عمران خان دل جت رہے نیں

لكهت:مظہر برلاس

کجھ دیہاڑ پہلاں پنجاب اسمبلی وچ میاں اسلم اقبال نے بڑی دھڑلے دار تقریر کیتی۔ جارحانہ انداز وچ اپوزیشن دی چھترول کیتی۔ میاں اسلم اقبال لہور وچ پی ٹی آئی دے مقبول ترین رہنما نیں۔ لمے عرصے توں پی ٹی آئی دے نال نیں۔ ایہ ن لیگ توں اوس موسم وچ وی نہیں سن ہارے جدوں ن لیگ نے لہور فتح کیتا سی۔ اسلم اقبال عام طور تے نرم لہجے وچ گل بات کردے نیں۔ اوہناں نے تقریر وچ اپوزیشن نوں چاروں شانے چت کیتا۔ اوہناں دے لیڈر عمران خان نے تے کمال ای کر دتا۔ عمران خان بارے مشہور اے کہ اوہ نرم لہجے وچ گل کرن دے قائل ای نہیں۔ لمی دوستی پاروں عمران خان بارے صرف ایہہ کہہ سکنا واں کہ اوہ ہر طرح دے حالات وچ‘ جبر دے موسم دی پروا کیتے بناں آخری وقت تک لڑدا اے لڑائی وچ کسے دی پروا نہیں کردا اوہدیاں نظراں صرف اللہ تے ہوندیاں نیں۔ اوہ آخری لمحے تک اللہ تعالیٰ تو ں کامیابی دی امید بنھی رکھدا اے۔
ایہ 2018ء دے الیکشن توں مہینہ ڈیڑھ پہلے دی گل اے عمران خان نال اسدعمر بارے گل بات ہوئی تے میں اوہناں نوں کہیا کہ اسدعمر نوں وزیرخزانہ نہ بنانا‘ کہن لگے کیوں؟ میں اک وڈے ہوٹل وچ ہون والی تقریب دا حوالا دتا تے فیر کیہا کہ اسدعمر وزارت خزانہ نہیں چلا سکن گے کیوں جے اوہناں نوں معیشت بارے زیادہ پتہ نہیں۔ عمران خان بولے کیہ کراں‘ میں تے وعدہ کیتا ہویا اے سگوں میں تے اعلان کر چکیا واں کہ میرا وزیرخزانہ اسدعمر ہووے گا ایس حوالے نال کئی واری ذکر کر چکیا واں میں کیہا کہ بس میں جو کہنا سی کہہ دتا۔ ایہدے تے عمران خان کہن لگے مینوں پتہ اے کہ تسیں بہت گھٹ گلاں کردے او بڑی سوچ سمجھ کے رائے دیندے او پر میں وعدہ کر چکیا واں۔ خان صاحب نے وعدہ پورا کیتا اسد عمر نوں وزیرخزانہ بنا دتا۔ میں ایس فیصلے خلاف لکھنا شروع کیتا فیر جدوں وزیراعظم نوں عالمی مالیاتی اداریاں نے دسیا تے اوہ حیران ہوئے تے فیر اک دن ایسا آیا کہ کجھ لوکاں نے وزیراعظم نوں ملکی معاشی صورتحال دا حقیقی عکس وکھایا تے اوہناں نوں اپنا فیصلہ بدلدے ہوئے اسدعمر نوں ہٹانا پیا۔ وزیراعظم نوں آئی ایم ایف نال آپ مذاکرات کرنے پئے۔ ایہدے بعد معاشی ٹیم بدل دتی گی تے کم ٹر پیا۔ ہن اسدعمر پلاننگ دے وزیر نیں۔ ایہ وزارت اوہناں لئی بالکل ٹھیک اے اوہ این سی او سی دے چیئرمین نیں اوہناں دی حکمت عملی نال پاکستان دنیا دے پنج بہترین ملکاں وچ شامل ہو گیا اے۔ اجہے ملک جہناں نے کرونائی موسم وچ چنگی کارکردگی وکھائی۔ اج عالمی ادارے کہہ رہے نیں کہ پاکستان توں سکھو کہ کس طرح کرونا ورگی وباء دا سامنا کرنا چاہیدا اے۔
کجھ مہینے پہلاں اک ملاقات وچ وزیراعظم کہن لگے تہاڈی اسدعمر بارے رائے ٹھیک سی اوہ کجھ مہینیاں دی مسافت بڑی مہنگی پئی۔ سانوں پہلے دن ای آئی ایم ایف دے کول ٹر جانا چاہیدا سی خیر ہن ساڈی معیشت ٹھیک سمت وچ جا رہی اے۔ تھوڑا جیہا اوکھا سفر اے ایہ سفر وی ختم ہو جاوے گا۔ عمران خان دی معاشی ٹیم نے جو حالیہ بجٹ پیش کیتا اوہ موجودہ صورتحال وچ چنگا بجٹ اے ایسے لئی اپوزیشن منہ ویکھدی رہ گئی اے۔ اپوزیشن دے سارے منصوبے دھرے دے دھرے رہ گئے۔ بجٹ منظور وی ہو گیا تے اپوزیشن پہلے توں ودھ تقسیم ہو گئی۔ عمران خان موجودہ صورتحال وچ خوش نیں کہ اک پاسے اپوزیشن تقسیم در تقسیم دا شکار اے تے دوجے پاسے اوہناں دی معاشی ٹیم نے چنگا بجٹ پیش کیتا اے۔ بھاویں اپوزیشن نے ایوان دا ماحول خراب کرن دی بھرویں کوشش کیتی پر اوتھے حماداظہر ورگے نرم لہجے وچ کھری سنان والے وی موجود نیں۔ فواد چوہدری ورگا تیکھا سیاستدان اطلاعات دا وزیر‘ شاہ محمود قریشی تجربہ کار وزیرخارجہ تے کئی وزارتاں دا تجربہ رکھن والا شیخ رشید وزیرداخلہ اے۔ ایوان دے خراب ہوندے ماحول نوں بہتر بنان تے بجٹ دی منظوری لئی حاضری نوں بھرواں بنان وچ سب توں وڈا کردار ملک عامرڈوگر دا اے۔ ملتان دا عامر ڈوگر پورے اعتماد دے نال وزیراعظم نوں ایوان وچ لیاندا اے۔ وزیراعظم نے دو دن لگاتار تقریراں راہیں نہ صرف اپوزیشن دی زبان تے جندرے لا دتے سگوں پاکستانیاں دے دل وی جت لئے۔
عمران خان نے جنرل اسمبلی وچ یادگار تقریر کیتی سی۔ ایس تقریر نوں دنیابھر دے مسلماناں نے پسند کیتا سی ایس تقریر نے اسلام دشمن قوتاں نوں واہوا پریشان کیتا سی ہن پچھلے دیہاڑے اوہناں نے جہڑی تقریر قومی اسمبلی وچ کیتی اے اوہنے پاکستانیاں نوں خوش کر دتا اے۔ عمران خان پاکستان دے لوکاں دے دلاں دی آواز بن کے بولے۔ اوہناں نے ڈرون حملیاں دی حقیقت توں پردہ اٹھایا تے کہیا کہ کیہ اسیں برطانیہ تے ڈرون گرا سکنے آں اوتھے تریہہ ورھے توں ساڈا اک دہشت گرد بیٹھا اے۔ صاف صاف دس دتا کہ جنگ وچ امریکہ دا ساتھ نہیں دیاں گے امن لئی حاضر آں۔ جدوں تک بھارت کشمیر بارے پنج اگست دے اقدامات واپس نہیں لیندا مذاکرات نہیں ہو سکدے۔ ایہدے وچ کوئی شک نہیں کہ وزیراعظم دیاں حالیہ تقریراں نے لوکاں دے دل جت لئے نیں پر یاد رکھو کہ لندن ٹھگاں دی جنت اے۔ وزیراعظم دی امریکہ بارے تقریراں تے سلیم شہزاد دا شعر یاد آئوندا اے کہ:
یہ معجزہ تجھے پھر لوگ کم دکھائیں گے
ترے بغیر تجھے جی کے ہم دکھائیں گے