شکریہ وزیر اعظم پاکستان

عمران خان دا جیہڑا کم ہمیشہ یاد رکھیا جائے گا اوہ پورے ملک وچ اِکو نصابِ تعلیم لاگو کرنا اے

عتیق انور راجہ

اج کل موجودہ حکومت دے تن سالہ دور دی کارکردگی اُتے گل ہو رہی اے۔ ظاہری گل اے کہ حکومت دے حامی اپنے کارنامیاں اُتے نازاں و شاداں نیں تے اپوزیشن حکومت ولوں کیتے گئے ہر فیصلے اتے ہر کوشش اُتے سوالیہ نشان لائی بیٹھی اے۔ میرے ملک پاکستان نے ہر طرح دے حالات دا ساہمنا کیتا اے تے میرے ملک اُتے ہر طرح دے لوکاں توں حکومت کروائی گئی اے۔ میں کہنا ایہہ چاہنا واں کہ آمریت دا دور ہوئے یا جمہوری نظام ہمیشہ ایس ملک دے تخت اُتے براجمان لوکاں نے اپنے شہریاں نوں مجھاں گاواں وانگوں سمجھیا اے۔ نظام حکومت ہوئے، نظام انصاف ہوئے، صحت دی گل ہوئے یا تعلیمی نصاب دی تیاری کرنا ہوئے، ساڈی حکومتاں ہر دور وچ مغرب توں متاثر نظر آئیاں نیں تے ملک نوں قرض دی دلدل وچ دھکیلن دے بعد اپنا سلیبس مغربی آقاواں دی منشا دے مطابق ترتیب دیندیاں نظر آئیاں نیں۔ ایسے لئی ماضی وچ ساڈی حکومتاں وارث شاہؒ،شاہ حسینؒ تے علامہ اقبال ؒ نوں تے نصاب تعلیم وچ اوہ تھاں نہیں دے سکیاں جیہڑی دینی چاہیدی سی پر شکسپیئر،مسٹر چپس تے دوجے مغربی لکھاریاں نوں ساڈے نوجواناں لئی پڑھنا ضروری قرار دیندیاں رہیاں۔ جناب عمران خان نال بوہت سارے لوکاں نوں اختلاف ہو سکدا اے پر اک کم جیہڑا ایہناں دا ہمیشہ یاد رکھیا جائے اوہ اے پورے ملک وچ یکساں نصاب تعلیم۔ یکساں نصاب دا تیار ہونا ساڈے روشن مستقبل دی نوید اے۔ تجزیہ نگار کہندے نیں کہ آن والے ویلے وچ جدوں سارے ملک دے طلبا و طالبات اک جہی تعلیم حاصل کرن گے تے پورے ملک وچ ذہنی ہم آہنگی دی فضا زیادہ آسانی نال بن جائے گی۔ کجھ مہینے پہلے اک دانشور نال یکساں نصاب تے ایس دی اہمیت اُتے گل بات ہو رہی سی تے جناب نے فرمایا سی راجہ صاحب ! وزیراعظم پاکستان تعلیم تے تعلیمی پیچیدگیاں نوں بوہت چنگی طرح سمجھدے نیں۔ اوہ چاہندے نیں کہ ساڈے بچے جدید علوم حاصل کرن تے دنیا وچ نام و مقام بنان تے ہن ایہناں نوں ایہہ احساس شدت نال ہو چکیا اے کہ انگریزی زبان وچ رٹے لا کے پڑھن والے بچے نمبر جنہے مرضی لے لین پر اوہ کدی وی چنگے شہری، سائنس دان، محقق، موجد، دانشور، استاد، سیاست دان تے حکمران نہیں بن سکدے ۔ ایس لئی وزیراعظم پاکستان چاہندے نیں کہ پورے ملک وچ ذریعہ تعلیم مادری زبان ہونا چاہیدا اے تے بوہت جلدی تہاڈے وزیراعظم بالاں نوں مادری زبان وچ تعلیم دین دا اعلان وی کر دین گے۔ 25 اگست نوں لہور وچ خطاب کردے ہوئے وزیراعظم پاکستان نے برملا اعلان کر دتا اے کہ جے اسیں واقعی ترقی کرنی اے تے سانوں بالاں نوں مادری وچ تعلیم دینی ہوئے گی۔ اج سانوں مادری زبان دی اہمیت و افادیت نوں سمجھنا بوہت ضروری اے۔ پوری دنیا وچ مادری زبان نوں ثقافتی ورثے دی بقا تے ایس دے فروغ دا موثر ذریعہ سمجھیا جاندا اے۔ ایس لئی مادری زبان دا تحفظ تے ایس دا فروغ ساڈے ساریاں دی مشترکہ ذمہ داری اے۔ مادری زبان دھرتی دی زبان ہوندی اے ایس لئی ایس وچ لکھے گیت، ماہیے، ٹپے تے بولیاں زبان زد عام ہوندے نیں۔مادری زبان جذبات و احساسات دے اظہار دا بہترین ذریعہ بن دی اے۔ سابقہ ادورا وچ ویکھیا گیا کہ بیورو کریسی تے اشرافیہ جان بُجھ کے پنجابی زبان نوں دفتراں تے تقریبات توں دور رکھن دی کوشش کردی رہی پر اج کل دفتراں وچ بیٹھے بوہت سارے بابو پنجابی زبان وچ گل کردے نظر آندے نیں۔ اقوام متحدہ وی ایہہ قرار دے چکی اے کہ بالاں دا ذریعہ تعلیم مادری زبان ہونا چاہیدا اے تے پاکستان دی اعلیٰ عدالتاں نے اردو دے نال نال پنجابی ، اردو، پشتو، سندھی تے بلوچی نوں قومی زباناں قرار دیندے ہوئے ذریعہ تعلیم بنان دے احکامات دتے ہوئے نیں۔ ہن وزیراعظم پاکستان نوں یقینی بنانا ہوئے گا کہ پورے ملک دے تعلیمی اداریاں وچ پرائمری توں مادری زبان وچ ای تعلیمی سفر شروع ہوئے۔ سب توں پہلے بچے اپنی ماں دی زبان پڑھن، اپنے آل دوالے دے ماحول نوں سمجھن، اپنے علاقائی تے قومی ہیروز توں آگاہ ہون تے فیر اپنی ضرورت دے پیش نظر انگریزی نوں عربی، فارسی، چینی، جرمن تے دیگر زباناں وانگوں بطور اک مضمون پڑھن۔ جناب وزیراعظم مادری زبان دی اہمیت نوں سمجھدے ہوئے ایہنوں ذریعہ تعلیم بنان دی گل کرن اُتے اسیں تہاڈے مشکور آں۔
جناب وزیراعظم پاکستان ! افغانستان وچ نویں حکومت بنن جا رہی اے تے جے اج ساڈی حکومت نوں افغانستان توں مثبت پیغامات آ رہے نیں تے ایہناں دی حوصلہ افزائی ضرور کرو پر خدارا! اوہ غلطی فیر نہ کرو جیہڑی ماضی وچ ساڈے حکمراناں توں ہو چکی اے۔ یاد رکھو کہ افغان پناہ گزیناں نوں لہور یا دوجے کسے وی شہر وچ ٹھہران نال اسیں دوبارہ کسے نویں مشکل وچ پئے سکنے آں۔ ایس لئی مسئلے دی شدت نوں شروع وچ ای سمجھن دی کوشش کرو تے افغان پناہ گزیناں دے عارضی قیام لئی سوچ سمجھ کے انتظامات کرن دی کوشش کرو۔