غریب و سادہ و رنگیں ہے داستان حرم

اسیں اج ایہناں دی یاد وچ عید قرباں منانے آں پر اسیں اپنی انا، ضد، تکبر، کنا، بغض، حسدنوں قربان نہیں کردے

سید صفدر رضا

غریب و سادہ و رنگیں ہے داستان حرم
اسلامی مہینیاں دی برکتاں تے عبادتاں اپنیاں اپنیاں نیں پر ایہناں عبادتاں نوں مکمل طور اُتے اسیں ادا کرنا تے دور دی گل، اسلام جیہڑا بنی نوع انسان لئی مکمل ضابطہ حیات اے جس وچ حقوق اللہ جل جلالہ، حقوق العباد، اہل و عیال دے حقوق، گوانڈھیاں دے حقوق بلکہ جانوراں تیکر دے حقوق دسے گئے نیں۔ بظاہر ایہناں حقوق و فرائض دی بجا آوری مشکل ہوندی اے پر اسیں آقا نامدار خاتم النبین ﷺ دی حیات طیبہ دا مطالعہ کریئے تے تکلیفاں دا ساہمنا آپ ﷺ نے انتہائی صبر و تحمل نال کیتا تے ساڈے لئی انج دیاں مثالاں قائم کیتیاں جنہاں دی نغیر نہیں ملدی۔ بلکہ اللہ دی کبریائی دا پیغام اپڑان والے ہر نبی نے انج انج دیاں مصیبتاں برداشت کیتیاں ج نہاں وچوں اک وی ساڈی زندگی وچ آ جائے تے ساڈے لئی ایس دا اک جز وی برداشت کرنا اوکھا اے۔ یعنی عزتاں وڈی سن تے مصیبتاں وی وڈیاں سن۔ ذوالحجہ دے مہینے دا آغاز ہو چکیا اے حضرت ابراہیم علیہ السلام دے گھر جدوں پتر اسماعیل علیہ السلام دی ولادت ہوئی تے اللہ دی رضا دی خاطر جدائی دے ایس امتحان توں لنگھن لئی بی بی حاجرہ علیہ السلام تے حضرت اسماعیل علیہ السلام نوں صفہ و مروہ دی بے آب و گیاہ وادی وچ چھڈدتا۔ اج دے لئی بظاہر ایہہ عمل کسے دی سختی تے ہو سکدی اے کوئی محبت دا عمل نہ کہلائے گا پر حضرت ابراہیم علیہ السلام دی زندگی دا مقصد تے اللہ دی رضا سی تے اپنے خالق و مالک نال محبت و عشق دا امتحان سی۔ ایدھے جناب بی بی حاجرہ علیہ السلام دا امتحان مزید اوکھا ہو گیا جدوں حضرت اسماعیل علیہ السلام دی پیاس دی شدت ودھی تے دور دور تیکر پانی نہیں سی پانی دی تلاش دی خاطر جناب حاجرہ علیہ السلام نے صفہ و مروہ دے وچکار پانی دی تلاش وچ نسیاں پر پانی نہ ملیا اج وی حج دی سعادت حاصل کرن والے جناب حاجرہ علیہ السلام دی پیروی وچ سعی کردے نیں جس دے بغیر حج مکمل نہیں ہوندا جدوں پانی کدھرے نہ ملیا تے ایس کوشش دے انعام وچ حضرت اسماعیل علیہ السلام دیاں ایڑھیاں دے رگڑن نال پانی دا چشمہ پھٹیا تے زم زم دا ایہہ چشمہ اج وی جاری و ساری اے ۔ اک لمبی مدت توں ایہہ رواں اے تے ایس وچ کوئی کمی نہیں آئی۔ فیر حضرت اسمعیل علیہ السلام وڈے ہوئے تے اپنے والد حضرت ابراہیم علیہ السلام دی معاونت وچ اللہ دے گھر دی تعمیر فرمائی اج ایس گھر دا حج کرنا ہر مسلمان لئی اشتیاق دا باعث اے۔ حضرت ابراہیم علیہ السلام نوں نمرود دے دور وچ دعوت حق دی خاطر نمرود دے ظلم دا نشانہ بننا پیا جدوں آپ نوں ایس ظالم نے بھڑکدی اگ دے بلند شعلیاں وچ پایا تے اگ گلزار ہو گئی اگ نوں ویکھ کے آپ دے ایمان وچ رتی برابر کمی نہ آئی تے آپ نے نمرود نوں حیران کر دتا۔ اسلامی سال دے آخری مہینے دی 10 تاریخ نوں عید الاضحی عقیدت و احترام نال ملت اسلامیہ قربانی جس یاد وچ کردے نیں اوہ وی حضرت ابراہیم علیہ السلام دے خواب نوں تعبیر دین لئی تے اللہ دی راہ وچ اپنی ہر دلعزیز دی قربانی دین دے خواب توں حضرت اسماعیل علیہ السلام نوں آگاہ کیتا کہ میں تہانوں اللہ دی راہ وچ قربان کر رہیا واں۔ فرزند نے والد محترم نوں کہیا میں ایس لئی تیار واں تسیں مینوں صابر و شاکر پائو گے۔ تے اسیں اج ایہناں دی یاد وچ عید قربان منانے آں پر اسیں اپنی انا، ضد، تکبر،کنا، بغض، حسدنوں قربان نہیں کردے بلکہ صرف جانور نوں ای قربان کرنے آں اپنے اندر دے جانور نوں بچائے رکھنے آں۔ جدوں حضرت ابراہیم علیہ السلام دی چھری چلی تے مالک دی قبولیت دی سند دنبہ آ گیا تے چھری ایس اُتے چل گئی جدوں ابراہیم علیہ السلام نے پٹی کھولی تے حضرت اسماعیل علیہ السلام دی تھاں دنبہ ذبح ہویا تے قربانی قبول ہوئی پر شاید مکمل نہ ہوئی۔ اللہ تعالیٰ نے ایس قربانی دی تکمیل ہجے باقی رکھی۔ ایس قربانی لئی اللہ تعالیٰ نے اپنے محبوب ترین نبی خاتم النبین حضرت محمد ﷺ دا انتخاب کیتا جدوں آپ ﷺ نے نبوت دا بظاہر اعلان کیتا تے اہل مکہ آپ دی جان دے دشمن ہو گئے۔ جیہڑے آپ ﷺ نوں صادق و امین من دے سن پر رحمت اللعالمین نوں قسم قسم دیاں مصیبتاں دین وچ کوئی کثر نہ چھڈی۔ آپ دے نواسے حسین علیہ السلام نے ایہناں مصیبتاں دا مقابلہ جاری رکھیا۔ 28 رجب المرجب 60 ہجری نوں حج دے قصد توں نانا دا مدینہ چھڈیا آپ نوں پتہ سی کہ ہن اوہ ویلا دور نہیں جدوں حضرت اسماعیل علیہ السلام دی قربانی دی تکمیل ہو ن جا رہی اے ۔ 8 ذی الحج نوں جدوں حاجیاں دے احرام وچ لُکیاں تلواراں نوں ویکھیا تے حج نوں عمرہ وچ تبدیل کیتا تے خانہ خدا چھڈن دا قصد کیتا کہ ایہہ امن دی تھاں جنگ دا میدان نہ بنے غرض اپنے مقام شہادت دا رخ کیتا۔ ایدھے 9 ذی الحجہ نوں سفیر امام عالی مقام حضرت مسلم بن عقیل نوں تے 90 سال دے صحابی رسول حضرت ہانی بن عروہ دے نال شہید کر دتا گیا۔ نعمان بن بشیر دی تھاں ابن زیاد نے کوفے دی گورنری سنبھالی تے ابن زیاد دی فوج نے نہ صرف حضرت مسلم بن عقیل نوں شہید کیتا بلکہ حضرت مسلم بن عقیل نوں گرفتار کر کے ابن زیاد دے ساہمنے پیش کیتا گیا ایس لعین نے سزا دتی تے کوفہ دے دارالامارہ دی چھت توں ڈیگ دتا گیا تے کربلا دی قربانی دے پہلے شہید ہوئے۔ حضرت امام حسین علایہ السلام دا قافلہ اپنی اولاد اصحاب تے خواتین دے نال کربلا وارد ہویا محرم 61 ہجری وچ 7 محرم توں فوج یزید نے پانی بند کر دتا۔ حضرت اسماعیل دی پیاس اپنی تھاں تے اولاد، اصحاب امام دی پیاس اپنی تھاں۔ سال دے پہلے مہینے 10 محرم دا دیہاڑ آیا تے پیاسے شہیدا دی قربانیاں دا سلسلہ شروع ہویا۔ سارا دن شہادتاں دا سلسلہ جاری رہیا تے اوہ ویلا آ گیا جس ویلے لئی کائنات دے رحمت اللعالمین آقا نے آگاہ کیتا سی۔ حضرت اسماعیل علیہ السلام دی 10 ذی الحج دی قربانی دی تکمیل 10 محرم نوں اپنے نانا دے دین دی بقا دی خاطر نفس مطمئنہ امام عالی مقام نے 72 قربانیاں دے کے تے آپ اللہ رب العزت دے حضور قربان ہو کے اپنے نانا دے دین تے حضرت اسماعیل علیہ السلام دی قربانی دی تکمیل فرما دتی۔ اسلام نوں تاقیامت قائم فرما دتا کیوں جے
غریب و سادہ و رنگیں ہے داستان حرم
انتہا جس کی حسین ابتدا ہے اسماعیل