بتانے کی نہیں دنیا کو
روپڑے تو ہم بھی خریدار تک آتے آتے
میں وی کیہ آں کہ اینی سنجیدگی نال بجٹ تے بجٹ دے بعد دے مسئلے لے کے بہہ گیا‘ کیہ کراں موجودہ صورتحال نوں اپنے قارئین دے سامنے رکھنا وی تے ہوندا اے۔ اک گل میں واضح کر دیواں کہ مقصد کوئی حکومت دشمنی نہیں اوہناں د ینگے اقدام تے اسیں فوراً رسپانس کرنے آں۔ اجے ویکھو کہ خان صاحب نے امریکہ نوں اڈے دین دے حوالے نال انٹرویو دیندے ہوئے کیہ Absolutely not کہیا تے اسیں اندر تک خوش ہو گئے تے اوہناں نوں بھرویں داد قطعہ لکھ کے دتی۔ ایس حمیت تے غیرت دی تے لوڑ اے ایہ وکھری گل اے کہ لوک ایہدے تے وی تنقید کرن بہہ گئے کہ اڈے دین دا فیصلہ وزیراعظم نہیں کردا۔ چلو جے ایہ گل وی من لئی جاوے تے غلط کیہ تہاڈے بقول تے فیر ایہ پیغام کنہے دتا اے ایسے طرح جس طرح ایٹمی دھماکیاں دی اجازت مل گئی سی۔ وطن دی سلامتی لئی جو وی اگے آوے گا قوم اوہدے لئی جان دی بازی لا دیوے گی۔ مولانا فضل الرحمن فرماندے نیں کہ خان نے ایہ اعلان اوہناں دے پریشر پاروں کیتا اسیں ایہ وی من لینے آں۔ فیر وی خان دی تعریف کہ انا دا مسئلہ نہیں بنایا۔
ہن آخر وچ ذرا بلاول دے شگفتہ خطاب دا تذکرہ ہو جاوے کہ سانوں بلاول اوس سمے بڑے پیارے لگے جدوں اوہ خان صاحب نوں حکومت دی واحد تے انوکھی کامیابی تے مبارک دے رہے سن کہ ایس گل تے حکومت مبارک دی مستحق اے کہ اوہناں دے عہد وچ کھوتیاں دی خوب افزائی ہوئی اے تے پورے اک لکھ کھوتے ودھ گئے نیں پر اوہناں نے گھوڑیاں بارے وی کیہا کہ اوہ اونے ای نیں۔ کھوتیاں دی گل تے اک پاسے کہ اوہ کھادے نہیں گئے تے ودھدے گئے۔ ایہ جہڑے گھوڑے نیں ایہناں دا تذکرہ بی بی دے دور وچ وی رہیا کہ جو مربع کھاندے سن تے فیر ہارس ٹریڈنگ وچ تے واقعتاً گھوڑے کدی اوہ وک کے اک پاسے ٹر جاندے نیں تے کدی دوجے پاسے تے ہن دی واری اوہ تریجی قوت دے کول نیں۔ واقعتاً گنتی اوہو اے انج وی بلاول اہمیت اختیار کر گئے نیں کہ اوہناں دی تقریر نوں پی ٹی وی وچ سنسر کر کے وکھایا گیا اے۔ میرا تے بلاول اگے اک سوال اے کہ اوہ بہت سارے پرزے کڈھ رہے نیں تے سانوں متاثر وی کر رہے نیں پر سندھ اسمبلی وچ جو کجھ نصرت کہندی اے کیہ تسیں اوہدا وی کوئی جواب دتا۔ کیہ تسیں اپنے والد محترم دے وچھائے کنڈے صاف کرن وچ دلچسپی رکھدے او۔ سب توں تکلیف دہ گل نصرت نے ایہ دسی کہ سندھ حکومت یتیماں تے معذوراں دا کوٹہ وی کھا گئی۔ خوشامدیاں تے اوہناں دے کیہ طوطے بولن گے۔ آخر وچ محمدعباس مرزا دا اک بہت پیارا شعر:
توں ڈگیں تے تینوں پنج سو چکدے نیں
میں ڈگاں تے اوہو،حالے مریا نہیں