اللہ نال تجارت

ڈاکٹر امجد ثاقب نے اپنا قلم، کسے دی ستائش وچ نہیں بلکہ اک خوبصورت سماج دی تعمیر لئی چکیا

رابعہ رحمٰن

غربت دے خاتمے تے سماجی 4ترقی دے حوالے نال ڈاکٹر امجد ثاقب دا ناں بے حد احترام نال لیا جاندا اے۔ اخوت دی بنیاد رکھ کے اوہناں نے اک غیر معمولی کارنامہ سرانجام دتا۔ اج ایس پروگرام دے توسط نال لکھاں گھرانے غربت توں نجات پا رہے نیں۔ ڈاکٹر امجد ثاقب دیاں کاوشاں ایتھے تیکر محدود نہیں، حکومت پنجاب نے جدوں مستحق طالب علماں لئی وظائف دا اک ادارہ بنان دا فیصلہ کیتا تے ایس دی سربراہی لئی وی ایہناں ای دا ناں آیا۔ پنجاب ایجوکیشنل انڈومنٹ فنڈ نامی ایس ادارے نوں اوہناں نے کمال خلوص تے محنت نال اگے ودھایا۔ ڈاکٹر امجد ثاقب اک دانشور وی نیں ایہناں دی کئی کتاباں مشہور ہوئیاں تے میرے زیر مطالعہ رہیاں۔ ایہناں دی نویں کتاب کامیاب لوک، چنیوٹی انٹرپرینورشب ویکھ کے پہلے تے مینوں حیرت ہوئی کہ اک بندا جیہڑا اپنی زندگی غریباں لئی وقف کر چکیا اے، کاروباری لوکاں دے بارے وچ کیوں لکھنا چاہندا اے پر جدوں میں ایہہ کتاب پڑھی تے واضح ہویا کہ ایہہ موضوع وی اصل وچ غربت دے خاتمے نال جا ملدا اے اوہ کامیاب بندیاں نوں مثال بنا کے غریباں نوں محنت تے خود انحصاری دا پیغام دینا چاہندے نیں تاکہ غربت دے ہنیریاں وچ امید دے دیئے روشن ہو سکن۔
ایس وچ کوئی شک نہیں کہ غربت دے علاج لئی قومی معیشت وچ بنیادی تبدیلیاں ناگزیر نیں محرومی دے کاتمے تے سماجی اصلاح دے بغیر ترقی ممکن نہیں۔ ہر ریاست نوں چنگی حکمرانی دی داغ بیل پانی چاہیدی اے ایس امر وچ قطعی دو آرا نہیں کہ ایسے قوم دا مستقبل روشن ہوئے گا جیہڑی معاشی تے سماجی طور اُتے مضبوط ہوئے گی۔ محنت جست جیہڑا یقین تے اخلاص، جے ساڈے دامن وچ ایہہ خوبیاں ہون تے غربت نوں شکست دینا عین ممکن اے۔ پاکستان نوں اک خوشحال تے فلاحی ریاست بنانا ساڈی زندگی دا اہم مقصد اے۔ ڈاکٹر امجد ثاقب نے اپنا قلم، کسے دی ستائش وچ نہیں بلکہ اک خوبصورت سماج دی تعمیر لئی چکیا۔ ایہناں مجبور لوکاں لئی جیہڑے تاریک راہواں وچ مارے جاندے نیں تے ایہناں دے جیہڑے وی زادراہ دے متلاشی نیں ایہناں کہانیاں دے پس منظر وچ مینوں اک عظیم پاکستان تعمیر ہوندا ہویا نظر آندا اے۔ایہہ دنیا ایس طرح بنائی گئی اے کہ ایس وچ خیر تے شر نوں باہم مخلوط کر دتا گیا اے مصلح دا کم ایہہ وے کہ اوہ خیر نوں چھانٹ کے وکھرا کر لوے تے خیر ای ول دعوت دیوے۔ قرآن نے مال و زر نوں فتنہ وی کہیا اے تے خیر وی۔ صحابہ رضی اللہ عنہم دیاں صفاں وچ اک پاسے حضرت ابوذر غفاریؒ تے سیدنا علی المرتضیٰؒ جہے حضرات سن جنہاں دا فقر ضرب المثل سی تے دوجے پاسے سیدنا عثما ن ابن عفان تے حضرت عبدالرحمن بن عوفؒ جہے اغنیاء دی وی کمی نہیں سی۔ ساڈا عجیب حال اے کہ اسیں اہل زر نوں حقارت دی نظر نال وی ویکھنے آں تے ایہناں جہیا بن جان دی تمنا وچ ساڈا دل وی مچلدا اے اک سچے مصلح وانگوں ڈاکٹر امجد ثاقب نے پاکستان دے امیر ترین لوکاں دی کامیابی دے پس پردہ خیر نوں دریافت کرن دی کامیاب کوشش کیتی اے اک زمانے وچ ڈاکٹر صاحب نے خواجہ سرائواں جہے طبقے دی دست گیری دا بیڑہ چکیا سی ہن اک بوہت وڈا کم اوہناں نے ایہہ کیتا اے کہ پاکستان دے امیر ترین لوکاں دے حالات دا اک انج دا انسائیکلو پیڈیا مرتب کر دتا جس دے صفحیاں وچ سانوں ایس سوال دا جواب مل سکدا اے کہ ایہہ لوک معاشی پستی دے پاتال توں اٹھ کے دولت و ثروت دے ستویں اسمان تیکر کنج اپڑے۔
کامیاب لوک پڑھ کے اندازہ ہوندا اے کہ موضوع انج دا نہیں کہ ایس نوں نظر انداز کر دتا جاندا، ایہہ لوک اوہ نیں جنہاں نے بھُک دا علاج بھیک وچ تلاش نہیں کیتا اوہناں نے اپنی ذات اُتے اعتماد تے اللہ تعالیٰ دی نصرت نوں اپنی طاقت بنایا۔ کہانیاں سب دی اک جہیاں نیں کردار، ناں تے مقامات مختلف ہو سکدے نیں کوئی گجرات کاٹھیاواڑ توں نکلیا، کوئی دہلی توں کوئی چکوال توں کوئی پانی پت توں۔ چنیوٹ دی مٹی وچ جانے کیہ کشش سی جس نے سب نوں اپنے ول کھچ لیا۔ ایہہ عجیب لوک سن جنہاں نے قلی بن کے لوکاں دا بوجھ چکیا ، مزدوری کیتی فاقے کٹے، فٹ پاتھاں اُتے سُتے، یخ بستہ راتاں وچ بدبو دار کھالیاں اُتے بہہ کے ٹرکاں اُتے بہہ کے سفر کیتا پر دست سوال دراز نہیں کیتا، امید دا دامن ہتھ توں نہیں چھڈیا، ایہہ معمولی لوک نہیںسن، صبر انکسار، سخت محنت، خود اعتمادی تے خدا اعتمادی، ناقابل شکست حوصلہ مندی، ڈب کے ابھرن دی صلاحیت صلہ رحمی اسراف توں گریز تے سخاوت ، ایثار اک دوجے نوں اگے ودھان دا جذبہ، دیانت داری، راست بازی، بزرگاں دی تعظیم مضبوط خاندانی نظام ایہہ اوہ گلاں نیں جنہاں پاروں ایہہ سب بام عروج اُتے اپڑے ۔ ایہہ کامیاب لوک ایس وطن دے محسن نیں اج پاکستان وچ جنہی جدت روشنی تے ترقی نظر آندی اے ایس وچ بے مثال لوکاں دا حصہ بوہت وڈا اے۔
ایہہ اک خوشگوار اتفاق اے کہ پاکستان دے ایہناں کامیاب لوکاں دی کہانی لکھن دا بیڑا پاکستان دی تاریخ دے کامیاب بندے نے چکیا۔ ایہہ کم ڈاکٹر امجد ثاقب دے علاوہ کوئی ہور نہیں کر سکدا۔ ایس نوں وی چنیوٹ دی مٹی دا فیضان ای سمجھنا چاہیدا اے کہ اوتھے افسری کردے کردے ڈاکٹر امجد ثاقب نوں وی اج توں 15 سال پہلے تجارت دا خیال آیا تے تجارت وی اللہ دے نال۔