اپنا اپنا بیانیا

نذیراحمد ستی

جنگ دے بعد مذاکرات دی میز تے بہنا ای پیندا اے۔ اک نکام حکومت ہٹائو تحریک دے بعد ہیئت حاکمہ دا بیانیہ مننا بن دا اے۔ مسلم لیگ (ن) دے قائد دا خیال سی کہ لندن اوہناں دی اگلی سیاست دا مرکز بن سکدا اے۔ اوہناں دا ایہ سوچنا غلط نہیں سی۔ کئی علیحدگی پسند لندن وچ رہ رہے نیں۔ بنگلہ دیش بنان دی تحریک لندن وچ پروان چڑھی تے ایس تحریک وچ مددگار برطانوی رکن پارلیمنٹ نوں بنگلہ دیش دی شہریت شکریئے دے نال دتی گئی۔ بلوچ علیحدگی پسنداں دے کجھ رہنما لندن وچ رہندے نیں۔ الطاف حسین نوں پاکستان تے اوہدے مفادات تے حملے کرن لئی پوری دنیا وچ سب توں بہتر ملک برطانیہ تے سب توں مددگار شہر لندن اے۔ لندن مفرور شخصیات لئی کیوں اہم رہیا اے۔ ایہدی اک وجہ اے ٹھوس تے جاندار۔ مفرور بندیاں نوں اجہے شہر تے ملک دا انتخاب کرنا ہوندا اے جتھے اوہ نجائز تے غیرقنونی ذریعاں نال اکٹھی کیتی گئی دولت نوں استعمال وچ لیا سکن۔ بیمار نوازشریف دے کئی منصوبے سن۔ پہلے اوہناں نے کوشش کیتی کہ اوہناں ملکاں دی مدد حاصل کیتی جاوے جہناں نال اوہناں دے دوراقتدار وچ چنگے تعلقات رہے ترکی تے سعودی عرب۔ فیر اوہناں نے انسانی حقوق تے سیاسی انتقام دا بیانیہ گھڑ کے اپنے پتراں دے ہتھ وچ بٹھایا۔ سمدھی دے پُتر تے کجھ ملازم وی ایس بیانیے نوں لندن وچ وکھووکھ جمہوری ریاستاں دے سفارتخانیاں تک اپڑاندے رہے۔ اک طریقہ ایہ ورتیا گیا کہ بھارتی وزیراعظم نال رابطے کیتے گئے۔ پتہ نہیں ایہ گل کنی سچ اے پر ایہدے وچ کجھ حقیقت ضرور اے کہ مودی نوازشریف دی مدد دے حوالے نال کجھ اہم ملکاں اگے سفارش کیتی۔ کجھ لوکاں دا تے ایہ وی کہنا اے کہ سعودی عرب نوازشریف نال ڈاڈھا رنج اے پر بھارت نال چنگے تعلقات دا فائدہ چک کے نوازشریف نے درخواست کیتی اے کہ اوہناں نوں اک واری فیر سرور پیلس دا مہمان بن لیا جاوے۔
نوازشریف فیر عمران حکومت تے یلغار کر چکے نیں پہلا حملہ مولانا فضل الرحمن دے اسلام آباد وچ دھرنے تے دوجا پی ڈی ایم دی حالیہ جلسہ سیریز۔ لہور دے جلسے نے مسلم لیگ (ن) نوں چنتا وچ مبتلا کر دتا پر اوہنوں اصل جھٹکا بینظیر بھٹو دی برسی تے آصف علی زرداری دے بیانیے نال اپڑیا۔ اوس دن توں مریم نواز تے اوہناں دے آل دوالے دے لوکاں دے بیانات تے سرگرمیاں دا تجزیہ کرکے ویکھ لوو صاف محسوس ہوندا اے کہ اوہ صدمے وچ نیں۔ اک مولانا نیں جہناں تے ہن سارا انحصار کیتا جا رہیا اے پر مولانا دی اپنی جماعت وچ ٹٹ بھج شروع ہو چکی اے۔ نیب ولوں سوالنامہ وکھری پریشانی دا کارن اے۔ مولانا بیاناں راہیں فوج نوں مخاطب کر رہے نیں کدی کہندے نیں لانگ مارچ دے شرکاء جی ایچ کیو ول جان گے کدی کہندے نیں کہ ات گردی خلاف جنگ وچ علماء سرگرم کردار ادا نہ کردے تے ملک وچ امن نہ ہوندا۔ اوہناں دیاں گلاں دا کوئی وزن ہوندا تے اوہناں نوں جواب دتا جاندا۔ مسلم لیگ (ن) نوں آصف علی زرداری تے بینظیر بھٹو دا احسان مند ہونا چاہیدا اے جہناں نے ایس جماعت نوں بچا لیا۔ ن لیگ نے انتخابات دا بائیکاٹ کرن دا سوچیا تے بینظیر بھٹو نے میاں نوازشریف نوں جمہوریت دا سبق پڑھایا۔ ہن مریم نواز تے نوازشریف نے اک واری فیر ضمنی انتخابات تے سینٹ الیکشن دے بائیکاٹ دا اشارا دتا تے آصف علی زرداری نے انج کرن توں روکیا۔ آصف زرداری نے تے ایتھوں تک کہہ دتا کہ ساڈے توں وی کجھ سکھ لوو۔ مریم نواز بھلا کدوں سکھن دی صلاحیت رکھدیاں نیں۔ اوہناں دی سیاسی جدوجہد مبلغ کجھ طعنیاں‘ بددعاواں تے مشتمل اے۔
سیاسی محاذ تے اک ہور پیش رفت ہوئی اے۔ پیپلزپارٹی تے حکومت وچکا رکوئی سودے بازی ہوئی اے۔ مبصرین نوں اجے تک پتہ نہیں لگ سکیا کہ ڈیل کیہ اے۔ ساڈے اک خیرخواہ نے زبان کھولی اے۔ اوہدا کہنا اے کہ اگلے انتخابات نوں شفاف انداز وچ کران دا سوچ لیا گیا اے۔ انج ہوندا اے تے پیپلزپارٹی صرف دیہی سندھ دی سیٹاں توں وفاق وچ حکومت بنان دے قابل نہیں ہووے گی۔ مسلم لیگ (ن) نوں وسطی پنجاب وچ پنجاہ فیصد سیٹاں مل سکدیاں نیں پر جنوبی پنجاب تے بالائی پنجاب وچ اوہدا صفایا ہو سکدا اے۔ کے پی کے وچ تحریک انصاف توں جو سیٹاں بچن گئیاں اوہناں تے اے این پی‘ پیپلزپارٹی‘ جماعت اسلامی تے جمعیت علمائے اسلام دعویدار ہون گئیاں۔ ن لیگ نوں چار پنج سیٹاں ای مل گئیاں تے بہت ہووے گا۔ ایس صورتحال وچ ممکن اے بدلائو آوے تے ن لیگ یاں پیپلزپارٹی نوں پورے ملک توں حکومت سازی دا مینڈیٹ مل جاوے پر ایس گل دے آ ثار وکھائی نہیں دیندے۔ پی ڈی ایم نے فیصلہ کیتا اے کہ اوہ جمہوری روایات دا احترام کرن گے حکومت نوں ہور وقت دیاں گے تے انتخابات دا بائیکاٹ کرن دی تھاں سینٹ تے ضمنی انتخابات وچ بھرواں حصہ لواں گے۔ اینی ساری گولا باری دے بعد سارے فریق میز دے نیڑے آ گئے نیں۔ محمدعلی درانی نے مولانا تے شہباز شریف نوں سمجھا دتا اے کہ سیاست دے اصولاں دی پابندی کرن نہیں تے میز تے بیٹھن دی مہلت ختم ہو سکدی اے۔ فیر پتہ نہیں کہڑا نظام ہووے کہڑے لوک ہون تے کہڑے ادارے ہون ممکن اے اجہے ناخواندہ لوک آ جان جو کسے بیانیے نوں من دے ای نہ ہون۔٭٭