افغان امن تے بھارت

امریکی مکاریاں تے بھارت دیاں چالبازیاں اج اک وار فیر افغاناں نوں بدامنی دی اگ ڈیگ رہیاں نیں

تحریر حمیداللہ بھٹی

خطے دے ملک افغانستان وچ امن قائم کرن لئی کوشاں نیں پر بھارت اک انج دا آتش فشاں بنانا چاہندا اے جس نال بدامنی دا مستقل لاوا وگدا رہوے مقصد خطے دے ملکاں دی امن کوششاں نوں سبوتاژ کرنا اے پر ہجے تیکر ایہنوں کامیابی نہیں مل رہی اُلٹا چار وچوں دو قونصل خانے بند کرن اُتے مجبور اے تے ہن کابل دے سفارتخانے تے مزار شریف وچ قونصل خانے تیکر محدود ہو گیا اے۔ سوال ایہہ وے کہ جدوں بھارت تے افغانستان دی سرحداں آپس وچ نہیں ملدیاں تے فیر ایہنوں چار قونصل خانے بنان دی کیہ لوڑ سی صاف ظاہر اے قونصل خانیاں وچ گوانڈھی ملکاں دے خلاف کاروائیاں دی سازشاں کیتیاں جاندیاں سن۔ ہن اک ہور ہوشیاری کیتی گئی اے کہ سفارتی عملے دی منتقلی وچ ایئر فورس دے طیارے استعمال کیتے جا رہے نیں تے ایسے آڑ وچ ٹناں دے حساب نال ہتھیار تے بارود منتقل کر دتا گیا اے حالانکہ طالبان یقین دلوا رہے نیں کہ بھارت سنے سارے ملکاں دے سفارت خانیاں نوں تحفظ دیاں گے صرف اپنی سلامتی نوں خطرہ بنن والیاں نوں معاف نہیں کراں گے فیر وی بدنام زمانہ خفیہ ایجنسی را نوں سرگرمیاں ختم کرن دا کوڑا گھٹ ایس وجہ نال پین اُتے مجبور اے کیوں جے تعاون دی آڑ وچ نسلی و لسانی تعصب نوں ہوا دین دی سازش دا طالبان نوں ادراک اے ایہنوں اپنی کارستانیاں یاد نیں ایسے لئی فرار وچ عافیت سمجھ رہی اے ہن وی ایہہ عیاں اے کہ بھارت افغانستان وچ خانہ جنگی نوں ہوا دے کے اپنے لئے تھاں بنانا چاہندا اے کیوں جے خانہ جنگی نوں ہوا دین نال ای آمد و رفت دے ذرائع غیر محفوظ بنائے جا سکدے تے تجارتی سرگرمیاں ختم کیتیاں جا سکدیاں نیں۔ ایس توں علاوہ جے نسلی و لسانی خلیج دے خاتمے اُتے سارے افغان دھڑے متفق ہو جاندے نیں تے تخریبی سرگرمیاں لئی انسانی وسائل دا حصول ممکن نہیں رہوے گا۔ جس نال پاکستان دی شمال مغربی سرحد اُتے موجود دبائو گھٹ ہو سکدا اے ایس لئی بھارت دی سر توڑ کوشش اے کہ افغانستان بدامنی دا مرکز بنیا رہوے تاکہ تجارتی سرگرمیاں نوں فروغ نہ ملے تے پاکستان اُتے وی دبائو برقرار رہوے۔
یو این او چارٹر دی رو نال کسے ملک دی آزادی و خود مختاری نوں پامال کرن دی کسے نوں اجازت نہیں نہ ای کسے ملک دی سرزمین نوں دوجے ملک دے خلاف استعمال کرن اُتے وی قدغن اے پر چانکیائی سیاست دا علمبردار بھارت بظاہر تے امن پسندی دے راگ الاپدا اے پر حقیقت وچ ایہنوں امن نال کوئی سروکار نہیں اوہ خطے دا تھانیدار بنن دے چکر وچ علاقائی امن لئی خطرہ بن رہیا اے اوہ پاکستان دے خلاف افغان سرزمین استعمال کرن وچ مصروف اے ایس نے دو دہائیاں توں افغانستان نوں مذموم سازشاں دا مرکز بنا رکھیا اے ۔ حامد کرزئی توں لے کے اشرف غنی تیکر کٹھ پتلی حکومتاں مذموم سازشاں وچ ایس دی آلہ کار تے پشتبان نیں۔ امریکی مکاریاں تے بھارت دی چالبازیاں اج اک وار فیر افغاناں نوں بدامنی دی اگ وچ جھونکن دے نیڑے نیں جس دا ادراک کردے ہوئے افغان عوام نوں اتحاد توں کم لینا ہوئے گا امریکہ و نیٹو نے فوجی انخلا توں پہلاں سوچ سمجھ کے ای سیاسی سمجھوتے دی راہ ہموار کرن توں بے نیازی وکھائی اے ایہہ پراسرار بے نیازی دا مقصد بدامنی نوں ودھاوا دین دے سوا کجھ ہور نہیں کوئی دورائے نہیں کہ بھارت اج کل امریکہ دا بغل بچہ اے ایس لئی قرین قیاس ایہو اے کہ امریکہ نے بھارت دی ایما اُتے ای افغان فریقین دے وچکار سیاسی سمجھوتے توں پہلو تہی کیتی اے تاکہ بھارتی ریشہ دوانیاں لئی ماحول ساز گار رہوے۔
بھارت دے شر پسند بلوچاں تے ٹی ٹی پی نال رابطے کھلی حقیقت نیں تے ہن طالبان نال تعلقات استوار کرن دی در پردہ کوششاں وچ مصروف اے پر اک پاسے اوہ طالبان نال تعلق قائم کرنا چاہندا اے تے نال ای سفارتی عملے لئی گھلے جان والے جہازاں وچ ہتھیار و بارود سپلائی کرن وچ مصروف اے تاکہ اشرف غنی حکومت اپنا دفاع کرن دے نال طالبان نوں کچل سکے ایہہ کردار بھارت دی دوغلی پالیسی دا آئینہ دار اے کابل ایئر پورٹ اُتے اینٹی میزائل سسٹم دی تنصیب وچ وی بھارت پیش پیش اے۔ مقصد فارن فرینڈز نوں آپریٹ کرن وچ کوئی دشواری نہ ہوئے انج داکردار کسے دوست یا بہی خواہ دا نہیں ہو سکدا۔ مبصرین ایس اُتے متفق نیں کہ بھارت اصل وچ چین دے خلاف طالبان نوں امریکہ دے پراکسی دا کردار ادا کرن اُتے رضا مند کرنا چاہند ا اے۔ زلمے خلیل زاد ولوں شروع ازبکستان تے قطر دا حالیہ دورہ ایسے سلسلے دی کڑی قرار دتا جا رہیا اے ایہہ شٹل ڈپلومیسی افغاناں دے سیاسی مسئلے حل کرن ول پیر نہیں بلکہ بھارت گھنائونا کردار وسیع کرن دا سوچیا سمجھیا منصوبہ اے دونواں نوں خدشہ اے کہ جے طالبان سارے افغانستان اُتے قابض ہون دے بعد اسلامی امارت وچ وی کامیاب ہو گئے تے کشمیر وچ جاری شورش وچ نہ صرف وادھا ہو سکدا اے بلکہ اسلامی نظام دی کامیابی نال سرمایہ دارانہ نظام نوں دھچکا لگ سکدا اے۔
طالبان ایس لئی افغان اسمبلی دے منظور کیتے موجودہ آئین نوں نہیں من دے کیوں جے اوہ سمجھدے نیں ایہہ اسمبلی خود مختار نہیں بلکہ بیرونی حملہ آوراں دی سہولت کار اے نیز منظور شدہ آئین اسلامی اصولاں اُتے مبنی نہیں ایس لئی معاشرے نوں اسلامی اصولاں دے مطابق ڈھالن لئی خواتین نوں پردے دا پابند بنایا جا رہیا اے الیکٹرانک و پرنٹ میڈیا وچ وی تبدیلیاں لیائیاں جا رہیاں نیں جنہوں بنیاد بنا کے بھارت جہے ملک افغان دھڑیاں نوں مزاحمت کرن دی شہ دین لگے نیں تے ملک دی سب توں وڈی اقلیت تاجک کمیونٹی نوں اُکسایا جا رہیا اے ایہہ ریشہ دوانیاں کسے صورت افغاناں لئی بہتر نہیں جنہاں اُتے قابو پان لئی آپ افغاناں نوں متحد ہونا ہوئے گا پاکستان نے تے اپنی پالیسی بدل لئی اے تے اوہ کسے عالمی طاقت دے جارحانہ عزائم دا سہولت کار نہیں رہیا بلکہ محض امن لئی کردار ادا کرن تیکر محدود ہو گیا اے پر بھارت ولوں دہشت گرداں، علیحدگی پسنداں دی سرپرستی تے افغان قوم نوں نسلی تفریق اُتے لڑان دیاں سازشاں جاری نیں جنہاں توں افغاناں نوں محتاط رہنا ہوئے گا۔
افغانستان توں امریکہ دے بعد بھارت نوں وی تاریخ دے اک وڈے اپ سیٹ دا ساہمنا اے ایس دی ٹرانسپورٹ، شاہراہواں، آبی ذخائر تے ہسپتالاں دی تعمیر اُتے ارباں دی سرمایہ کاری ڈب رہی اے حکومت تے انٹیلی جنس اداریاں وچ پاکستان مخالف عناصر دی حوصلہ افزائی تے افغان میڈیا وچ پاکستان مخالف فضا بنان دی سر توڑ کوششاں دے باوجود سفارتی ہزیمت دے دہانے اُتے وے پاکستان دے خلاف آبی جارحیت دے نال افغانستان توں آن والا پانی بند کرن دی کوششاں بے ثمر ہون دا امکان ودھ گیا اے ایس لئی اپنے علاقائی مفاد لئی اشرف غنی جہی کٹھ پتلی حکومت دے تسلسل دا متنی اے پر گل بن دی نظر نہیں آندی کیوں جے ایران نے وی باور کرا دتا اے کہ اوہ مزید قتل و غارت جاری رکھن وچ ساتھ دین توں قاصر اے جس نال افغان صورتحال وچ ڈرامائی تبدیلی آئی اے تے علاقائی قوتاں دے مقابلے وچ بھارت نوں تنہائی دا ساہمنا ، سفارتخانے تے قونصلیٹ بند کرن دی نوبت آئی اے بہتر ایہو اے کہ امریکہ و نیٹو انخلا دے بعد بھارت وی افغاناں نوں اپنے مستقبل دا فیصلہ آپ کرن دیوے بھارت جنہا کردار ودھان دی ضدکرے گا نہ صرف علاقائی قوتاں بلکہ افغاناں ولوں وی مزاحمت دا ساہمنا کرنا پئے گا۔