‘‘بنے گا نیا پاکستان ’’

لكهت:ابرار ندیم

عام طور تے میں اجہی کسے تھاں تے رُکدا نہیں پر اوس دن کیوں جے چھٹی دا دن سی تے میری کوئی اینی رُجھ وی نہیں سی ایس لئی جیویں ای کینال روڈ تے مینوں سڑک کنڈھے لوکاں دی بھیڑ نظر آئی میں گڈی سائیڈ تے روکی تے ایہ ویکھن لئی کہ توک کسے تماشے دے دوالے اکٹھے نیں گڈی توں لہہ کے بھیڑ دے نیڑے ٹر گیا۔ اوتھے جا کے میں ویکھیا کہ ڈاڈھی گرمی وچ اک مفلوک الحال بندہ جہڑا چنگا بھلا زخمی وی سی پاگلاں ورگیاں عجیب و غریب گلاں کر رہیا سی جہدے تے لوک ہس رہے سن۔ میں بھیڑ نوں چیردا ہویا اگے ودھیا تے آل دوالے کھلوتے لوکاں توں پچھیا ایہ کون اے تے ایہ کیویں زخمی ہویا اے۔ اوتھے کھلوتے اک نوجوان نے کہیا جناب ایہ تے پتہ نہیں کہ ایہ کون اے پر ایہ پتہ اے کہ تھوڑی دیر پہلے اک تیز رفتار کار ایہدی موٹرسائیکل نوں سائیڈ مار گئی اے جہدے نتیجے وچ ایہ ڈگ کے زخمی ہو گیا اے تے اوس ویلے توں ایہ بونگیاں مار رہیا اے۔ میں اوس کار والے دی بے حسی تے افسوس کردے ہوئے اوس بندے نوں کہیا ایہ وچارا تے چنگا بھلا زخمی اے تسیں لوک ایہدی مرہم پٹی لئی ایہنوں کسے نیڑے ہسپتال لے جان دی تھاں اینی دیر توں ایتھے کھڑے ایہدا تماشا کیوں بنا رہے او۔ ایہدے تے اک ہور صاحب کہن لگے جناب تہاڈے آن توں پہلاں اسیں ایس بندے نوں تن چار واری طبی امداد لئی نیڑلے ہسپتال لے جان دی کوشش کر چکے آں پر ایہ کسے نوں اپنے نیڑے نہیں آن دے رہیا تے جے ایہدے نال زبردستی کرن دی کوشش کریئے تے ایہ بڑے خوفناک طریقے نال سڑک تے ٹکراں مارن لگ پیندا اے۔ میں پچھیا ایہ انج کیوں کر رہیا اے پہلے والے نوجوان نے کہیا جناب! ایہنے اک ای رٹ لائی ہوئی اے کہ جدوں تک وزیراعظم صاحب ایتھے آپ آ کے اوہدی گل نہیں سنن گے ایہ ایتھوں نہیں ہلے گا۔ ایہدے تے میں کہیا کیہ احمقانہ گل اے وزیراعظم صاحب ضروری مصروفیات چھڈ کے ایس بندے لئی اسلام آباد توں لہور ایناں چھیتی کیویں آ سکدے نیں تے جس طرح ایہ زخمی اے جے ایہنوں کجھ دیر ہور طبی امداد ن ہ ملی تے زیادہ لہو وگن دی وجہ نال ایہدی موت وی ہو سکدی اے۔ فیر اوس زخمی بندے نے میری گل سن کے بڑے انداز نال اچی آواز وچ چٹکی وجا کے مینوں اپنے متوجہ کیتا تے فیر لہک لہک کے تحریک انصاف دا ترانہ جب آئے گا عمران سب کی جان بڑھے گی اس قوم دی شان بنے گا نیا پاکستان‘ گان لگ پیا تے آل دوالے کھلوتے لوک اک واری فیر ایہدی ایس حرکت تے ہسن لگ پئے۔ میں دو قدم اگے ودھ کے اوس بندے نوں کہیا محترم تسیں چنگے بھلے زخمی او تے مسلسل تہاڈا خون وگ رہیا اے تسیں اپنی ضد چھڈ دیو تے ایتھوں اٹھو میں تہانوں کسے ہسپتال لے چلنا واں ایہدے بعد تہاڈا وزیراعظم پاکستان توں جو وی مطالبہ ہووے بے شک اوہدے پورا ہون تک ایسے تھاں دھرنا دے کے بہہ جائو۔انج وی وزیراعظم صاحب ایس ویلے تہاڈی ایس حالت توں بے خبر پتہ نہیں کتھے ہون گے۔ اوہناں نوں خبر ہون دے بعد اوہناں دے ایتھے اپڑن وچ گھنٹوں لگ سکدے نیں ایس دوران زخمی حالت وچ بناں علاج معالجے دے ایتھے بیٹھے رہن نال تہاڈی جان نوں ڈاڈھا خطرہ ہو سکدا اے۔
میری ایہ گل سن کے اوہ کسے انقلابی لیڈر دے انداز وچ کہن لگا ایہ جان تو آنی جانی ہے اس جاں کی تو کوئی بات نہیں تے ایس مصرعے دے نال ای فیر توں لہک لہک کے تحریک انصاف دا ترانہ جب آئے گا عمران سب کی جان بڑھے گی اس قوم کی شان بنے گا نیا پاکستان گنگنان لگ پیا۔ اوس بندے دیاں ایہناں پٹھیاں سدھیاں حرکتاں توں میں اندازا لایا کہ شاید چوٹ لگن دی وجہ نال ایس بندے دے دماغ دا کوئی پرزہ ڈھلا ہو گیا اے۔ میں اوسے پہلے والے منڈے توں پچھیا کیہ اوس بندے دے کول کوئی موبائل وغیرہ موجود اے اوہنے دسیا جی اوہدے کول اک بٹناں والا موبائل موجود اے پر سڑک تے ڈگن دی وجہ نال اوہ بند ہو چکیا اے نہیں تے شاید اسیں اوہدے موبائل توں لے کوئی فون نمبر لے کے ہن تک اوہدے کسے جانن والے نال رابطہ کر چکے ہوندے۔ میں کہیا ایہ کہڑا اوکھا کم اے تسیں اوہدا موبائل پھڑو تے اوہدی سم کڈھ کے مینوں دیو‘ میں ایہ سم ہنے اپنے موبائل وچ پا کے اوہدے کسے جانن والے نال رابطہ کرنا واں۔ میری ایہ گل سن کے اوہ نوجوان بڑے جوش نال کہن لگا ایہ آئیڈیا تے ساڈے وچوں کسے دے ذہن وچ آیا ای نہیں ایہدے بعد اوہ چپکے نال اوس زخمی بندے دے کول گیا تے اوہدے نیڑے پیا ہویا موبائل چک کے مینوں دے دتا میں جلدی نال اوہدی سم کڈھی تے اوہدے وچ موجود اک بندے دے نمبر تے فون کرکے اوہنوں اوتھے دی ساری صورتحال دس کے اوہدے توں پچھیا کہ ایہ بندہ کون اے اوہنے دسیا کہ جناب ایہ بندہ جہڑا تہاڈے سامنے زخمی پیا اے میرا کولیگ اے تے ایہدا ناں ابرارندیم اے۔ ایہ ریڈیو پاکستان وچ پروڈیوسر ہون دے نال پنجابی اردو زبان دا شاعر تے کالم نگار وی اے پچھلے دو تن ورھیاں توں سرکاری بجٹ وچ تنخواہ نہ ودھن تے اپنے گھریلو خرچے پورے نہ ہون دی وجہ نال اج کل ڈاڈھا پریشان رہندا اے۔ میں اوس بندے نوں جو کدھرے نیڑے ای رہندا سی چھیتی ایتھے اپڑن دا کہہ کے فون بند کرکے اوس بندے ول ویکھیا تے غالباً زیادہ خون وگن دی وجہ ن ال ہن اوہدے تے نقاہت طاری ہو رہی سی۔ میں اگے ودھ کے اوہنوں ہوش دوان لئی موڈھیاں توں پھڑ کے ہلایا تے اوہنے اپنی بند ہوندی اکھاں نوں زبردستی کھول کے میرے ول مسکراندے ہوئے ویکھیا تے گان لگا کب آئے گا عمران‘ سب کی جان۔٭