شاہکام فلائی اوور…جدید ٹیکنالوجی تے پختہ، رکاوٹاں توں دور کُھلیاں سڑکاں

’’بزدار‘‘ دا کارواں جاری

جاوید یونس

دور حاضر وچ انفارمیشن ٹیکنالوجی دے ودھدے ہوئے نیٹ ورک دے نال نال زمینی نیٹ ورک نوں ودھ توں ودھ جدید تے بہترین بنانا خوشحالی تے ترقی تیکر اپڑن دا بنیادی حصہ اے۔ ایہو وجہ اے کہ ترقی یافتہ ملکاں وچ شاہراہواں نوں زیادہ آرام دہ ، کشادہ تے رکاوٹاں توں پاک رکھن لئی جدید ٹیکنالوجی تے انسانی علم و ہنر نوں کم وچ لیایا جا رہیا اے۔ ذرائع آمد و رفت دا بہترین انفراسٹرکچر کسے وی ملک لئی مرکزی حیثیت رکھدا اے۔ معاشی ترقی دا دارومدار اک مربوط تے منظم مواصلاحات دے نظام اُتے منحصر اے۔ ایسے طرح وڈے شہراں نوں ملان والی شہراہواں دے علاوہ بین الاضلاعی تے کھیت توں منڈی تیکر پختہ سڑکاں دا جال اقتصادی انقلاب دی راہ ہموار کرن وچ معاون ثابت ہوندا اے۔ وڈے شہراں وچ ٹریفک دے مسائل نوں حل کرن تے شہریاں دی آسانی لئی اوور ہیڈ برج انڈر پاسز تعمیر کیتے جاندے نیں جس نال ہر ویلے دے جام ٹریفک دے مسئلے حل کرن وچ مدد ملدی اے جنہاں ملکاں نے اپنی ساری توانائیاں انفراسٹرکچر، ذرائع نقل و حمل نوں جدید بنیاداں اُتے استوار کرن لئی صرف کیتیاں اوہناں نے معاشی تے اقتصادی ترقی دی منزل نوں پایا۔ ایس وچ کوئی شک نہیں کہ جدید شہر ترقی دے ضامن ہوندے نیں جد کہ ٹرانسپورٹ تے ذرائع نقل و حمل شہری ترقی تے شہری زندگی لئی لائف لائن دی حیثیت رکھدے نیں۔ شہراں وچ ٹریفک جام ہونا نہ صرف آلودگی دا کارن بن دا اے بلکہ حادثیاں وچ وادھے دے نال نال شہریاں وچ نفسیاتی مسئلے جنم لیندے نیں۔
وزیراعلیٰ پنجاب سردار عثمان بزدار دی قیادت وچ حکومت دیگر شعبیاں دی ترقی تے عوام نوں ہر ممکن سہولتاں دی فراہمی لئی سارے ضروری اقدامات کر رہی اے۔ ماضی وچ ترقی دا ایہہ عمل مخصوص علاقیاں تیکر محدود رہیا پر ہن تحریک انصاف دی قیادت نظر انداز کیتے گئے علاقیاں دی ترقی لئی بھرپور اقدامات کر رہی اے۔ بزدار حکومت صوبے دے سارے علاقیاں دی یکساں ترقی اُتے یقین رکھدی اے۔ تے ایہو وجہ اے کہ ہر ضلع لئی وکھرا وکھرا ڈسٹرکٹ ڈویلپمنٹ پیکج تیار کیتا گیا اے۔ صوبائی دارالحکومت پاکستان دے دل لہور وچ شہریاں دے ٹریفک دے ودھدے ہوئے مسائل دے حل لئی بزدار حکومت ہر ممکن اقدامات کر رہی اے جس وچ فلائی اوور، انڈر پاسز، سگنل فری روڈز بنان دے علاوہ نویاں سڑکاں دی تعمیر تے پہلے توں موجود سڑکاں دی ری ماڈلنگ کیتی جا رہی اے۔ زندہ دلان لہور دے صحت دے مسئلے نوں حل کرن لئی نویں ہسپتال قائم کرن دے علاوہ موجودہ ہسپتالاں دی حالت زار نوں بہتر بنان، ماحولیاتی آلودگی نوں گھٹ کرن لئی درخت لان دے علاوہ دریائے راوی دے نال اک ماڈرن تے جدید سہولتاں نال مزین نواں شہر آباد کیتا جا رہیا اے۔ ایس وچ کوئی شک نہیں موجودہ حکومت جدوں توں برسر اقتدار آئی اے ایس نے ہمیشہ عوام دے مفاد نوں مقدم رکھیا تے ایہناں نوں ہر ممکن ریلیف فراہم کرن لئی اقدامات چکے نیں۔
وزیراعلیٰ پنجاب سردار عثمان بزدار نے لہور دے شہریاں دی سہولت لئی میگا پراجیکٹ شاہکام چوک فلائی اوور دی تعمیر دا باضابطہ سنگ بنیاد رکھ دتا۔ شاہکام چوک فلائی اوور دی تعمیر اُتے 4 ارب 23 کروڑ روپئے توں ودھ لاگت آئے گی۔ شفاف ٹینڈرنگ تے لینڈ ایکوزیشن دی مد وچ ایس عوامی منصوبے وچ 39 کروڑ 50 لکھ روپئے توں ودھ دی بچت کیتی گئی اے۔ 606 میٹر لمبی تن رویہ، دو طرفہ فلائی اوور 10 مہینے وچ مکمل ہوئے گا تے روزانہ تقریباً سوا لکھ توں ودھ گڈیاں نوں آن جان وچ آسانی ہوئے گی۔ سگنل فری ٹریفک دی بدولت ویلے تے تیل دی بچت ہوئے گی۔ لیبر کالونی تا ملتان روڈ تقریباً 6 کلومیٹر لمبا ڈویفنس روڈ نوں دو رویہ وی کیتا جائے گا جد کہ ہڈیارہ ڈرین تے نہر اُتے 2,2 نکے پلاں دی تعمیر وی منصوبے وچ شامل اے۔ وزیراعلیٰ عثمان بزدار نے تقریب نال خطاب کردے ہوئے کہیا کہ لہور پنجاب دا دل تے پاکستان دا ثقافتی مرکز اے ۔ اسیں ترقی دے سفر وچ جس مقام اُتے اپڑ چکے آں جیہڑے اہداف حاصل کر چکے آں، ایس دا کریڈٹ ساڈے قائد وزیراعظم عمران خان دی غیر متزلزل قیادت نوں جاندا اے۔ پنجاب دے ہر شہری نوں مساوی حقوق دے نال یکساں ترقی دے موقعے فراہم کرن دے ویژن اُتے عمل پیرا آں۔ ساڈی ترجیحات وچ پنجاب دے ہر شہر، ہر پنڈ تے ہر قصبے دی ترقی شامل اے۔ محروم تے پسماندہ لوکاں دا معیار زندگی بلند کرنا تے ایہناں نوں باعزت زندگی لنگھان دے موقعے فراہم کرنا ساڈی ترجیحات وچ شامل اے۔ صحت، تعلیم تے ترقی ہر بندے دا حق اے تے ایہہ حق ایہنوں مل کے رہوے گا۔ ہن پنجاب ترقی دی راہ اُتے انج ای اگے ودھدا رہوے گا۔ پی ٹی آئی دی حکومت لہور دے گنجان آباد علاقیاں اُتے خصوصی توجہ دے رہی اے۔ لہور وچ ٹریفک دے ودھدے ہوئے رش نال نبڑن لئی روڈ انفراسٹرکچر دی بہتری نال عوام نوں سہولت فراہم کرنا ساڈی اہم ترجیح اے۔ لہور شہر دے نظر انداز کردہ علاقیاں وچ عوامی ضروریات تے مسائل نوں مدنظر رکھدے ہوئے ترقیاتی منصوبے شروع کیتے نیں۔ اوہناں نے کہیا کہ بیشتر نویاں آبادیاں تے ٹائونز وچ آن جان لئی شاہکام چوک دی حیثیت مرکزی اے۔ کینال تے ڈیفنس روڈ توں موٹروے تے ملتان روڈ لئی وی ایہو گزر گاہ اے۔ ٹریفک دے بہائو دے مطابق کشادہ نہ ہون دی وجہ نال ایتھے ٹریفک اکثر کئی کئی گھنٹے بلاک رہندی اے۔ عوام نوں ذہنی کوفت دا ساہمنا ہوندا اے تے ویلے دا ضیاع وکھرا اے ماضی وچ ایس اہم چوک اُتے کوئی توجہ نہیں دتی گئی۔ وزیراعلیٰ نے کہیا کہ پاکستان تحریک انصاف دے تن سالہ دور حکومت وچ لہور وچ ارباں روپئے دے ترقیاتی منصوبے مکمل کیتے گئے نیں جنہاں وچ لعل شہباز قلندر انڈر پاس، ٹھوکر نیاز بیگ اُتے آرائشی داخلی دروازہ، باب لہور، جناح ہسپتال وچ Pedestrain Bridge، بارش دے پانی دے بروقت نکاس تے ایہنوں محفوظ کرن لئی انڈر گرائونڈ واٹر ٹینک شامل نیں۔ اوہناں نے کہیا کہ لہور وچ جنوبی ایشیا دا سب توں وڈا میاواکی جنگل لایا جا رہیا اے جد کہ شہر دے کئی مقامات اُتے میاوا دی اربن فاریسٹ سٹیشن لائے جا رہے نیں۔ لہور دی تعمیر و ترقی دا روڈ میپ متعین کرن لئی ایل ڈی اے دی زیر نگرانی سٹیک ہولڈرز دی مشاورت نال ماسٹر پلان 2050 مرتب کیتا جا رہیا اے۔ ماسٹر پلان دا مقصد مستقبل دا بہتر لہور اے جنہوں تہذیب دا مرکز، خوشحال لہور، توں موسوم کیتا گیا اے۔ شہر دے داخلی رستے شاہدرہ چوک اُتے ٹریفک دے ودھدے ہوئے مسائل حل کرن لئی ٹربورائونڈ ابائوٹ بنایا جائے گا۔ ملٹی لیول گول چکر دے ذریعے عام تے بھاری ٹریفک دے لنگھن لئی وکھرے وکھرے رستے بنائے جان گے۔
وزیراعلیٰ عثمان بزدار نے دیگر اقدامات دا ذکر کردے ہوئے دسیا کہ وزیراعظم عمران خان دے ویژن دے مطابق پناہ گاہواں تے لنگر خانیاں دا قیام عمل وچ لیایا گیا اے۔ پولیس وچ میرٹ اُتے 10 ہزار بھرتیاں کیتیاں گئیاں نیں تے پولیس نوں 600 نویاں گڈیاں دتیاں گئیاں نیں لہور پولیس نے سارے ہائی پروفائل کیس ریکارڈ مدت وچ حل کیتے نیں۔ سی ٹی ڈی دے ہیڈ کوارٹر دے منصوبے نوں پی ٹی آئی دی حکومت نے مکمل کیتا اے۔ سروس ڈلیوری نوں بہتر بنان لئی ایل ڈی اے دے دائرہ کار نوں اک وار فیر لہور شہر تیکر محدود کیتا گیا اے۔ لہور دی تیزی نال ودھدی ہوئی آبادی دے پیش نظر اسیں فیصلہ کیتا اے کہ نویں انتظامی یونٹس وچ تقسیم کیتا جائے تے ایس سلسلے وچ تیزی نال کم جاری اے۔ پاکستان تحریک انصاف دی حکومت نے پنجاب دی تاریخ دا سب توں وڈا ڈویلپمنٹ بجٹ پیش کرن دا اعزاز وی حاصل کیتا۔ ڈویلپمنٹ دے بجٹ وچ 66 فیصد، صحت دے بجٹ وچ 185، ہائر ایجوکیشن دے بجٹ وچ 286 فیصد، سکول ایجوکیشن دے بجٹ وچ 29فیصد، زراعت دے بجٹ وچ 306 فیصد تے صنعت دے بجٹ وچ 307 فیصد وادھا کیتا گیا اے۔ پنجاب ریونیو اتھارٹی دے واجبات دی وصولی دے اہداف نال 24.7 فیصد زیادہ وصولیاں کیتیاں نیں تے 15 سال توں زیر التوا پنجاب اسمبلی دی نویں عمارت نوں پایہ تکمیل تیکر اپڑایا۔ لہور دے ہر علاقے دے مسائل اُتے ساڈی نظر اے اسیں ایہناں مسئلیاں نوں حل کرن لئی سارے میسر وسائل فراہم کرن لئی پر عزم آں۔ لہور شہر لئی ہر طرح دے وسائل حاضر نیں۔لہور شہر دے ترقیاتی منصوبیاں اُتے پیشرفت دا آپ جائزہ لینا واں انشاء اللہ اگلے 2 ورہے وچ لہور لئی شروع منصوبے مکمل ہون گے تے شہریاں نوں سہولتاں ملن گیاں۔
صوبائی دارالحکومت وچ شیرانوالہ گیٹ فلائی اوور تے فیروز پور روڈ گلاب دیوی انڈر پاس دے منصوبیاں اُتے وی کم جاری اے۔ مزید برآں لہور وچ درجناں منصوبیاں اُتے کم کیتا جا رہیا اے۔ سمن آباد چوک وچ انڈر پاس دے پراجیکٹ اُتے جلدی کم شروع کیتا جا رہیا اے۔ پارکنگ دے مسائل نوں حل کرن لئی شیرانوالہ گیٹ، مستی گیٹ تے اک موریہ پل دے نیڑے 3 پارکنگ پلازے تعمیر کیتے جا رہے نیں تے ایہناں پارکنگ پلازیاں وچ اک ہزار توں ودھ گڈیاں پارک کرن دی گنجائش ہوئے گی۔ ایل ڈی اے سٹی نیاں پاکستان اپارٹمنٹس اُتے کم جاری اے تے ایس پراجیکٹ دی تکمیل نال گھٹ آمدن والے عام شہریاں تے نکے ملازمین نوں چھت میسر آئے گی۔ پراجیکٹ وچ مجموعی طور اُتے 35 ہزار اپارٹمنٹس بنائے جان گے۔ ایسے منصوبے دے پہلے مرحلے وچ 4 ہزار اپارٹمنٹس دی تعمیر جاری اے۔ یکساں ترقی دے ویژن دے تحت پورے پنجاب دے ضلعیاں لئی 360 ارب روپئے دا ڈسٹرکٹ ڈویلپمنٹ پیکج دتا اے تے حکومت نے لہور نوں نظر انداز نہیں کیتا۔ لہور نوں سابق دور حکومت دے تیجے سال وچ اورنج لائن میٹرو ٹرین منصوبے دے بجٹ نوں کڈ کے 67 ارب روپئے دی لاگت دے پراجیکٹ دتے گئے جد کہ موجودہ حکومت دے تیجے سال وچ لہور نوں 85 ارب روپئے دے ترقیاتی منصوبے دتے گئے نیں۔ لہور وچ راوی ریور اربن ڈویلپمنٹ پراجیکٹ (RUDA) تے سنٹرل بزنس ڈسٹرکٹ (CBD) گیم چینچر منصوبے نیں۔ انشاء اللہ جاری ترقیاتی منصوبیاں نال لہور اک عالمی معیار دے میٹرو پولٹین شہر وچ تبدیل ہوئے گا۔ لہور وچ چلڈرن ہیلتھ یونیورسٹی دا قیام عمل وچ لیایا جا رہیا اے جد کہ 7 ارب روپئے دی لاگت نال گنگارام ہسپتال وچ مدر اینڈ چائلڈ بلاک تعمیر کیتا جا رہیا اے۔14 ارب روپئے دی لاگت نال اک ہزار بیڈ دا نواں جنرل ہسپتال تعمیر کیتا جائے گا۔ 10 ارب روپئے دی لاگت نال محمود بوٹی شاہدرہ تے شاد باغ وچ سرفیس واٹر ٹریٹمنٹ پلانٹ لایا جا رہیا اے۔ بی آر بی نہر اُتے سرفیس واٹر ٹریٹمنٹ پلانٹ لایا جا رہیا اے لاریکس کالونی تا گلشن راوی نکاسی آب میگا پراجیکٹ، شاہی قلعہ وچ تاریخی ورثے دی بحالی تے تحفظ دا پراجیکٹ تے لہور شہر دی خوبصورتی تے دلکشی نوں اجاگر کرن لئی ’’دل کش لاہور‘‘ پراجیکٹ اُتے کم جاری اے۔ وکلاء لئی ہائی کورٹ دے نیڑے ٹاور دا قیام عمل وچ لیایا جائے گا۔ ایم پی اے ہاسٹل دا فیز ٹو تعمیر ہوئے گا جس اُتے 3 ارب 44 کروڑ روپئے لاگت آئے گی لہور دی تن وڈی یونین کونسلاں وچ پین دے صاف پانی دی فراہمی دا منصوبہ شروع کیتا گیا اے جس اُتے اک ارب 65 کروڑ روپئے خرچ ہون گے۔ شہر وچ ٹریفک دی روانی لئی مارکیٹاں دی رنگ روڈ دے اطراف وچ منتقلی دا منصوبہ بنایا گیا اے۔ سروسز ہسپتال وچ ہاسٹل دی تعمیر دے نال سروسز ہسپتال تے جناح ہسپتال وچ 400-400 بستریاں اُتے مشتمل نویں ایمرجنسی بلاکس بنائے جان گے۔ سگیاں روڈ دی بحالی تے بہتری، سبزہ زار وچ وویمن ڈویلپمنٹ آفس کمپلیکس دی تعمیر تے پریزن کمپلیکس لہور دی تعمیر دے منصوبے شروع کیتے گئے نیں۔ سول سیکرٹریٹ دے نیڑے ملٹی سٹوری پارکنگ پلازہ دی تعمیر شروع کیتی جا رہی اے۔ مزار بی بی پاکدامن دی تعمیر و توسیع تے ریونیو اکیڈمی دی تعمیر جاری اے۔ فوڈ اینڈ ڈرگ لیبارٹری تے لوکل گورنمنٹ اکیڈمی دا قیام عمل وچ لیایا گیا اے۔ ماحولیاتی آلودگی دے خاتمے تے عوام دی سہولت لئی لہور وچ مختلف روٹس اُتے الیکٹرک بساں چلائیاں جان گیاں لہور وچ مسافراں دی سہولت لئی بس انفارمیشن تے شیڈول سسٹم تے 200 بس سٹاپ شیلٹرز دی تعمیر کیتی جائے گی ٹھوکر نیاز بیگ اُتے عالمی معیار دا بس ٹریمنل بنایا جائے گا۔
حکومت جدید تے معیاری روڈ نیٹ ورک دی تعمیر نوں اہمیت دے رہی اے۔ رواں مالی سال وچ 380 ارب روپئے دی لاگت نال سڑکاں دی تعمیر، مرمت تے توسیع دا اک جامع پروگرام شروع کیتا گیا اے۔ ایس پروگرام دے تحت پورے صوبے وچ 13000 کلومیٹر لمبائی دی 1769 ترقیاتی سکیماں مکمل کیتیاں جان گیاں۔ نویں مالی سال وچ ایس مقصد لئی 58 ارب روپئے دی وڈی رقم رکھی گئی اے۔ وفاقی حکومت جدید شاہراہواں دی تعمیر تے توسیع دے اک وسیع پروگرام لئی مالی وسائل فراہم کر رہی اے۔ ایس پروگرام دے تحت صوبے وچ 73 ارب روپئے مالیت نال 776 کلومیٹر لمبی 13 اہم شاہراہواں دی تعمیر و توسیع دا کم شروع کیتا جا رہیا اے۔ ایس دے علاوہ 8 ارب روپئے دی مالیت نال وزیراعلیٰ روڈ بحالی پروگرام، دا آغاز کیتا جا رہیا اے جس دے تحت صوبے دی خستہ حالی سڑکاں دی تعمیر تے بحالی دے کم مکمل کیتے جان گے۔
وزیراعلیٰ سردار عثمان بزدار شرافت دی سیاست دے علمبردار نیں۔ اوہناں نے تن سال دے عرصے دے دوران عوامی فلاح و بہبود تے پسماندہ علاقیاں دی ترقی دے انج دے جامع تے ٹھوس منصوبے دتے نیں جنہاں دی ماضی وچ مثال نہیں ملدی۔ ایہو اوہ صورتحال اے جس اُتے اپوزیشن تے اقتدار توں محروم طبقہ پریشان اے تے ایہناں دے خلاف منفی پراپیگنڈہ کر رہے نیں۔ اوہناں نے اپنی سیاسی بصیرت، مدبر تے حالات دی نزاکت نوں سمجھدے ہوئے سارے معاملات نوں خوش اسلوبی نال حل کیتا اے۔پنجاب وچ سیاسی تے انتظامی امور اُتے ایہناں دی گرفت پہلے توں زیادہ مضبوط ہو گئی اے۔ سردار عثمان بزدار نے نہ صرف سازشی عناصر نوں چارے شانے چت کیتا بلکہ اوہ اک بہترین منتظم دے رویے وچ ساہمنے آئے نیں۔ اوہ دھیمے لہجے وچ مٹھیاں گلاں کرن دے نال نال اک زیرک سیاستدان دی ساری خوبیاں رکھدے نیں۔ ایہناں نوں نمایاں ہون دا کوئی شوق نہیں تے نہ ای ماضی دے حکمراناں وانگوں بڑھک بازی اُتے یقین رکھدے نیں۔ وزیراعظم پاکستان عمران خان نے گورنر ہائوس وچ ایجوکیشن کنونشن نال خطاب کردے ہوئے کہیا کہ وزیراعلیٰ عثمان بزدار نے انج دے وڈے کم کیتے نیں جنہاں دی جنہی وی تعریف کیتی جائے گھٹ اے پر اوہ اپنی پروجیکشن گھٹ کردے نیں پرماضی وچ حکمران کم نکا کردے سن پر ایس دی بوہت زیادہ اشتہار بازی کردے سن۔ایہو وجہ اے کہ ایس ویلے شوبازی دی بجائے عوامی خدمت دی سیاست ہو رہی اے۔ ہن سرکاری مشینری نوں سیاست لئی استعمال کرن دی گنجائش نہیں عوام حکومت دی عوام دوست پالیسیاں پاروں موہڈے نال موہڈا ملا کے حکومت دے نال کھڑے نیں کیوں جے اوہ جان دے نیں کہ بزدار حکومت ایہناں دے مسئلیاں دے حل لئی خلوص نیت نال عملی اقدامات کر رہی اے۔ آسانیاں دے حصول لئی تھوڑی بوہت تکلیف نوں برداشت کرنا پیندا اے۔
تاریخ ایس گل دی گواہ اے کہ اوہ ای قوماں ترقی کردیاں نیں جیہڑیاں قوماں اہمیت دے حامل منصوبیاں لئی قومی مفادات نوں ترجیح دیندیاں نیں۔