حج دی فضیلت

ہر صاحبِ حیثیت بندے اُتے حج فرض اے

مولانا محمد اکرم اعوان

اسلام دے ارکان وچوں اک رکن حج اے۔ اسلام دے بنیادی ستون یا ارکان پنج نیں۔ کلمہ طیبہ، اللہ دی ربوبیت، نبی رحمت ﷺ دی نبوت دا اقرار تے غیر اللہ دی ربوبیت دا انکار۔ ایس دے بعد پنج ویلے دی فرض نماز دی پابندی، تیجا ہر سال رمضان المبارک دے روزے، چوتھا رکن زکوٰۃ تے پنجواں رکن حج اے ایہہ زکوۃ تے حج نوں چوتھے تے پنجویں نمبر اُتے ایس لئی رکھیا گیا اے کہ ایہہ ہر اک اُتے فرض نہیں ایہناں لئی اک خاص مالی معیار مقرر اے۔
حج اوس بندے اُتے فرض ہوندا اے جیہڑا مالی اعتبار نال ایس قابل ہوئے کہ آن جان تے اوتھے دی رہائش دا خرچ ایس دے کول ہوئے جنہا عرصہ گھر توں باہر رہنا اے اینے عرصے دا خرچ اپنے زیر کفالت حضرات نوں دے کے جائے۔ انسان دی صحت ایس نوں آن جان دی اجازت دیندی ہوئے، ایہہ ساریاں گلاں ہون تے فیر ایس اُتے حج فرض ہوندا اے۔ ایہناں وچوں اک وی گل نہ پائی جائے تے حج ایس اُتے فرض نہیں ہوندا۔ جے حیثیت ہوئے تے مسلمان بیت اللہ شریف وچ جائے۔ حج دے ارکان نیںپر ایہناں سب ارکان دا حاصل تے اک نتیجہ وی اے جے تسیں مختصر ترین الفاظ وچ بیان کر جائو تے اوہ ایہہ ہوئے گا کہ اللہ کریم دے ساہمنے ہتھیار سٹ دین دا ناں حج اے یعنی اپنے اختیار تے ارادے توں کفن لپیٹ کے غسل کر کے دو نفل ادا کر کے بیت اللہ شریف وچ حاضر ہو کے اللہ دے روبرو ایہہ قرار کرے کہ خدایا! جو ہو چکیا اوہ ہو چکیا تے پچھلا معاف کر دے، آئندہ لئی وعدہ کرنا واں تیری نافرمانی نہیں کراں گا۔ اللہ دے ساہمنے ہتھیار پان دا ناں حج اے۔ ہن ظاہر اے کہ کوئی بار بار تے شکست تسلیم نہیں کرے گا۔ شکست یا فتح دا فیصلہ تے اک وار ہو جاندا اے ایس لئی حج زندگی وچ اک وار فرض اے۔
جنہاں دے کول وسائل نہیں جیہڑے اوتھے نہیں اپڑ سکدے جنہاں دے کول ذرائع نہیں ایہناں لئی ہر جمع حج دی فضیلت رکھدا اے۔ سانوں کس نے دسیا کہ مکہ مکرمہ جائو ؟ حج ہوئے گا ایہہ دسیا اے نبی رحمت ﷺ نے تے اوہ ای اللہ دے رسول ﷺ جدوں ارشاد فرما رہے نیں کہ جے تہاڈے کول وسائل نہیں تے تسیں ہر جمعہ نوں حج کریا کرو۔ حضور ﷺ فرماندے نیں جیہڑا بندہ فجر دی نماز پڑھ کے اپنی جائے نماز یا مسجد نوں نہیں چھڈدا کہ اشراق پڑھ کے جاواں گا۔ تلاوت کردا اے، ذکر و اذکار کردا اے حتیٰ کہ سورج نکل آندا اے اوہ اشراق دے دو چار نفل پڑھ کے چلا جاندا اے تے ایہنوں حج نہیں حج دے نال عمرے دا ثواب ملدا اے یا جیہڑا بندا جمعے دی ادائیگی لئی غسل کردا اے کپڑے بدلدا اے جامع مسجد جاکے جمعہ ادا کردا اے تے حضور ﷺ فرماندے نیں غریب دا حج ایس دی جامع مسجد ای وچ اے تے جیہڑے اوتھے نہیں اپڑ سکدے اوہ اپنے نیڑے اپنے جمعہ دی مسجداں وچ جان ایہہ وی تے اللہ دی مسجداں نیں ایتھوں ای اللہ نال گل کر لوئو کہ خدا یا اوتھے تیکر جان دے میرے کول اسباب نہیں کہ اوتھے سرنگوں کردا ، توں مینوں ایتھوں تیکر اپڑایا اے تے میں ایتھے ای تیری بارگاہ وچ اعتراف شکست کرنا واں تے تیری حکومت قبول کرنا واں۔ سانوں چاہیدا اے کہ اسیں اپنے کردار ویکھیے اسیں اپنے آپ دے ذمے دار آں۔ اپنے آپ نوں اللہ دے روبرو پیش کر کے اپنے اختیارات ایس دے حوالے کرنا چاہیدے نیں تے اپنے لئی اللہ توں نجات منگنی چاہیدی اے۔
حج دا مقصد ایہہ وے کہ اسیں اپنے پچھلے اعمال نوں لیا کے اوتھے رکھ دیئے کہ خدایا میرا سرمایہ توں ای ایں پر میں تیرا عاجز بندہ واں تے میں اج تیرے ساہمنے اپنے اختیارات توں دستبردار ہونا واں۔ میں اپنے لئی کجھ نہیں سوچاں گا میں اپنے لئی کجھ نہیں کراں گا میں اپنی مرضی نال کدھرے جاواں گا نہیں توں مینوں حکم دیویں گا تے میں کدھرے جاواں گا۔ توں اجازت دیویں گا تے میں سوواں گا، توں جگائیں گا تے میں جاگ اٹھاں گا، توں آکھیں گا تے میں سجدہ کراں گا، توں کہیں گا بس کر میں بس کراں گا ، اج میری حکومت ختم تے تیری حکومت نوں میں قبول کرنا واں۔ اپنے آپ نوں ایہناں گلاں لئی جنہاں نال اللہ کریم راضی ہون، ذہنی طور اُتے تے ارادی طور اُتے تیار کر کے لے جائو تے اوتھے جا کے واقعی اللہ دے ساہمنے ہتھیار سٹ دیو تے اللہ دی حاکمیت نوں دل نال قبول کر لوئو۔
لوڑ صرف ایس گل دی اے کہ اسیں جتھے وی آں اوتھے رب جلیل نال ایہہ عہد کریئے کہ خدایا توں ساڈی توبہ قبول فرما تے سانوں وی اپنے گھر اُتے حاضری دی سعادت نصیب فرما۔ روضہ اقدس دی زیارت نصیب فرما اطواف سعی نصیب فرما، عرفات وچ جان دی سعادت نصیب فرما، اللہ قادر اے سب نوں عطا فرما سکدا اے پر ایس حال وچ کہ توں ساڈے توں راضی ہوئے تے اسیں تیرے اطاعت گزار بندے بن چکے واں۔ ساڈے دل دی دھڑکناں ہون تے تیرا ناں ہوئے ساڈے اعضا و جوارح ہون تے تیری اطاعت ہوئے۔ ساڈی پیشانیاں ہون تے تیرا دروازہ ہوئے ساڈے ہتھ اٹھن تے تیری بارگاہ وچ ، سر جھکن تے تیرے حضور، ایسے اُتے زندہ رکھ، ایسے اُتے موت نصیب فرما تے انج دے ای لوکاں دے نال یوم حشر وی اکٹھا فرما جس ہستی دی دعوت اُتے لبیک دا اثر ایہہ ہویا کہ تسیں اینا لمبا سفر کیتا تے ہن تہاڈے دل دی دنیا ای بدل گئی۔ ہجرت دی حقیقت کیہ اے؟جس ٹھکانے نوں اللہ لئی چھڈ دیئے انج دے ٹھکانے اُتے چلے جائیے جتھے اللہ دا حکم ہوئے۔ تسیں ملک یا شہر چھڈ دیو پر ایس توں وی کڑی ہجرت ایہہ وے کہ تسیں بُری عادتاں چھڈ دیو، اپنے مزاج نوں بدلو، سوچ نوں بدلو، کردار نوں بدلو، ہجرت دی بنیاد وی ایہو اے کہ جتھے جتھے اسیں اللہ دے نافرمان آں اوتھوں نکل آئیے تے اوہ طریقہ اپنایئے جیہڑا رب جلیل نوں پسند اے۔ جے انج کر لیا تے فیر حرام کنج کھایا جا سکدا اے؟ کس طرح توں بہو بیٹیاں نوں بے آبرو کیتا جا سکدا اے؟ کس طرح باقی زندگی وچ اللہ دی اطاعت چھڈ سکنے آں؟ اللہ نے سانوں اپنے گھر دا طواف نصیب فرمایا، ہن اللہ نال محبت کرن والے بلکہ اللہ نال عشق کرن والے ہو جائیے۔ ساڈے ہتھ اٹھن تے اطاعت رسول ﷺ وچ ساڈے سینیاں وچ عشق رسول ﷺ موجزن اے کہ سانوں در اقدس اُتے حاضری نصیب ہوئی ہن اسیں عام بندے نہیں لہٰذا اپنی ذمہ داریاں دا احساس کرنا چاہیدا اے اپنی تے معاشرے دی اصلاح لئی اپنا کردار ادا کرنا چاہیدا اے۔ اللہ کریم سانوں توفیق عمل دیوے۔ آمین