عمران خان نیک بندا اے

عتیق انور راجا

کجھ دن پہلے اسیں کجھ دوست اک تھاں بیٹھے وزیراعظم پاکستان دے حالیہ بیان اُتے گل بات کر رہے سن کہ ساڈے اک دوست کہن گے ’’عمران خان نیک بندا اے‘‘۔باقی سارے دوست وی ایس گل توں خوش سے کہ چلو کسے نے تے ہمت کردے ہوئے سپر طاقت نوں للکاریا اے تے فیر دلیل نال دنیا دے ساہمنے اپنا موقف پیش کیتا اے۔ اسیں جاننے آں کہ قیام پاکستان توں ای ملک پاکستان کسے نہ کسے صورت امریکہ دے دبائو وچ رہیا اے۔ بوہت سارے دانشور کہندے نیں کہ امریکہ دی محبت اصل وچ اوہ مٹھی چھری اے جیہڑی سانوں مسلسل ذبح وی کر رہی اے تے اسیں ایسے نوں خوش کرن دی کوشش وچ لگے رہنے آں۔ کدی اپنی سیاسی چالبازیاں نال، کدی ساڈے راہنمائواں دی چور بازاریاں نال، کدی آئی ایم ایف دے ادھار نال تے کدی ورلڈ بینک دے قرض نال امریکہ سانوں اپنا مطیع و فرما بردار بنائے رکھن وچ کامیاب چلیا آ رہیا اے۔ امریکہ نوں پہلی وار پاکستانی سرزمین اُتے فوجی اڈے شاید صدر ایوب خان دے دور وچ دتے گئے سن تے فیر صدر پرویز مشرف نے امریکی صدر دی اک فون کال اُتے ایہنوں سرنڈر کیتا کہ قوم نوں شدید ترین دہشت گردی دا ساہمنا کرنا پیا۔ امریکہ دے نال کھڑے ہون دی سزا ستر ہزار توں ودھ پاکستانیاں دی شہادت دی صورت ساہمنے آئی۔ پاکستانی معیشت مسلسل خسارے وچ رہن لگی، پاکستان وچ کھیڈاں دے میدان غیر آباد ہوندے چلے گئے۔ ملک وچ ناجائز اسلحے دے انبار لگن لگے تے امریکہ دا اتحادی بنن دے بعد امریکہ دے ایما اُتے ای میرے پیارے ملک اُتے طرح طرح دی پابندیاں لگدیاں چلیاں گئیاں۔ پر امریکہ پاکستان توں کدی خوش نہ ہویا بلکہ امریکہ ولوں پاکستان نوں ہمیشہ ’’ڈو مور‘‘دے احکامات ملدے رہے تے پاکستانی حکمران قومی مفادات نوں پش پست پاندے ہوئے امریکہ نوں خوش کردے ہوئے ملکی وقار اُتے داغ لاندے چلے گئے۔ ہن امریکہ اپنے جدید ترین اسلحے تے طاقتور اتحادیاں دے باوجود افغانستان توں تے نکلن اُتے مجبور اے پر اوہ علاقے وچ اپنا وجود برقرار رکھنا چاہندا اے ایس لئی پاکستان توں اک وار فوجی اڈے حاصل کرن دی نہ صرف خواہش کیتی جا رہی اے بلکہ مختلف انداز وچ پاکستانی سرکار نوں انج کرن اُتے مجبور وی کیتا جا رہیا اے۔ کہیا جا رہیا اے کہ پاکستان نوں گرے لسٹ وچ برقرار رکھوان دے پچھے وی امریکہ ای دی سازشاں شامل نیں۔ پر وزیراعظم پاکستان جناب عمران خان نے سرعام کہہ دتا اے کہ بس بوہت ہو چکیا ہن پاکستان امریکہ نوں کسے وی صورت اپنے ہوائی اڈے استعمال کرن دی اجازت نہیں دیوے گا۔
امریکی چینل نوں انٹرویو وچ جدوں میزبان نے وزیراعظم عمران خان نال سوال کیتا کہ کیہ آن والے دناں وچ سی آئی اے نوں پاکستان توں سرحد پار القاعدہ، داعش تے طالبان دے خلاف انسداد دہشت گردی دے خلاف مشن سرانجام دین دی اجازت دتی جائے گی؟ وزیراعظم پاکستان نے دو ٹوک انداز وچ جواب دتا کہ بالکل نہیں، ہن انج دی کسے گل دا کوئی امکان نہیں کہ اسیں اپنی سرزمین توں امریکہ یا کسے دوجے ملک نوں اپنے گوانڈھی ملک وچ فوجی اپریشن کرن دی اجازت دیئے۔ وزیراعظم عمران خان پاکستان نے دنیا نوں دس دتا اے کہ اسیں امریکہ دے نال امن دے شراکت دار تے بن سکنے آں پر جنگ وچ شراکت دار نہیں بن سکدے۔ ایہناں دا ایہہ بیان بلاشک و شبہ ہر پاکستانی لئی باعث فخر اے۔ تاریخ ویکھیے تے سانوں سمجھ آ جاندی اے کہ دشمن توں ڈردے ہوئے کیتے گئے سمجھوتیاں دے نقصان ایس قوم دی کئی نسلاں نوں بھگتنے پیندے نیں تے دنیا وچ ایہناں ای قوماں نوں عزت نال ویکھیا جاندا اے جیہڑی اپنی عزت آپ کرنا جاندیاں ہون۔ وزیراعظم پاکستان نوں سلام اے جیہڑے اج ایہہ گل کھلے عام کہندے نیں کہ ہن اسیں اپنی خودمختاری تے وقار اُتے سمجھوتا نہیں کرنا۔ وزیراعظم عمران خان سچ کہندے نیں کہ لا الہ الا اللہ انسان وچ غیرت پیدا کردا اے تے غیرت دے بغیر نہ کوئی انسان تے نہ ای کوئی ملک اُتے اٹھدا اے۔ جناب عمران خان افغانستان وچ امریکی جنگ دا حصہ نہ بنن دی گل سڑکاں اُتے وی کیتا کردے سن تے سانوں خوشی اے کہ اوہ ایہو گل زیادہ چنگے انداز وچ پارلیمنٹ فلور اُتے وی کر رہے نیں۔ قائداعظم محمد علی جناح نے اک وار تاج برطانیہ دے راہنمائواں نوں کہیا سی کہ مسلماناں نوں زیادہ دیر تیکر دبا کے نہیں رکھیا جا سکدا تے جدوں وی کوئی مسلماناں نوں دبان دی کوشش کردا اے تے مسلمان دشمن دے مقابل کدی ٹیپو سلطان تے کدی بابر دی شکل وچ ساہمنے آ کھڑے ہوندے نیں۔ اج کل چاہ خانیاں وچ ایہہ گلاں ہو رہیاں نیں کہ عمران خان دی شکل وچ قوم نوں اک انج دا لیڈر مل چکیا اے جس دے دلیرانہ فیصلیاں نال آن والے سالاں وچ پاکستان نں پوری دنیا وچ عزت و وقار تے برابری دی سطح اُتے ویکھیا جان لگے گا۔ ماضی دے حکمراناں دے قصے سنو، دنیا وچ پھیلے ایہناں دے کاروبار ویکھو تے ملکی سالمیت اُتے ایہناں دے کیتے گئے سمجھوتے پڑھو تے فیر ایہہ کہیا جا سکدا اے کہ عمران خان واقعی نیک بندا اے۔