کابل دی جت وچ واشنگٹن دا سقوط

لکھت:مطلوب وڑایچ

کابل عالمی قوتاں دا میدان جنگ سی جتھے امریکہ‘ بھارت‘ اسرائیل پوری آکڑ نال حامدکرزئی تے اشرف غنی ورگے مہریاں دی کنڈ تے سن۔ سارے کابل وچ تباہ ہو گئے۔ جتھوں بیک وقت اک نہیں کئی سقوط ہوئے نیں۔ سقوط کابل ہویا‘ سقوط واشنگٹن ہویا‘ سقوط دلی و سقوط اسرائیل ہویا۔ کابل وچ اک ای ویلے وچ چین تے امریکہ لڑ رہے سن۔ پاکستان تے بھارت لڑ رہے سن۔ طالبان تے اشرف غنی حکومت اک دوجے دے آمنے سامنے سی۔ جے مینوں مختصر الفاظ وچ سارے منظرنامے نوں سمیٹن دتا جاوے تے سب توں ودھ جتھے ایس جنگ وچ جانی نقصان افغاناں دے بعد پاکستان دا ہویا اے اوتھے سب توں ودھ کامیاب پاکستان ہویا اے۔ پاکستان دی انٹیلی جنس ایجنسی نے ساریاں نوں ہرا دتا۔ بہترین انداز وچ اپنے پتے اوہنے کھیڈے۔ امریکہ جس طرح افغانستان چوں رسوا ہو کے نکلیا تے جس طرح اشرف غنی لنگی چھڈ کے صرف لنگوٹی وچ نسیا اے۔ اج امریکہ طالبان دے رحم و کرم تے اے۔ کل تک اپنے فاتح دا تاثر دین والا امریکہ اج طالبان اگے اپیل کر رہیا اے کہ اوہدے شہریاں دی حفاظت کیتی جاوے۔
افغانستان وچ امریکہ نے اک سو پنجاہ ارب ڈالر خرچ کر کے تن لکھ دی گنتی وچ افغان فوج کھڑی کیتی۔ اوہنوں دنیا دا جدید ترین اسلحہ دتا گیا۔ اوہدی بھارت‘ نیٹو‘ اسرائیل تے آپ امریکہ نے وی تربیت کیتی۔ جدوں اوہناں دی کارکردگی پرکھن دا موقع آیا تے ایہ خزاں دے پتیاں وانگوں کھلر گئی کسے نے سچ کہیا کہ
Man Behhind the gun is Moreimportat پاک فوج ایسی ای فوج اے۔ آئی ایس آئی نے اک واری فیر بناں گن دے افغانستان وچ نویں تریخ رقم کردے ہوئے کابل نوں واشنگٹن‘ دلی تے تل ابیب دا قبرستان بنا دتا۔ امریکہ‘ سعودی عرب تے اوہدے اتحادیاں نے روس نوں گرم پانی تک اپڑن توں روکن لئی مدرسیاں دے طلبہ تے مشتمل اک مزاحمتی فورس تشکیل دتی جہناں کول امریکی اسلحہ تے تنخواہواںامریکی ڈالر وچ ملدیاں سن جد کہ اوہناں دی خاص پچھان رکھن لئی اوہناںنوں وردی نہ دتی گئی تے فیر مذہب اسلام دا لبادہ تے نقاب اوڑھ کے مجاہدین نوں روس دے سامنے حفاظتی بند دے طورتے رکھیا گیا۔ ہزاراں قیمتی انسانی جاناں دی قربانی دے بعد روس افغانستان چوں ہر کے تے سوویت یونین دے ٹٹن دا داغ لے کے نکلیا۔
دوستو! ہن گل ایتھے ختم نہیں ہو جاندی روس دے ہرن مگروں امریکہ پوری دنیا لئی واحد سپرپاور بن کے سامنے آیا تے آکڑ وچ عراق نوں مدھدا ہویا کویت‘ سعودی عرب تے میڈل ایسٹ وچ اپنیاں فوجاں لاہ دتیاں تے اپنے فوجی اڈے قائم کر دتے۔ ایسے دوران 9/11 دا ورلڈ ٹریڈ سنٹر دا واقعہ ہویا جہنوں جواز بنا کے امریکہ نے افغانستان وچ مجاہدین دی حکومت نوں اپنے نشانے تے رکھ لیا تے فیر انسانی اکھاں نے تورابورا ورگے خوفناک منظر ویکھے۔ ایہ امریکہ دی حسب عادت طالبان نال سراسر بے وفائی سی تے طالبان دے کول جو افرادی قوت سی جدوں اوہناں نوں حکومت توں بے دخل کیتا گیا تے ایہ بیکار ہو کے رہ گئے یعنی اوہناں نوں جاب لیس کر دتا گیا۔ فیر تسیں آپ ای سوچو جدوں اک بندہ جہدے کول اپنا ہتھیار تے اسلحہ تے ہووے پر اوہنوں ملازمت چوں کڈھ دتا جاوے تے اپنی حیاتی بچان لئی ہور کیہ کرے گا؟ تے طالبان نوں تے صرف بندوق ای چلانی آئوندی سی۔ ایس طرح اوہناں نے ویہہ ورھے مزاحمتی جنگ کر کے دنیا دے سب توں وڈے فوجی اتحاد نیٹو دے لکھاں فوجیاں تے دنیا دے جدید ترین اسلحہ دے مقابلے وچ صرف مشین گناں تے اے کے 47 نال مزاحمت کیتی تے دو کھرب ڈالر تے ویہہ ورھے دے بعد امریکہ نوں کابل وچ ویت نام ورگی ذلت آمیز شکست دا سامنا کرنا پیا۔
دوستو! سابق امریکی صدر ڈونلڈ ٹرمپ نے اپنے اک بیان وچ ایہ گل منی کہ کابل وچ امریکہ نوں انسانی تریخ دی بدترین شکست ہوئی اے تے ہن امریکی صدر جوبائیڈن نوں استعفیٰ دے کے امریکی لوکاں دے سامنے پیش ہو جانا چاہیدا اے۔ میری ناقص رائے دے مطابق امریکہ جو اجے تک ویت نام دی شکست دے اثرات چوں باہر نہیں نکلیا سی اوہنوں کرونا وائرس تے کابل دی شکست نے اک واری دنیا وچ کھوکھلا تے اک نکام عالمی طاقت دے طورتے متعارف کرایا اے تے امریکہ دا جہڑا بھرم قائم سی اوہ ٹُٹ چکیا اے۔ امریکی شکست تے پاکستان نوں وی محتاط رویہ اپنانا ہووے گا۔ پاکستان وچ اجہے ان گنت لکھاری‘ کالم نگار تے دانشور موجو دنیں جو امریکی شکست تے طالبان دی جت نوں پاکستان دی فوج تے خفیہ ایجنسیاں دے کھاتے وچ پا کے بیگاانے ویاہ وچ عبداللہ دیوانے دا خواب ویکھ رہے نیں۔ سانوں ایس پرائی اگ توں بالکل بچنا ہووے گا۔ ساڈے کول پہلے چالھی لکھ توں ودھ افغان مہاجرین نیں تے ساڈی لاغر معیشت ایس توں ودھ دی متحمل نہیں ہو سکدی۔٭٭