عورتاں تے تشدد تے انورمقصود

روحیل اکبر

کجھ دیہاڑیاں توں عورتاں تے تشدد دے حوالے نال مسلسل ویڈیو سامنے آ رہیاں نیں خاص کر کجھ گھٹیا تے ذہنی طور تے گندے انسان شاید جہناں دی پیدائش کسے بدبودار گٹر دے اندر ہوندی ہووے گی کڑیاں نوں وحشیانہ طریقے نال قتل کرکے سمجھدے نیں کہ شاید اوہ بچ جان گے انج ممکن نہیں ذلالت تے کتے دی موت اوہناں دا مقدر تے ہووے گی ای نال نال اوہناں دے گھر والے وی ساری عمر کسے نوں منہ وکھان دے قابل نہیں رہن گے سگوں ہر کوئی اجہے گھٹیا تے کمینے بندے دے منہ تے تھکے گا ضرور کجھ لوک اپنی بیوی تے ہتھ چک کے اپنے آپ نوں شاید مرد سمجھدے ہون گے پر اندروں گندے‘ ذہنی بیمار تے گھٹیا انسان دے نال نال باہروں وی بزدل‘ منحوس تے لعنتی ہوندے نیں جہناں دے والدین دی گھٹیا تربیت ساری عمر اوہناں نوں چین تے سکون نال نہیں بیٹھن دیندی جد کہ بیوی بچیاں نال دوستانہ ماحول رکھن والا انسان ذہنی طور تے وی مطمئن رہندا اے تے آن والی زندگی وچ وی اوہنوں اپنے بچیاں توں ٹھنڈیاں ہواواں ملدیاں رہندیاں نیں جوانی وچ مار کٹ کرن والے بندے بڑھاپے وچ ذلیل و خوار تے ہوندے ای نیں نال نال نفرت دا کارن وی بن دے نیں جے ساڈے وچ تھوڑی بہت انسانیت موجود ہووے تے فیر ایہ گل وی سانوں سمجھ جانی چاہیدی اے کہ عورت جے دھی اے تے رحمت‘ ماں اے تے جنت تے بیوی اے تے شریک حیات جو ہر چنگے برے وقت وچ تہاڈا ساتھ نبھان والی‘ قدم بقدم چلن والی ذات اے۔ نبی اکرمؐ ہوراں دے وجود توں پہلاں عورت دی معاشرتی حیثیت نہ ہون دے برابر سی تے آپؐ نے عورتاں نوں عزت و مقام تے اک بلند مرتبہ دوایا‘ پر اج اسیں ویکھنے آں کہ اک واری فیر جہالت دا دور دورہ اے۔
اج فیر توں عورتاں اونیاں ای تکلیف وچ مبتلا نیں جنیاں کہ دور جہالت وچ سن‘ اوس ویلے وی عورتاں دی عصمت دری تے غلامی دی زندگی عروج تے سی تے اج وی بالکل انج ای اے اج دے دور تے ماضی دے دور وچ فرق اے تے اوہ سوچ دا اے‘ ماحول دا اے‘ پڑھائی لکھای تے فرقیاں دا اے۔ ایس توں علاوہ شاید ای کوئی دوجا فرق واضح ہووے کجھ بدکردار‘ بداخلاق لوک اجہے وی نیں جو عورتاں نوں ہن وی پیراں دی جتی ای سمجھدے نیں۔ ایہو وجہ اے کہ آئے دن عورتاں دے نال زیادتی تے اوہناں نوں تشدد کرکے قتل‘ عزت دے ناں تے قتل کرن دے واقعات سامنے آئوندے رہندے نیں پر پچھن والا کوئی نہیں ہوندا۔ ودھ توں ودھ ملزماں نوں جیل ہو جاندی اے تے فیر اوہناں نوں چھڈ وی دتا جاندا اے۔ ملزمان کھلے پھردے نیں پر انصاف دیاں راہواں ویکھدیاں عورتاں اپنے نال ہون والے مظالم نوں وی ہونٹ سی کے برداشت کر لیندیاں نیں پچھلے مہینے جولائی وچ ای ہیٹھ اُتے واقعے ہوئے جہدے وچ قراۃ العین عمر‘ نورمقدم‘ صائمہ تے خدیجہ نامی عورتاں دے نال ظلم و بربریت دی انتہا کر دتی گئی قراۃ العین دی گل کریئے تے اوہدی کیہ غلطی سی؟ دس ورھے تک شوہر دا ظلم و ستم سہندی رہی‘ کنی واری والدین دے گھر پرتی‘ گھر بھراواں نے اپنی عزت دی خاطر کہ خاندان والے کیہ بولن گے؟ بس ایس ڈر توں بھین نوں اک ظالم دے ہتھوں بنھیا رہن دتا جہدا نتیجہ آخر کار تشدد دی موت نکلیا کہ اوہدے ہتھ‘ نک‘ کن تے منہ دیاں ہڈیاں بھج گئیاں۔ چار ورھے دی چھوٹی بچی ماں تے ہون والے ظلم دا احوال دسدے ہوئے رو پئی تے کہیا کہ پاپا میری امی نوں بڑا ماردے سن روزانہ رات نوں اوہ امی نوں ماردے رہندے تے امی رو رو کے چپ ہو جاندی کیوں جے امی دی گل کوئی نہیں سی سن دا فیر تسیں ویکھیا کہ کس طرح بیوی نوں مارن دے بعد ویڈیو وچ ملزم عمر جھومدا رہندا‘ رقص کردا رہیا؟ کیوں جے اوہ اک بااثر باپ دی اولاد اے اجہے لوک سزا توں بچ جاندے نیں۔
صائمہ رضا دی گل ہووے تے اوس معصوم دا کیہ قصور سی؟ صرف ایہو کہ اوہ اپنا گھر بچان دی خاطر اک اجہے بندے دے نال حیاتی گزار رہی سی جو انسان نما حیوان تے درندہ سی‘ خدیجہ صدیقی جو آپ اک وکیل سی جو دوجیاں نوں انصاف دواندی سی ایہ آپ مر گئیاں‘ حیدرآباد وچ عمرخالد میمن نامی بندے نے اپنی بیوی تے چار بچیاں دی ماں قراۃ العین نوں تشدد دا نشانہ بنان دے بعد قتل کر دتا سی نورمقدم دا کیس تے بالکل واضح اے۔ آخر کدوں تک ایس قسم دے واقعات ساڈے سامنے آئوندے رہن گے تے ساڈا ضمیر ملامت کردا رہوے گا؟ ایہناں سارے کیساں دا جائزہ لیا جاوے تے تربیت تے سوچ ای اوہ جز اے جو سارے کیساں وچ وکھائی دے رہیا اے تے بااثر باپ دی اولاد ہونا یاں پیسے والا ہونا مجرماں نوں بلاخوف نڈر بنا ریہا اے۔ جدوں تک ساڈے معاشرے وچ والدین اپنے بچیاں دیاں غلطیاں تے سخت ردعمل دا اظہار نہیں کرن گے اپنا فرض پورے طریقے نال نہیں نبھان گے شاید اسیں اجہے واقعات سن دے رہواں گے تے نوجوان یاں اجہے بندے جہناں دی سوچ وچ ایس حد تک منفی رویہ ہووے گا اوہناں نوں جدوں تک سخت سزا چوں نہ گزاریا جاوے اودوں تک اسیں سدھر نہیں سکاںگے۔
آخر وچ انور مقصود دی اک خوبصورت گل کہ میں اپنے آپ نوں مجرم سمجھنا واں کیوں جے مینوں زندگی وچ جو کرنا چاہیدا سی میں اوہ نہیں کیتا۔ 60 ورھے صرف لوکاں نوں ہسایا مینوں بچیاں نوں تعلیم دینی چاہیدی سی کیوں جے ایہدے نال تبدیلی آئوندی اے تے میں ایہ نہیں کیتا۔ ہن وی ویلا اے کہ اسیں حیوان توں انسان بن جائیے زندگی صرف اک پل دی اے جان دے بعد لوک دعاواں وچ یاد رکھن نہ کہ تھوہ تھوہ کرن۔ ٭